ކްލަބް މޯލްޑިވްސްއިން ކުރިއަށްގެންދާ 18/30 ވިމެންސް ފުޓްސަލް ފިއެސްޓާގެ ފައިނަލުން ޗެމްޕިއަން އެމްޕީއެލްއާއި ދިވެހި ސިފައިންގެ ކްލަބް ޖާގަ ހޯދައިފިއެވެ.
އެމްޕީއެލް ފައިނަލުން ޖާގަހޯދީ ސެމީފައިނަލްގައި ޓީމް ފެނަކަ 3-2 ން ބަލިކޮށްގެންނެވެ. މެޗުގައި އެމްޕީއެލްގެ ފުރަތަމަ ދެ ލަނޑު ޖެހީ ތައިލެންޑްގެ މިސް ނަތަމޯންއެވެ. އޭނާ ދެ ލަނޑު ޖެހީ ދެ މިނެޓުގެ ތެރޭގައެވެ. ތިން ވަނަ ލަނޑު ޖެހީ ފަރަހު އަހުމަދެވެ. ފެނަކަ ޓީމްގެ ދެ ލަނޑު ވެސް ޖެހީ ރާނީ މުލްޔަސާރީއެވެ. އޭރު އެމްޕީއެލްއިން ވަނީ ތިން ލަނޑު ޖަހާފައެވެ.
ދިވެހި ސިފައިންގެ ކްލަބް ފައިނަލުން ޖާގަހޯދީ ސެމީ ފައިނަލްގައި 6-2 ން ވެމްކޯ ކްލަބް ބަލިކޮށްގެންނެވެ. މެޗުގައި ސިފައިންގެ ސަބީނާ ތިން ލަނޑު ޖެހިއެވެ. ފާތިމަތު ތީބާ ދެ ލަނޑު ޖެހިއެވެ. ފުރަތަމަ ލަނޑު ޖެހީ މަތުސުޝީމާ ސުމައްޔާއެވެ. ވެމްކޯގެ ދެ ލަނޑު ޖެހީ އައިމިނަތު އަރީޝާ އާއި ތަނަފޯން އެވެ.
ސިފައިންނާއި އެމްޕީއެލް ވާދަކުރާ ފައިނަލް މެޗު ކުޅޭނީ ނޮވެންބަރު ތިން ވަނަ ދުވަހުގެ ރެއެވެ.
