ހޮފެންހައިމް ބަލިކޮށް ބަޔާން މިއުނިކް ދެ ވަނައިގައި

ޖަރުމަނު ލީގުގައި ހޮފެންހައިމާ ދެކޮޅަށް ކުޅުނު މެޗުން މޮޅުވެ ޗެމްޕިއަން ބަޔާން މިއުނިކް ދެ ވަނައިގައި ހިފަހައްޓައިފިއެވެ.

ހޮނިހިރު ދުވަހުގެ ރޭ ހޮފެންހައިމްގެ ދަނޑުގައި ކުޅުނު މެޗު ބަޔާނުން ކާމިޔާބުކުރީ 2-0 އިންނެވެ.

މެޗުގައި ބަޔާންގެ ދެ ލަނޑު ވެސް ފެނުނީ ފުރަތަމަ ހާފުގައެވެ. މެޗުގެ 17 ވަނަ މިނެޓުގައި ބަޔާނަށް ލީޑު ނަގައިދިނީ ޖަމާލް މުސިއާލާއެވެ. އެއީ ބަޔާނަށް ލިބުނު ކޯނަރެއްގައި ލެއޯން ގޮރެޓްޒްކާ ނެގި ބޯޅައެއް ކުޅުންތެރިޔެއްގެ ގައިގަ ޖެހިފައި އޭނާ އަށް ލިބުމުން ގޯލުގެ އަރިމަތީ ދާގަނޑަށް ފޮނުވާލައިގެން އޭނާ ކާމިޔާބުކުރި ލަނޑެކެވެ.

ފުރަތަމަ ހާފު ނިމުމުގެ ކުރިން ބަޔާންގެ ދެ ވަނަ ލަނޑު ޖެހީ ޗޮޕޫ މޯޓިންއެވެ. އެއީ މެޗުގެ 38 ވަނަ މިނެޓުގައި ސާޖް ގްނަބްރީ ހުރަސްކޮށްދިން ބޯޅައެއް ހޮފެންހަމްގެ އޭރިޔާ ތެރޭ ހުރެ ގޯލަށް ފޮނުވާލައިގެން އޭނާ ކާމިޔާބުކުރި ލަނޑެވެ.

މެޗުން މޮޅުވެ ބަޔާން ދެ ވަނައިގައި އޮތީ 11 މެޗުން 22 ޕޮއިންޓާއެކުއެވެ. އެއް ވަނައިގައި އޮތް ޔޫނިއަން ބާލިންއާ ބަޔާނާ ދެމެދު އޮތީ ޕޮއިންޓެއްގެ ފަރަގެވެ. ބަޔާނަށްވުރެ އެއް މެޗު މަދުން ކުޅެ ޔޫނިއަން ބާލިން އަށް ލިބެނީ 23 ޕޮއިންޓެވެ. ނަމަވެސް ލީގުގައި އާދިއްތަ ދުވަހުގެ ރޭ ބޮކުމް ބަލިކޮށްގެން އެ ޓީމަށް ލީޑު ނެގޭނެއެވެ.