ހޯނޑެއްދޫ އާއި އެ ރަށާ ކައިރި ފަޅު ރަށަކުން އިތުރު 69 ކިލޯގެ މަސްތުވާތަކެތި ހޯދައިފި
2 ނޮވެމްބަރު 2022 | ބުދަ 13:54އެ ރަށުން ހޯދި މަސްތުވާތަކެތީގެ އަދަދު މިހާރު 82 ކިލޯއަށް އަރާ
މަސްތުވާތަކެތި
ގދ. ހޯނޑެއްދޫ އާއި އެ ރަށާ ކައިރި ފަޅުރަށަކުން އިތުރު 69 ކިލޯގެ މަސްތުވާތަކެތި ފުލުހުން ހޯދައިފިއެވެ.
ކޮމިޝަނަރ އޮފް ޕޮލިސް މުޙައްމަދު ހަމީދު ބުދަ ދުވަހު ކުރެއްވި ޓްވީޓެއްގައި ވިދާޅުވީ އިތުރު 69 ކިލޯގެ ޑްރަގް ހޯދާފައިވަނީ ހޯޑެއްދޫ އާއި އެ ރަށާ ކައިރި ފަޅުތރަށްތަކުގައި ވަޅުލާފައި ހުއްޓާ ކަމަށެވެ. އަދި އޮކްޓޯބަރު މަހުގެ 27 ވަނަ ދުވަހު ހޯނޑެއްދޫއިން ހޯދި 13 ކިލޯއާއެކު އެ ރަށުން އަތުލައިގަތް މަސްތުވާތަކެތީގެ އަދަދު 82 ކިލޯއަށް އަރާފައިވާ ކަމަށް ކޮމިޝަނަރ ވިދާޅުވިއެވެ.
ކޮމިޝަނަރ ވިދާޅުވި ގޮތުގައި ހޯނޑެއްދޫ އާއި އެ ރަށާ ކައިރި ފަޅުރަށުން ހޯދާފައިވަނީ މަސްތުވާތަކެތީގެ ބާވަތްތަކެއް ކަމަށްވާ މެތާއި ހެރޮއިން އެވެ.
އޮކްޓޯބަރު 27 ވަނަ ދުވަހު ފުލުހުން ހޯނޑެއްދޫއިން މަސްތުވާތަކެތި ހޯދާފައިވަނީ ފުލުހުންގެ ޑްރަގް އެންފޯސްމަންޓާއި އިންޓެލިޖެންސް އަދި ސައުތު ޕޮލިސްގެ ފުލުހުން ގުޅިގެން މިހާރު ޚާއްސަ އޮޕަރޭޝަނެއްގެ ތެރެއިންނެވެ. އެގޮތުން ރާއްޖެއަށް މަސްތުވާތަކެތި އެތެރެކޮށް އެތަކެތި ވިއްކައި ވިޔަފާރިކުރާކަމަށް އިންޓެލިޖެންސަށް ލިބުނު މައުލޫމާތަކާ ގުޅިގެން ކުރިއަށްގެންދާ އެ އޮޕަރޭޝަންގެ ތެރެއިން، ގިނަ އަދަދެއްގެ މަސްތުވާތަކެތި ހޯދާފައިވަނީ ހޯނޑެއްދޫ ވަލުތެރޭގައި ވަޅުލާފައި ހުއްޓައެވެ.
