ސްޓެލްކޯއިން މާލެ ސަރަހައްދަށް ކަރަންޓް ދޭން އަގު ނަގާ ރޭޓާއި ފެނަކަ ކޯޕަރޭޝަނުން ރާއްޖޭގެ އެހެން ރަށްރަށުގައި ކަރަންޓަށް އަގުނަގާ ރޭޓް ހަމަހަމަކުރާނަމަ، ސަރުކާރުން ދޭ ސަބްސިޑީއާ ނުލައި ކުންފުނިތަކަށް އެކަށީގެންވާ ގޮތަށް ޚިދުމަތް ނުދެވޭނެކަމަށް ކުންފުނިތަކުން ފާހަގަކޮށްފައިވާކަމަށް، ރައްޔިތުންގެ މަޖިލީހުގެ ސްޓޭޓް އޯންޑް އެންޓަރްޕްރައިޒިސް ކޮމިޓީގެ މުގައްރިރު، އަދި ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވެއްޖެއެވެ.

ހޯމަ ދުވަހު ސްޓޭޓް އިލެކްޓްރިކް ކޮމްޕެނީ ލިމިޓެޑާއި ފެނަކަ ކޯޕަރޭޝަން ލިމިޓެޑުން ކަރަންޓްގެ ޚިދުމަތް ފޯރުކޮށްދެމުން ގެންދާ ރަށްރަށާއި، ގްރޭޓަރ މާލެ ސަރަހައްދުގައި ވިޔަފާރިތަކަށް ބިލުކުރަމުންދާ ރޭޓާއި ބޭންޑްކުރުންތަކުގައި ގެންގުޅޭ ތަފާތުކުރުންތައް ނައްތާލައި، ބޭންޑާއި ރޭޓް ހަމަހަމަކުރުމަށް ގޮވާލައި އެކަން ސަރުކާރުގެ ސަމާލުކަމަށް ގެނައުމަށް ހުށަހަޅާ ގަރާރަށް މަޝްވަރާކުރަން ކުރިއަށް ގެންދިޔަ ބައްދަލުވުމުގައި އިލްޔާސް ވަނީ، އެކަމާގުޅިގެން ކުންފުނިތަކުގެ ބޮޑު ކަންބޮޑުވުންތަކެއް ހުރިކަން ފާހަގަކުރައްވާފައެވެ. ޓެރިފަށް ގެންނަ ބަދަލުގެ ސަބަބުން ރެވެނިއު ކޮސްޓެއް އައިސްފިނަމަ، ސަބްސިޑީއަށް ބަރޯސާނުވެ ކުންފުނިތައް ހިންގުމަށް ދަތިވާނެކަމަށް އެ ކުންފުނިތަކުން ވަނީ ފާހަގަކޮށްފައިކަމަށް އޭނާ ވިދާޅުވިއެވެ. އެގޮތުން މި އަހަރުގެ ނިޔަލަށް ދެ ބިލިއަނާ ގާތްކުރާ އަދަދަކަށް ކަރަންޓުގެ ޚިދުމަތުގެ ސަބްސިޑީގެ ގޮތުގައި ސަރުކާރުން ޚަރަދުކުރަން ޖެހޭ ކަމަށް ބެލެވިފައިވާކަން ފާހަގަކޮށްލެވެއެވެ.

މާލެއާއި ރަށްރަށުގެ ޓެރިފް ރޭޓް ހަމަހަމަކުރުމަށް ގޮންޖެހުންތައް އިތުރުކުރާނަ،މަ އިތުރަށް ސަބްސިޑައިޒް ކުރަންޖެހޭކަމަށާއި، މި މައްސަލަ ހައްލުކުރުމަށް ސޯލާ ޕެނަލް ހަރުކުރުމުގެ މަސައްކަތް ކުރަންޖެހޭއިރު، އެކަމަށް މާލީ އެހީތެރިކަން ބޭނުންވާކަމަށް ކުންފުނިތަކުން ފާހަގަކޮށްފައިވާކަމަށް އޭނާ ވިދާޅުވިއެވެ.

ރައްޔިތުންގެ މަޖިލީހަށް މިފަދަ ގަރާރެއް ހުށަހަޅާފައިވަނީ، ފެނަކަ ކޯޕަރޭޝަނުން ހިދުމަތް ދޭ ރަށްރަށުގައި ވިޔަފާރިތަކުން ބޭނުންކުރާ ކަރަންޓަށް ބިލުކުރާ ރޭޓް ބޮޑުކަމުންނާއި، އެކަމުގައި މާލެއާ އެ ރަށްރަށާ ތަފާތުކުރާކަމުގެ ޝަކުވާ ވިޔަފާރިކުރާ ފަރާތްތަަކުން ކުރާކަމަށް ފާހަަގަކޮށްފައެވެ. މަޖިލީހަށް ހުށަހެޅި ގަރާރުގައިވާ އަގު ލިސްޓް ބުނާގޮތުންނަމަ، 200 ޔުނިޓާ 300 ޔުނިޓާ ދެމެދުގެ މިންވަރަކަށް ކަރަންޓް ބޭނުންކުރާނަމަ މާލޭގައި ނަގަނީ ޔުނިޓަކަށް 3.65 ލާރިއެވެ. އަދި ފެނަކައިން ކަރަންޓް ދޭ ރަށްރަށުގައި ނަގަނީ 6 ރުފިޔާ ކަމަށް ވާއިރު، ފެނަކައިން 100 ޔުނިޓާ 200 ޔުނިޓާ ދެމެދުގެ ބޭންޑަށް 3.75 ރުފިޔާ ނަގާއިރު، މާލޭގައި ނަގަނީ 3.35 ރުފިޔާއެވެ.