މުފްތީ މެންކުގެ ދަރުސްތަކުގައި އާންމުންގެ ސުވާލުތަކަށް ހުޅުވައެއް ނުލާނެ

މަޝްހޫރު ދީނީ އިލްމުވެރިޔާ އިސްމާއީލް ބިން މޫސާ (މުފްތީ މެންކް) މިމަހު ރާއްޖެ ވަޑައިގެން ދެއްވާ ދަރުސްތަކުގައި އާންމުންގެ ސުވާލުތަކަށް ހުޅުވައެއް ނުލާނެ ކަމަށް އިސްލާމިކް މިނިސްޓްރީން ބުނެފިއެވެ.

މުފްތީ މެންކު ރާއްޖެއަށް ކުރައްވާ ދަތުރުފުޅާ ގުޅޭ މައުލޫމާތު ހިއްސާކުރެއްވުމަށް ހޮނިހިރު ދުވަހުގެރޭ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އިސްލާމިކް މިނިސްޓްރީގެ މީޑިއާ ކޯޑިނޭޓަރު އިސްމާއިލް އަފްރާހު ވަނީ މިމަހުގެ 28 އިން 31 އަށް މުފްތީ މެންކު ރާއްޖެއަށް ކުރައްވާ ދަތުރުފުޅުގައި 4 ތަނެއްގައި ދަރުސް ދެއްވަން ހަމަޖެހިފައިވާކަން ފާހަގަކުރައްވާފައެވެ. 28 ވަނަ ދުވަހުގެރޭ އަލިމަސް ކާނިވަލުގައި ދަރުސް ދެއްވާއިރު، 29 ވަނަ ދުވަހުގެރޭ ފުވައްމުލަކު ސިޓީގައި، 30 ވަނަ ދުވަހުގެރޭ އައްޑޫ ސިޓީގައި އަދި 31 ވަނަ ދުވަހުގެރޭ ހުޅުމާލޭގައި ދަރުސް ދެއްވަން ވަނީ ހަމަޖެހިފައެވެ.

އަފްރާހު ވިދާޅުވީ ދަރުސްތައް ކުރިއަސްދާނީ ވަކި މައުޟޫއަކަށް ވާހަކަދައްކަވާ ގޮތަށް ކަމަށެވެ. އެހެންނަމަވެސް ދަރުސް ކުރިއަށްދާނީ ސުވާލު ކުރެވޭ ގޮތަކަށް ނޫން ކަމަށާއި، ދަރުސްތަކުގައި އާންމުންނަށް ބޭނުންވާ މުހިންމު މައުލޫމާތުތައް ގެނެސްދެެވިގެންދާނެ ކަމަށް އޭނާ ވިދާޅުވިއެވެ.

މިއީ މުފްތީ މެންކު ރާއްޖެއަށް ކުރައްވާ މިފަދަ ތިންވަނަ ދަތުރުފުޅެވެ. މުފްތީ މެންކު އެންމެފަހުން ރާއްޖެ ވަޑައިގަތީ 2020 ވަނަ އަހަރުއެވެ. އެ ދަތުރުފުޅުގައި ދަރުސް ދެއްވީ ހދ. ކުޅުދުއްފުށީގައެވެ.