ޔުއެފާ ޗެމްޕިއަންސް ލީގުގައި މެންޗެސްޓަރ ސިޓީއާއި ސެވިއްޔާ ބައްދަލުކުރާ މެޗުގައި މެންޗެސްޓަރ ސިޓީގެ ޒުވާން ތަރި އާލިން ބްރައުޓް ހާލަންޑު ނުކުޅޭނެކަމަށް، މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

އިނގިރޭސި ޕްރިމިއަރ ލީގުގައި ހޮނިހިރު ދުވަހުގެރޭ ސިޓީއާއި ލެސްޓަރ ސިޓީ ބައްދަލުކުރި މެޗުގައިވެސް ހާލަންޑު ނުކުޅެއެވެ. ލެސްޓަރގެ މައްޗަށް 1-0ން ސިޓީ ކުރިހޯދި މި މެޗުގައި ހާލަންޑު ނުކުޅުނީ އަނިޔާގެ ސަބަބުންނެވެ. އެހެންކަމުން އޭނާގެ ކެރިއަރު ރިސްކުކޮށް، ކުރިއަށް އޮތް ޗެމްޕިއަންސް ލީގުގައި ހާލަންޑު ބޭނުންކުރުމަކީ އެންމެ ރަނގަޅު ގޮތް ނޫންކަމަށް ކޯޗު ގާޑިއޯލާ ވަނީ ނިންމާފައެވެ.

މި ސީޒަންގައި ސިޓީއަށް ބަދަލުވި ހާލަންޑް ވަނީ އެޓީމުގައި (ހުރިހާ މުބާރާތެއް ހިމެނޭހެން) ޖުމްލަ 22 ލަނޑު ޖަހާފައެވެ. ނަމަވެސް ޗެމްޕިއަންސް ލީގުގައި އެންމެ ފަހުން ހާލަންޑުގެ ކުރީގެ ކްލަބު ބޮރޫޝިޔާ ޑޯޓްމަންޑާ ބައްދަލުކުރި މެޗުގައި އޭނާ ވަނީ އަނިޔާވެގެން ދަނޑުން ބާލާފައެވެ.

ގާޑިއޯލާ އިތުރަށް ބުނީ މިހާރުވެސް މުބާރާތުގެ ދެވަނަ ބުރަށް ޓީމު ކޮލިފައިވެފައި ވުމުން، ސެވިއްޔާ މެޗުގައި ހާލަންޑު ބޭނުންނުކުރާނެ ކަމަށެވެ. ނަމަވެސް އުންމީދަކީ ފުލަމްއާ ބައްދަލުކުރާ މެޗަށް ހާލަންޑު ފިޓުވުންކަމަށް ގާޑިއޯލާ ބުންޏެވެ. އަދި ކަރަބާއޯ ކަޕްގައި ޗެލްސީއާއި ދެކޮޅަށް ސިޓީ ކުޅޭ މެޗުގައި ހާލަންޑު ފެނިދާނެކަމުގެ އިޝާރާތެއް ގާޑިއޯލާ ކުރިއެވެ.

މި ސީޒަންގައި ސިޓީއަށް ބަދަލުވެ ހާލަންޑު އަންނަނީ މޮޅު ކުޅުމެއް ދައްކަމުންނެވެ. ޓީމު ހޯދި ގިނަ ކާމިޔާބީތަކުގައި އޭނާގެ ދައުރު ބޮޑެވެ.