ޤައުމީ ހޭންޑްބޯޅަ މުބާރާތުގެ އަންހެން ޑިވިޝަންގައި 15 ޓީމް، ފިރިހެން ޑިވިޝަންގައި 8 ޓީމް

އަންހެން ޑިވިޝަންގައި 15 އަދި ފިރިހެން ޑިވިޝަންގައި 8 ޓީމާއެކު ޤައުމީ ހޭންޑްބޯޅަ މުބާރާތް ފަށައިފިއެވެ.

މޫސުން ގޯސްވުމުގެ ސަބަބުން ފަށަން ތާވަލްކުރި ދުވަހަށްވުރެ ދެދުވަސް ފަހުން, މުބާރާތް ފެށީ މިމަހުގެ 17 ވަނަ ދުވަހުއެވެ. ފުރަތަމަ މެޗުގައި ފިރިހެން ޑިވިޝަންގެ ފުލިދޫ ޔޫތް ސްޕޯރޓްސް ކްލަބުން ވަނީ 50-15 ން ހުޅުމާލެ ސްޕޯރޓްސް ކްލަބް ބަލިކޮށްފައެވެ. ފިރިހެން ޑިވިޝަންގެ ދެވަނަ މެޗު ކާމިޔާބުކުރީ ފިއުޗަރ ސްޕޯރޓްސް އެކަޑަމީއެވެ. އެއީ ޕާރލްސް ސްޕޯރޓްސް ކްލަބާ ވާދަކޮށް 68-14 ނެވެ. ފިރިހެން ޑިވިޝަންގެ އަށް ޓީމް ބަހާލާފައިވަނީ ދެ ގްރޫޕަށެވެ.

އަންހެން ޑިވިޝަންގެ ފުރަތަމަ މެޗުގައި އިސްލެނޯ ސްޕޯރޓްސް ކްލަބުން ވަނީ 38-10 ން ހުޅުމާލެ ސްޕޯރޓްސް ކްލަބް ބަލިކޮށްފައެވެ. އަންހެން ޑިވިޝަންގެ ދެވަނަ މެޗު ކީން ސްޕޯރޓްސް ކްލަބުން ކާމިޔާބުކުރީ ކުދަހުވަދޫ ޒުވާނުންގެ ޖަމްއިއްޔާއާ ވާދަކޮށް 33-2 ނެވެ. ތިންވަނަ މެޗު ފުލިދޫ ޔޫތް ސްޕޯރޓްސް ކްލަބާ ވާދަކޮށް 40-5 ން ކާމިޔާބުކުރީ އޮރިކްސް ހޭންޑްބޯލް ކްލަބެވެ. އަންހެން ޑިވިޝަންގެ ހަތަރު ވަނަ މެޗު ކްލަބް ޒެފްރޯލްއާ ވާދަކޮށް ކާމިޔާބުކުރީ ރެޑްހޯކްސް ސްޕޯރޓްސް ކްލަބެވެ. އަންހެން ޑިވިޝަންގެ 15 ޓީމް ވަނީ ހަތަރު ގްރޫޕަށް ބަހާލާފައެވެ.