ބައިނަލްއަގްވާމީ ކްރެޑިޓް ރޭޓިންގ އިދާރާއެއްކަމަށްވާ ފިޗްއިން ރާއްޖޭގެ ރޭޓިންގ އެއްހަމައެއްގައި (ބީ ނެގެޓިވް)ގައި ދަމަހައްޓައިފިއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ފިނޭންސް މިނިސްޓަރު އިބްރާހީމް އަމީރު ވިދާޅުވީ، ދުނިޔޭގެ އިގުތިސާދީ އައުޓްލުކް ނެގެޓިވްކޮށް އޮތުމުން ރާއްޖޭގެ އިގުތިސާދީ އައުޓްލުކްވެސް ނެގެޓިވް ވެފައިވާކަމަށެވެ.

އެންމެ ފަހުން މިދިޔަ އަހަރުގެ އޮކްޓޯބަރު މަހު ފިޗުން ރާއްޖޭގެ ކްރެޑިޓް ރޭޓިންގ ބީ ނެގެޓިވްއަށް ބަދަލުކުރުމުގެކުރިން، ރާއްޖޭގެ ރޭޓިން ހުރި ސީސީސީގައެވެ.

މިދިޔަ އަހަރު ރާއްޖޭގެ ރޭޓިންގ ބީ ނެގެޓިވްއަށް މަތިކުރީ އެ އިދާރާއިން ރާއްޖޭގެ އިގުތިސާދީ ހާލަތު އޮންނާނެ ގޮތް ލަފާކުރި ވަރަށްވުރެ އިތުރަށް އިގްތިސާދު ރަނގަޅުވެފައިވާތީކަމަށް ފިޗުން ބުނެފައިފައިވެއެވެ.

އެގޮތުން ކޮވިޑާއެކު ރާއްޖޭގެ ފަތުރުވެރިކަން ވަޅުޖެހިފައި އޮތުމަށްފަހު ލަފާކުރި މިންވަރަށްވުރެވެސް އަވަސް މިނެއްގައި ކުރިއަރައިގެން ގޮސްފައިވާ ކަމަށް ފިޗުގެ ރިޕޯޓުގައިވެއެވެ.

ފިޗް ރޭޓިންސް ކުންފުންޏަކީ ދުނިޔޭގެ އެންމެ ބޮޑު ތިން ކްރެޑިޓް ރޭންކިންގ އެޖެންސީގެ ތެރެއިން އެއް އެޖެންސީއެވެ.

ކްރެޑިޓް ރޭޓިންގ އަކީ އިންވެސްޓަރުންނަށް އެމީހުންގެ އިންވެސްޓުމެންޓުގެ ފައިދާ ނެގޭނެ މިންވަރާއި އެ ގައުމެއްގެ ދަރަނި އަދާކުރުމުގެ ގާބިލުކަން ހުރި މިންވަރު އަންދާޒާކުރެވޭ އިންޑިކޭޓަރއެކެވެ.

މިނިސްޓަރު އަމީރު ވިދާޅުވީ، 2021 ވަނަ އަހަރު ރާއްޖޭގެ އިގުތިސާދު 37 އިންސައްތައަށް ކުރިއަރާނެކަމަށް ބެލެވުނުނަމަވެސް، އިގުތިސާދު 41.7 އިންސައްތައިން އިތުރުވެފައިވާކަމަށެވެ. އަދި 2022 ވަނަ އަހަރު އަންދާޒާކުރަނީ 13 ޕަސަންޓްގެ މޮޑަރޭޓް ކޭސްއެއްގައި އިގުތިސާދު ކުރިއަރައިގެން ދާނެކަމަށްވެސް ވިދާޅުވިއެވެ.

ދުނިޔޭގެ ބާޒާރުގައި ތެލުގެ އަގު އުފުލިގެން ދިޔުމުން ނުރަނގަޅު އަސަރުތަކެއް ކުރާކަމަށާއި، ރަޝިޔާ–ޔޫކްރެއިން ހަނގުރާމަ ދިގުލައިގެން ދިއުމާގުޅިގެން، ކާބޯތަކެތީގެ އަގު އުފުލިގެން ދާނެކަމަށްވެސް ވިދާޅުވިއެވެ.

އައިއެމްއެފްގެ ވޯރލްޑް އިކޮނޮމިކް އައުޓްލުކް އާންމުކޮށްފައިވާ ދުނިޔޭގެ އިގުތިސާދު ކުރިއަރާ މިންވަރު ވަރަށް ބޮޑަށް ޑައުންގްރޭޑް ކޮށްފައިވާ ކަމަށާއި އޭގެ ތެރެއިން ނުސީދާ އަސަރު ފަތުރުވެރިކަމުގެ ސިނާއަތަށް ކުރާނެކަންވެސް ފާހަގަކުރެއްވިއެވެ.