މިހާރު އެއްވެސް ކައުންސިލެއްގެ ބްލޮކް ގްރާންޓް ފައިސާ ހިފަހައްޓާފައެއް ނުހުންނާނެ: މިނިސްޓަރ އަމީރު
ބްލޮކް ގްރާންޓް ހިފެހެއްޓުމުން ވަރަށް ގިނަ ކައުންސިލްތަކުން ކަރަންޓް ބިލް ދައްކަމުންދޭ
ފިނޭންސް މިނިސްޓަރއިބްރާހިމް އަމީރު
މިހާރު އެއްވެސް ކައުންސިލެއްގެ ބްލޮކް ގްރާންޓް ފައިސާ ހިފަހައްޓާފައިނުވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ބައެއް ކައުންސިލްތަކުން ވަނީ ފިނޭންސް މިނިސްޓްރީން އެކައުންސިލްތަކުގެ ބްލޮކް ގްރާންޓް ހިފެހެއްޓުމުން މީގެކުރިން އެކަމުގެ ކަންބޮޑުވުން ފާޅުކޮށްފައެވެ. އަދި އޭރު ފިނޭންސް މިނިސްޓްރީން ބުނީ ކައުންސިލްތަކުގެ ބްލޮކް ގްރާންޓް ހިފަހައްޓާފައިވަނީ އެތައް މަސްތަކެއް ވަންދެން ކަރަންޓް ބިލްތައް ނުދައްކާ އޮތުމުގެ ސަބަބުން ކަމަށެވެ.
ބުރާސްފަތި ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަމީރު ވިދާޅުވީ ބްލޮކް ގްރާންޓް ހިފެހެއްޓުމުން ވަރަށް ގިނަ ކައުންސިލްތަކުން ކަރަންޓް ބިލް ދައްކަމުންދާ ކަމަށެވެ. އެހެންނަމަވެސް މިހާރު އެއްވެސް ކައުންސިލެއްގެ ބްލޮކް ގްރާންޓް ހިފަހައްޓާފައިނުވާ ކަމަށް ވިދާޅުވިއެވެ.
ކައުންސިލްތަކުން ފެނަކައާއެކު އެއްބަސްވުމަކަށް އައުމުން ވެސް ބައެއް ކައުންސިލްތަކުގެ ބްލޮކް ގްރާންޓް ދޫކޮށްފައިވާ ކަމަށް ވެސް ވިދާޅުވިއެވެ.
ފިނޭންސް މިނިސްޓަރ މިހެން ވިދާޅުވެފައިވާއިރު ކައުންސިލްތަކަށް ގްރާންޓްގެ ގޮތުގައި މިހާރު ދެމުން އަންނަ ފައިސާ ބަހާގޮތަށް ބަދަލު ގެންނަން ފެންނަކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ ވިއަވަތި ކޮންފަރެންސް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ވިދާޅުވެފައެވެ.
މާލީ ގޮތުން ރަށްރަށާއި ރައްޔިތުން ބާރުވެރިކުރުވުމަކީ އެންމެ ބޮޑު އިސްކަމެއް ދޭންޖެހޭ އެއް ކަންތައް ކަމަށާއި، ކޮންމެ ރަށެއްގައި ހުރިނަމަވެސް ބޭނުންވާ އަސާސީ ޚިދުމަތްތައް ހަމަހަމަގޮތެއްގައި ލިބެންޖެހޭނެކަމަށް ރައީސް ވިދާޅުވިއެވެ.
ރައީސް ވިދާޅުވީ، ރަށްތައް އުފެދިފައި ހުންނަ ގޮތުގެ ސަބަބުން ހުންނަ މައްސަލަތައް ހައްލުކުރުމަށްވެސް މަސައްކަތްކުރަންޖެހޭ ކަމަށެވެ. އެހެންވެ، ކޮންމެ ރަށަކަށް ހަމަހަމަކޮށް ފައިސާ ދިނުމަކީ އިންސާފެއް ނޫންކަމަށް ގަބޫލުފުޅުކުރައްވާ ކަމަށްވެސް އެމަނިކުފާނު ވިދާޅުވިއެވެ.
ރައީސް އިތުރަށް ވިދާޅުވީ، ސިޓީތަކަށް ފައިސާ ދިނުމުގައިވެސް ބަލަންޖެހޭ ކަންކަން އެބަހުރިކަމަށެވެ. އެގޮތުން، މާލެ ސިޓީ ކައުންސިލް ވަކިކުރުމަށްފަހު ބާކީހުރި ސިޓީތަކަށް ވަކިގޮތަކަށް ފައިސާ ބެހުމުގެ އުސޫލެއް ކަނޑައެޅުމަށް ހުށަހަޅާފައިވާކަމަށާއި، އެއީ ރަނގަޅު ވިސްނުމެއްކަމަށް ގަބޫލުފުޅުކުރައްވާ ކަމަށް ވިދާޅުވިއެވެ.
ސިޓީ ކައުންސިލްތަކަށް ގްރާންޓް ދިނުމުގެ އުސޫލަށް ބަދަލު ގެންނައިރު، ވަކި ރަށްތައް ހިމެނޭހެން ހުރި ސިޓީތަކާއި ގިނަ ރަށްތައް އެކުވެފައިވާ ސިޓީތަކަށް ފައިސާ ދިނުމުގައިވެސް ތަފާތުކުރުންތަކެއް ގެންގުޅެންޖެހޭކަމަށް ރައީސް ވިދާޅުވިއެވެ.
ކައުންސިލްތަކަށް މިހާރު ހަމަހަމައަށް ގްރާންޓް ދޭތީ ބައެއް ދަތިތައް ހުރިކަން ކައުންސިލްތަކުން ވަނީ ފާހަގަކޮށްފައެވެ. އެގޮތުން، މާލެ ސިޓީގައި ދައުލަތުން ދޭ ބައެއް ޚިދުމަތްތައް ރަށްރަށުގައި ދެމުން އަންނަނީ ކައުންސިލްތަކުގެ ދަށުން ކަމަށްވުމާއެކު، ޚަރަދުތައް އިތުރުވާކަމަށާއި ގްރާންޓް ދިނުމުގައި އެފަދަ ކަންކަމަށް ރިއާޔަތްކުރުމަށް ކައުންސިލްތަކުން ވަނީ އެދިފައެވެ.
މީގެ އިތުރުން ކައުންސިލްތަކުގެ ދަށަށް ޚިދުމަތްތައް ބަދަލުކުރާއިރު އެ ޚިދުމަތަކަށްވާ ބަޖެޓުވެސް ކައުންސިލްތަކަށް ދިނުމަށް ގިނަ ކައުންސިލްތަކަކުން އެދެއެވެ.
