ޝިމާޒް އާއި މެދު ފިޔަވަޅު އަޅަން ޖެހޭ ނަމަ އެކަން ކުރާނެ: ތަރުޖަމާން
ޝިމާޒް މަޤާމުން ވަކިކޮށްދެއްވުމަށް މިނިސްޓަރ ނަހުލާ ވަނީ އެދިވަޑައިގަންނަވާފައި
ޝިމާޒް
ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީއަށް ފިޔަވަޅު އަޅަން ޖެހޭތޯ ބެލުމަށް ފަހު އެކަން ކުރަން ޖެހޭ ނަމަ އަޅަން ޖެހޭ ފިޔަވަޅެއް އަޅާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި މިއުވާން މިފަދައިން ވިދާޅުވީ ޝިމާޒް މަޤާމުން ވަކިކޮށްދެއްވުމަށް އެދި ޓްރާންސްޕޯޓް މިނިސްޓަރު އައިޝަތު ނަހުލާ ރައީސް އިބްރާހިމް މުހައްމަދު ސާލިޙަށް ސިޓީއެއް ފޮނުއްވާފައިވާތީ އެކަމާއި ގުޅޭގޮތުން "ރާއްޖެ އެމްވީ" އިން ކުރި ސުވާލަކަށް ޖަވާބުދެއްވަމުންނެވެ. މިއުވާން ވަނީ އެފަދަ ސިޓީ އެއް ރައީސް އަށް ލިބިވަޑައިގަންނަވާފައިވާކަން ކަށަވަރުކޮށްދެއްވާފައެވެ. އަދި އެ ސިޓީ އާއި ގުޅިގެން ބަލަންޖެހޭ ކަންކަން ބަލަމުންދާ ކަމަށް ވެސް މިއުވާން ވިދާޅުވިއެވެ.
މިނިސްޓަރ ނަހުލާ، ޝިމާޒް މަޤާމުން ވަކިކޮށްދެއްވަން އެދިވަޑައިގެން ސިޓީ އެއް ފޮނުއްވާފައި ވަނީ އެ ވުޒާރާގެ ތެރެއިން ހިންގާފައިވާ ކޮރަޕްޝަންގެ އަމަލެއްގައި އޭނާގެ ބައިވެރިވުން އޮތް ކަމަށް ތުހުމަތުކުރެވޭތީއެވެ. މަޤާމުގެ ނުފޫޒު ބޭނުންކޮށްގެން ވެހިކަލްތަކުގެ ނަމްބަރު ޕްލޭޓް ބަދަލުކުރުމަށް ކުންފުންޏަށް އެހީތެރިވުމާއި ގުޅިގެން ޓްރާންސްޕޯޓް މިނިސްޓްރީގެ އިސް ބައެއް މުވައްޒަފުންނާއި ގުޅުން ހުރި މައްސަލަ އެއް އޭސީސީ އިން ވަނީ ބަލާފައެވެ.
