މަޖީދިއްޔާއަށް އެންމެބޮޑު ބަދަލުތަކާއި ޒަމާނީ ކުރިއެރުން ގެނެސްދެއްވީ ނާޞިރު

މަޖީދިއްޔާ ސްކޫލަކީ ރާއްޖޭގައި މެދުނުކެނޑި މިހާތަނަށް 450 އަހަރު ދެމިގެން އައި އިލްމީ ސިލްސިލާގެ ތެރެއިން އަލިވެ އުޖާލާވި އިލްމީ ދަންމަރެވެ. ރާއްޖޭގެ އެންމެ ފަޚުރުވެރި ޝަރަފުވެރި މަދުރަސާއެވެ. މަޖީދިއްޔާ ނުވަތަ ސަނިއްޔާގެ ފެށުމަކީ 17 ޝައްވާލު 1345 ބުދަ ދުވަހު ހެނދުނު 7 ޖެހިއިރު ފަނޑިޔާރުގޭ ފެންޑާގައި އަލްޢައްލާމާ ޙުސައިން ޞަލާޙުއްދީން އުއްތަމަ ފަނޑިޔާރު މަނިކުފާނުގެ ނާޒިރުކަމުގައި ރަސްމީގޮތުން ކިޔަވައިދެއްވަން ފެށްޓެވި ފެށްޓެވުމެވެ. އެއީ މަދުރަސަތުއް ޞަލާޙިއްޔާއެވެ. (ފަހުން މަދުރަސަތުއް ސަނިއްޔާއެވެ. މަދުރަސަތުއް މަޖީދިއްޔާއެވެ. އަދި މަޖީދިއްޔާ ސްކޫލެވެ.) މިދުވަހަކީ މީލާދީ ތާރީޚުން 20 އޭޕުރީލު 1927އެވެ. އެހެންނަމަވެސް ހިޖުރީ ތާރީޚު މީލާދީ ތާރީޚަށާ ބަދަލުކުރުމުގެ ތެރޭގަައި 1958ގައި އޮޅުމުގެ ތެރެއިން މަޖީދިއްޔާގެ އަހަރީ ދުވަސް 19 އޭޕުރީލުގައި ފާހަގަކުރާތާ 65 އަހަރު ވަނީއެވެ.

މީލާދީގޮތުން މަޖީދިއްޔާއަށް 95 އަހަރުފުރި 100 އަހަރު ފާހަގަކުރުމުގެ އިހުތިފާލުތައްވެސް ހިނގަމުންދަނީއެވެ. ހިޖުރީގޮތުން 98 އަހަރުވެ ހިނގަމުން މިދަނީ 99ވަނަ އަހަރެވެ. މިއަހަރުގެ 17 ޝައްވާލުގައި ހިޖުރީގޮތުން މަޖީދިއްޔާއަށް 99 އަހަރު ފުރި 100ވަނަ އަހަރު ފެށޭނެވެސްމެއެވެ. މަޖީދިއްޔާއަށް 100 އަހަރުފުރުމުގެ އިހުތިފާލުތައް ހިނގަމުންދާއިރު "އިހުމާލު ކުރެވިފަައިވާ ކަމަށް މިކަންކަން އެނގިވަޑައިގަންނަވާ ފަރާތްތަކުން ފާހަގަކުރައްވާ ކަންކަމަށް މިމުނާސަބަތުގައި ބަލާލުމަކީ އެކަށޭނަ ކަމެކެވެ. 1960ގެ އަހަރުތަކުގައި ރާއްޖޭގައި ރަސްމީގޮތުން އިނގިރޭސި ތަޢުލީމު ފެށުން ހިމެނުނީ ރާއްޖޭގެ ތަޢުލީމީ ތަރައްޤީގެ އެންމެ ބޮޑު އިންޤިލާބީ ކުރިއެރުން ކަމުގައެވެ. އެއިގެ ފަހުން ރާއްޖެއަށް ލިބުނު ހުރިހާ ކުރިއެރުމެއް އަދި މެދުފަންތީގެ މީހުންނަށް ނުވަތަ އާންމު ރައްޔިތުންނަށް ސިޔާސީ އިޖުތިމާއީ އިގުތިސާދީ މައިދާނުގައި ކުރިއަށް ދިއުމުގެ މަގުފަހިވީ މިކަމުގެ ސަބަބުން ކަމުގައެވެ. ބޮޑުވަޒީރު އަދި ވަޒީރުލްމަޢާރިފް ޞާޙިބުއްދައުލަތު (ދައުލަތުގެ މަތިވެރި ސާހިބު) ޞ.ދ. ނާޞިރުގެ އެންމެ އަގުހުރި ގައުމީ ޚިދުމަތްތަކުގެ ތެރޭގައި ހިމެނޭ ކަމެކެވެ. ރާއްޖޭގައި އެންމެ ފުރަތަމަ ރަސްމީގޮތުން ޖީ.ސީ.އޯ ލެވެލް ހެދުމުގެ ރެކޯޑު ވަނީ އަމީނިއްޔާއަށެވެ. އަންހެން ދަރިވަރުންނަށެވެ. އެއީ ޖަނަވަރީ 1967ގައެވެ.

ހުރިހާ މާއްދާއަކުން ލަޠީފާ އަޙްމަދު ފާސްވިއެވެ. މަޖީދިއްޔާ ދަރިވަރުން ފިރިހެން ކުދިން ޖީ.ސީ.އީ. އޯލެވެލް ހެދީ އެއަހަރުގެ ޖޫންގައެވެ. ޖޫން 1967ގައެވެ.

ވީމާ، މަޖީދިއްޔާއާއި އަމީނިއްޔާގެ ތައުލީމަށް އެންމެ ބޮޑު އިންގިލާބީ ބަދަލުތަކާއި ޒަމާނީ ކުރިއެރުން ގެނެސްދެއްވީ ސުމުއްވުލްއަމީރު އިބްރާހީމް ނާޞިރު ރަންނަބަނޑޭރި ކިލެގެފާނު ނިޝާން ޣާޒީގެ ޢިއްޒަތްތެރި ވެރިޔާގެ ބޮޑުވަޒީރު ކަމުގައެވެ. ސީދާ އެމަނިކުފާނުގެ މޭސްތިރިކަމާއި ބެއްލެވުމުގެ ދަށުންނެވެ. މިހަގީގަތްތައް އެނގިފާޅުވެގެންވެއެވެ. މިކަންކަން ފެނިވަޑައިގެންނެވި ދެކެވަޑަައިގެންނެވި ގިނަ ބޭފުޅުން އެބަތިއްބެވިވެސްމެއެވެ.