އަނިޔާވެރިކަމަކީ ދަރަންޏެއް، އޭގެ ތަކުލީފު ކޮންމެވެސް ދުވަހަކުން ތަހައްމަލު ކުރަން ޖެހޭނެ: މުފްތީ މެންކް
އެކަކު އަނެކަކަށް އޯގާތެރިވުމަށް އިރުޝާދު ދެއްވި
މުފްތީ މެންކް
އަނިޔާވެރިކަމަކީ ބޮލުގައި އެޅޭ ދަރަންޏެއް ކަމަށާއި އޭގެ ތަކުލީފު ކޮންމެވެސް ދުވަހަކުން ތިމާ ތަހައްމަލު ކުރަން ޖެހޭނެ ކަމަށް ދީނީ ޢިލްމުވެރިޔާ، އިސްމާއިލް ބިން މޫސާ (މުފްތީ މެންކު) ވިދާޅުވެއްޖެއެވެ.
މެންކް މިފަދައިން ވިދާޅުވީ "އިސްލާމްކަމާއި އޯގާތެރިކަމާއި ހިތްހެޔޮކަން" މި މައުޟޫއަށް ފުވައްމުލައް ސިޓީގައި ހޮނިހިރު ދުވަހު ދެއްވި ދަރުސްގައެވެ. އޭނާ ވިދާޅުވީ މި ޒަމާނުގައި އަމިއްލަ އާއިލާ އާ އެކު އުޅުމަށް ވެސް ގިނަ ބަޔަކު ނުރުހޭކަމަށާއި އެއީ ގިނަ މީހުންނަކީ އަނެކާގެ އިޙުސާސްތަކަށް މާބޮޑު ފަރުވާލެއް ނުބަހައްޓާ މީހުންނަށް ވާތީކަމަށެވެ. އެހެންކަމުން ތިމާއަކީ އެފަދަ މުޖުތަމައެއް ބަދަލުކޮށްލަދީ އޯގާތެރިކަމާއި އަޅާލުންދޭ މީހަކަށް ވެއްޖެނަމަ، އެ މުޖުތަމައަކީ އުފާވެރި، މުޖުތަމައަކަށް ވެގެންދާނެކަމަށެވެ.
އިސްލާމް ދީނަކީ އެކަކު އަނެކަކަށް އޯގާތެރިވުމަށް ބާރު އަޅާ ދީނެއްކަން ފާހަގަކުރައްވާ މުފްތީ މެންކު ވިދާޅުވީ އެކަން އިސްލާމްދީނުގެ ރުކުންތަކުގެ ތެރޭގައި ހިމެނޭ ޒަކާތް ދިނުމުގެ ރުކުނުން ވެސް އެނގޭ ކަމަށެވެ. އެގޮތުން، ތިމާ މީހާގެ އަތުގައި ހުންނަ އެއްޗެއް އެހެން މީހެއްގެ އަތުގައި ނެތްނަމަ، ތިމާ މީހާ އަތުގައި މާގިނައިން އެ އެއްޗެއް ހުރެއްޖެނަމަ އެ ނެތް މީހުންނަށް ދޭން އަންގަވާފައިވަނީ ހަމައެކަނި އިސްލާމް ދީނުގައި ކަމަށާއި އެއީ މުސްލިމުން އެކަކު އަނެކަކު ބާރުވެރިކުރުވުމުގެ ބޭނުމުގައި އަންގަވާފައިވާ އެންގެވުމެއް ކަމަށް މުފްތީ މެންކް ވިދާޅުވިއެވެ.
އިންސާނާގެ ޢަމަލުތައް ބިނާވަނީ ނިޔަތުގެ މައްޗަންކަން ފާހަގަކުރައްވާ މުފްތީ މެންކް ވިދާޅުވީ މީހަކަށް ހެޔޮކަމެއް ކޮށްދިނުމުން އެކަމެއް ބަލައިނުގަތަސް އެކަމާ ދެރަ ނުވުމަށެވެ. އޭގެ ބަދަލުގައި މާތްﷲ ތިމާއަށް ދެއްވަންހުރި ހެޔޮކަމާއި ދަރުމައަށް ވިސްނައި، ގިނަ ގިނައިން ﷲއަށް ދުޢާކޮށް ޙަމްދުކުރުމަށް އެދިވަޑައިގެންނެވިއެވެ.
އަބަދުވެސް އެކަކު އަނެކަކަށް އަޅާލައި، އޯގާވެރިވުމަށާއި އަދަބު އިޚްތިރާމް އަދާކުރުމަށް އެދިވަޑައިގެން ހިނިތުންވުމަކީ ވެސް ސަދަގާތެއްކަމަށް މުފްތީ މެންކް ވިދާޅުވިއެވެ. އެހެންކަމުން ގިނަ ގިނައިން ހިނިތުންވުމަށް އޭނާ ނަސޭހަތްތެރިވެވަޑައިގެންނެވިއެވެ. އަދި އެކަކު އަނެއްކަކަށް ވީވަރަކުން އެހީތެރިކަން ފޯރުކޮށްދޭން ޖެހޭ ކަމަށާއި މާލީ ގޮތުން ނުވަތަ އެ ނޫން ވެސް ގޮތަކުން އެހީތެރިކަން ފޯރުކޮށްދެވެން ނެތްނަމަ ދުޢާ ކޮށްދިނުމަކީ ވެސް އެހީއެއްކަން މުފްތީ މެންކް ފާހަގަކުރެއްވިއެވެ.
އޯގާތެރިކަމުގެ އިދިކޮޅަކީ އަނިޔާވެރިވުންކަން ފާހަގަކުރައްވައި މުފްތީ މެންކް ވިދާޅުވީ އަނިޔާވެރިވާ މީހާ އެކަމަކުން ތައުބާ ނުވާހާ ހިނދަކު އޭނާ އެ ކުރި ކަމެއް އެނބުރި އޭނާއަށް އަންނާނެ ކަމަށެވެ. އެކަން ވާނީ ކޮންއިރަކު، ކޮން ވަގުތަކުކަން ނޭނގުނު ނަމަވެސް މާތްﷲ އެފަދަ މީހަކަށް އޭގެ އަދަބު ދެއްވާނެ ކަން ފާހަގަކުރައްވާ މުފްތީ މެންކް ވަނީ ކޮންމެ މީހަކީ ވެސް އެކަކު އަނެކަކަށް އޯގާތެރިވާ ބަޔަކަށްވުމަށް އިލްތިމާސްކުރައްވާފައެވެ.
މުފްތީ މެންކް ވަނީ މާތްﷲ ލޯބިވެވޮޑިގެންވާ އަޅުންނަށް އެކަލާނގެ ކުރިމަތިކުރުވާ އިމްތިހާނުތައް ގިނަވާނެ ކަމަށާއި ނަމަވެސް އެ އިމްތިހާނުތަކަށް ކެތްކުރުމަކީ މާތްﷲ ރުއްސެވުން ލިބިގެންދާނެ ކަމެއް ކަން ވެސް ފާހަގަކުރައްވާފައެވެ.
