ސަރުކާރު ކުންފުނިތައް ހިންގަން އުނދަނގޫ، ސިޔާސީ ނުފޫޒު ފޯރުވުމުގެ ފުރުސަތު ބޮޑު:ޓްރާންސްޕޭރެންސީ
އިންސާނީ ހައްގުތައް ހިމާޔަތްކޮށް ޑިމޮކްރެސީ ހަރުދަނާ ނުވެ ކޮރަޕްޝަން ނުހުއްޓުވޭނެ ކަމަށް ޓްރާންސްޕޭރެންސީ މޯލްޑިވްސް އިން ބުނޭ
ޓްރާންސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރ އާސިޔަތު ރިޟްވީނާ
ސަރުކާރު ކުންފުނިތައް ހިންގަން އުނދަނގޫ ކަމަށާއި ސިޔާސީ ނުފޫޒު ފޯރުވުމުގެ ފުރުސަތު ބޮޑު ކަމަށް ޓްރާންސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރ އާސިޔަތު ރިޟްވީނާ ވިދާޅުވެއްޖެއެވެ.
ޓްރާންސްޕޭރެންސީ މޯލްޑިވްސް އާއި އެންޓި-ކޮރަޕްޝަން ކޮމިޝަން ގުޅިގެން އާދިއްތަ ދުވަހު ފެށި "އެންޓި-ކޮރަޕްޝަން ކޮންފަރެންސް 2022"ގައި ވާހަކަދައްކަވަމުން އޭނާ ވިދާޅުވީ ސަރުކާރު ކުންފުނިތަކުން ދޭ ޚިދުމަތްތަކަކީ އަސާސީ ޚިދުމަތްތަކަކަށް ވާއިރު ދުނިޔޭގެ ހުރިހާ ތާކު ވެސް އެ ކުންފުނިތައް ހިންގުމަށް ގިނަ ހުރަސްތަކާއި ދިމާވާ ކަމަށެވެ. ދިރާސާތަކުން އެނގޭ ގޮތުން އެފަދަ ތަންތަނަށް ދިމާވާ ހިރާސްތައް ގިނަ ކަމަށް އޭނާ ވިދާޅުވިއެވެ. ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކޮށް ނަޒާހަތްތެރި ތަންތަނަށް އެތަންތަން ހެދުމަކީ މުހިންމު ކަމެއް ކަމަށާއި ކޮރަަޕްޝަން ހުއްޓުވުމަށް އެ ތަންތަނަކީ ނުފޫޒުން އެއްކިބާވެފައިވާ ތަންތަނަށްވުން މުހިންމު ކަަމަށް ރިޟްވީނާ ވިދާޅުވިއެވެ.
ރާއްޖެ އިން ކޮރަޕްޝަން ނައްތާލުމަށް ޓްރާންސްޕޭރެންސީ އިން ކުރާ މަސައްކަތް ކާމިޔާބުވާނީ އިންސާނީ ހައްގުތައް ހިމާޔަތްކޮށް ޑިމޮކްރެސީ ހަރުދަނާވެގެން ކަމަށް އޭނާ ވަނީ ވިދާޅުވެފައެވެ. އެ އަމާޒަށް ވާސިލް ވުމަށް ދިރާސާ ތައް ކުރުމާއި ޤާނޫނީ އޮނިގަނޑު ހަރުދަނާކުރުމަށް ވެސް މަސައްކަތް ކުރަމުންދާ ކަމަށް އޭނާ ވިދާޅުވިއެވެ. އެ މަސައްކަތްތަައް ކުރަނީ ދުނިޔޭގެ ފެންވަރުަގައި ބަލައިގަންނަ ފަދަ ފަންނީ އެހީ އާއި އެކުގައި ކަމަށް ރިޟްވީނާ ވިދާޅުވިއެވެ. ކޮރަޕްޝަން ހުއްޓުވަން ކުރާ މަސައްކަތް ކާމިޔާބު ނުވަނީ ވަކި ބަޔަކު ގާނޫނުގެ ކުރިމައްޗަށް ގެނެސް އިންސާފު ގާއިމްކުރުމަށް އުނދަނގޫވާތީ ކަމަށް އޭނާ ވިދާޅުވިއެވެ. އަދި ޤާނޫނުތައް ރަނގަޅަށް ތަންފީޒު ނުވާ ކަމަށް ފާހަގަކުރައްވާ އޭނާ ވިދާޅުވީ ކޮރަޕްޝަން ބޮޑު ގައުމުތަކުގެ ތެރޭގައި ރާއްޖެ ހިމެނުމަކީ ހިތާމަކުރައްވާ ކަމެއް ކަމަށެވެ.
