ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ)، ވިލިމާލެ ފަރަށް އެރި މައްސަލައިގައި ބްރިޖުގެ މަސައްކަތް ކުރަމުންދާ އެފްކޮންސް ކުންފުންޏާ މެދު ވަކި ޚާއްސަ އުސޫލަކުން އަމަލުކޮށްފައި ނުވާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

ބުރާސްފަތި ދުވަހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މި މައްސަލައިގައި ބޮޑެތި ގެއްލުންތަކެއް ވެފައި ވާއިރު އެފްކޮންސް އާ މެދު ފިޔަވަޅު ނާޅާ ލަސްވަނީ ކީއްވެތޯ ސުވާލު އުފައްދާފައެވެ. އަދި އެންވައިރޮމެންޓް ޕްރޮޓެކްޝަން އެޖެންސީ (އީޕީއޭ)އިން މި މައްސަލައިގައި އެކުލަވާލި ރިޕޯޓު ބަލައި ނުގަނެ، އެފްކޮންސް އިން ވަނީ އަމިއްލަ އަށް ދިރާސާ އެއް ކުރުމަށް އެދިފައެވެ. އެ ދިރާސާ އަށް ދިން މުއްދަތު މިހާރު ހަމަވެފައިވާތީ އެފްކޮންސް އަށް އެހާ ގިނަ ފުރުސަތުތަކެއް ލިބެނީ ކީއްވެތޯ އެ ނޫސްވެރިޔާ ވަނީ ސުވާލުކޮށްފައެވެ.

އެކަމާއި ގުޅިގެން މިއުވާން ވިދާޅުވީ އެފްކޮންސް އާ މެދު ތަފާތުކުރުމެއް ސަރުކާރުން ނުގެންގުޅޭ ކަަމަށެވެ. އަދި އެ މައްސަލައިގައި އީޕީއޭ އިން ބަލަން ޖެހޭ ކަންކަން ބެލުމަށް ފަހު ފިޔަވަޅު އެޅުމުގެ ފުރިހަަމަ އިޚްތިޔާރު އެ އިދާރާ އަށް އޮންނާނެ ކަމަށެވެ.

އެފްކޮންސް އަށް ދިރާސާކުރަން ދިން މުއްދަތުގައި އެ މަސައްކަތް ކުރިއަށް ނުގޮސް ވަނީ މޫސުން ގޯސްވުމުން ކަމަށް އެ ކުންފުނިން ބުނެފައިވާ ކަމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އިން ވަނީ މީގެ ކުރިން ބުނެފައެވެ.

ޕްލެޓްފޯމް ފުންކޮށްފައިވަނީ އޮގަސްޓް މަހުގެ 28 ވަނަ ދުވަހު، ފަރަށް އެރިތާ 12 ދުވަސް ފަހުންނެވެ. ބްރިޖުގެ މަޝްރޫއު ހިންގަމުން އަންނަ އިންޑިއާގެ އެފްކޮންސް ކުންފުނިން ކުރިން ބުނީ، ޕްލެޓްފޯމް ފުންނުކުރެވި ލަސްވީ މޫސުން ގޯސްވުމުގެ ސަބަބުން ކަމަށެވެ. އަދި ޕްލެޓްފޯމް ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑުވުމުގެ ސަބަބުން ކަމަށާއި، އެ ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށް ކަމަށް ވެސް އެ ކުންފުނިން ބުނެފައިވެއެވެ.