އިތުރު ތަޢާރަފަކަށް ބޭނުން ނުވާ ޑޮނާލްޑް ޓްރަމްޕްގެ ނަންފުޅު، އެމެރިކާގެ ތާރީޚުގައި ލިޔެވިގެން ދަނީ ހައުސް އޮފް ރެޕްރެޒެންޓޭޓިވްސްއިން 2 ފަހަރަށް ޢަޒުލު ކުރި ފުރަތަމަ ރައީސްގެ ގޮތުގައެވެ. 

ނޮވެމްބަރު 2020ގެ އިންތިޚާބުގައި، އަދުގެ ރައީސް ޖޯ ބައިޑަންގެ މައްޗަށް ކުރި ހޯއްދެވުމަށް ފެއިލްވެވަޑައިގެން، ފާއިތުވީ 18 މަހެއްހާ ދުވަސް ޓްރަމްޕް ހޭދަ ކުރެއްވީ އިންތިޚާބު އޮޅުވާލާފައި ވާ ކަމުގެ އިލްޒާމުތަކުގެ ޝަކުވާތަކައިގެން ކަމުގައި ވީ ނަމަވެސް، ކުރިއަށް އޮތް 2024 ގެ ރިޔާސީ ރޭހުގައި އަނެއްކާވެސް ޓްރަމްޕް ވާދަ ކުރައްވާނެ ކަން، މިހާރު މި ވަނީ ޔަޤީނާ ގާތަށް ކަށަވަރު ކުރެވޭ ވަރު ވެފައެވެ. 

ވޮޝިންގްޓަން ޑީސީ ދޫކުރައްވާ، ފްލޮރިޑާގެ މާރްއަލާގޯ އެސްޓޭޓަށް ވަޑައިގެންނެވި ފަހުންވެސް ފަންޑްރެއިސް ކުރެއްވުމުގެ މަސައްކަތްޕުޅަށް ޓްރަމްޕް މަޑުޖެހުމެއް ގެންނަވާފައެއް ނުވެއެވެ. 

ފަންޑުގެ އަގު މިހާރުވެސް 100 މިލިއަން ޑޮލަރަށް ވުރެ މައްޗަށް އަރާފައި ވާ އިރު، އެ ފައިސާއަކީ، ޓްރަމްޕްގެ ދޮގު އިލްޒާމްތަކަށް ނުހެއްލުނު އިތުރު މެންބަރުންގެ ތާޢީދު ގަނެވޭނެ މިންވަރެއް ކަމަށް ބަހުސް ކުރެވެއެވެ. 

މިޑް-ޓަރމް އިންތިޚާބުތައް ބޯމަތިވެފައި ވަނިކޮށް، ޓްރަމްޕްގެ ރުހުން އޮންނަ މެންބަރުންނަށް ތާޢީދު ހޯއްދެއްވުމަށް ހަރަކާތްތެރިކަމާއެކު ކެމްޕޭން ކުރައްވާފައި ވާ އިރު، އަނެއްކާވެސް ބައިޑަންއާ ކުރިމަތިލައްވާ، ބަދަލު ހިއްޕަވާނެ ކަމުގެ އިޝާރާތްތަކެއްވެސް ޓްރަމްޕް ވަނީ ދެއްވާފައެވެ. 

ވީ އިރު، ޓްރަމްޕްގެ އުއްމީދީ ރޭހަށް އެޅިދާނެ ހުރަހެއް އެބައޮތްތޯއެވެ؟

ވެރިކަމުގެ 2 ވަނަ ދަޢުރަކަށް ކުރިމަތިލެއްވުމުގެ ފުރުޞަތު ޓްރަމްޕަށް ހުޅުވިގެން ދިޔައީ، 2 ވަނަ ފަހަރަށް ޓްރަމްޕް ޢަޒުލު ކުރުމަށް ސެނެޓްގައި ކުރިއަށް ގެންދިޔަ އަޑުއެހުމުގައި، ޓްރަމްޕާ ދެކޮޅަށް މަސައްލަ ނިންމޭ ގޮތް ނުވުމުން، ފެބްރުއަރީ 2021 ގައެވެ. އެއީ އެމެރިކާގެ ތާރީޚުގައިވެސް ރައީސްއަކު ޢަޒުލު ކުރުމަށް ހިންގި އެންމެ ކުރު އަޑުއެހުން ވެސްމެއެވެ. 

ސެނެޓުން ޓްރަމްޕާ ދެކޮޅަށް މައްސަލަ ނިންމި ނަމަ، ދެން ދުވަހަކުވެސް އެމެރިކާގެ ރިޔާސީ ރޭހެއްގައި ޓްރަމްޕަކަށް ވާދައެއް ނުކުރެއްވޭނެއެވެ. ނަމަވެސް ޓްރަމްޕާ ދެކޮޅަށް ވޯޓު ދެއްވީ 7 ރިޕަބްލިކަން މެންބަރުންނާއި 50 ޑިމޮކްރޭޓުންނެވެ. ޢަޒުލު ކުރުމަށް ބޭނުންވި 3 ބައިކުޅަ 2 ބައި އަޣުލަބިއްޔަތު ނުލިބިއެވެ. އިންތިޚާބީއޮއެވަރަކަށްވުރެބޮޑަށް ރިޔާސީ ރޭހުގެ ރާސްތާގައި ޓްރަމްޕަށް އޮތް އެންމެ ބޮޑު ހުރަހަކީ ޝަރުޢީ ޢިމުގެ ތެރެއިން އެޅޭ ހުރަހަކަށް ވެދާނެއެވެ. 

ޓްރަމްޕާ ދެކޮޅަށް ޝަރިއަތްތަކެއް ކުރިއަށް ދާއިރު، އެއީ ސީރިއަސް މައްސަލަތަކެކެވެ. ދަޢުލަތުގެ ސިއްރު ލިޔެކިއުންތަކެއްގެ ޚިޔާނާތުގެ މައްސަލައިގެ އިތުރުން ޓެކްސަށް މަކަރު ހެއްދެވި ކަމުގެ މައްސަލަވެސް އެބައޮތެވެ. ޓްރަމްޕާ ދެކޮޅަށް ހުރި ދަޢުވާތަކުގެ ލިސްޓަށް ބަލާއިރު، ޢަބުރުގެ ދަޢުވާވެސް ހިމެނެއެވެ. 

ކަން މިހާރު ހިނގަމުން ދާ ގޮތަށް ދާ ނަމަ، ރައީސް ކަމަށް އަލުން ކުރިމަތިލެއްވުމުގެ ފުރުޞަތު، އަދިވެސް ޓްރަމްޕަށް އެބަ އޮތެވެ. ޖިނާއީ ކުށެއް ސާބިތުވެއްޖެނަމަހީވެސްމެއެވެ. ޖަލުގައި ތިބެގެންވެސް 3 ކެންޑިޑޭޓަކު ވަނީ އެމެރިކާގެ ރިޔާސީ ރޭހުގައި ވާދަކޮށްފައެވެ. 

އެމެރިކާގެ ތާރީޚަށް ބަލާއިރު، ރިޔާސީ ރޭހެއްގައި ވާދަ ކުރުން ދާއިމަށް މަނާ ކޮށްފައި ވަނީ 3 އިންތިޚާބީ އޮފިޝެލެކެވެ. އެއީ ކުރީގެ ފެޑެރަލް ޖަޖުން ކަމުގައިވާ ވެސްޓް ހަމްފްރީޒް، ރޮބަރޓް އަރޗިބޯލްޑް އަދި ޓޮމަސް ޕޯޓިއަސްއެވެ.

ޓްރަމަޕަކީ އެއްވެސް ހާލެއްގައި ސިޔާސީ ޝަރީއަތެއްގެ ޝިކާރައެއް ނޫނެވެ. އެމެރިކާގައި ތަންފީޒު ކުރަމުން ދާ ޤާނޫނުގެ އަސާސްއަކީ އެއްވެސް މީހަކީ ޤާނޫނަށް ވުރެ މަތީގައި ހުރިމީހެއް ނޫން ކަމުގެ ފަލްސަފާއެވެ. ރައީސް އަކަށް ވިއަސް، ނުވަތަ ކުރީގެ ރައީސްއަކަށްވެސްއެކަން އޮތީ އެހެނެވެ. 

އެމެރިކާގެ ރިޔާސީ ރޭހަށް 2 އަހަރު ދުވަސް އަދި އޮތް އިރު، ރޭހުގެ މައިދާނަށް ޓްރަމްޕަށް ނުކުންނެވޭނީ ޕާޓީގެ ތާއީދުވެސް ކަށަވަރު ކުރައްވައިގެންނެވެ. އެކަންވެސް ވުން ގާތެވެ. މާޗް މަހު ކުރިއަށް ގެންދިޔަ ޚިޔާލު ހޯދުމުގެ ސާވޭއެއްގެ ނަތީޖާއަށް ބަލާއިރު 56 ޕަސެންޓް މީހުން ވަނީ ޓްރަމްޕަށް 2 ވަނަ ދައުރެއް ދޭނެ ކަމަށް އިޝާރާތް ކޮށްފައެވެ. އެއީ ނޮވެމްބަރު 2020 ގެ އިންތިހާބަށް ފަހު، މި ޢަދަދު މިހާ މައްޗަށްވެސް އެރި ފުރަތަމަ ފަހަރެވެ.