މިއަހަރު ރާއްޖޭގައި ބާއްވާ ބައިނަލްއަޤުވާމީ ހަ ވަނަ މުބާރާތް ބުރާސްފަތި ދުވަހު ފަށަނީ
11 އޮކްޓޯބަރު 2022 | އަންގާރަ 07:49މި ޓުވަރގައި 28 ޤައުމަކުން ދުނިޔޭގެ ފެންވަރުގެ 80 ކުޅުންތެރިން ބައިވެރިވާނެ
ބީޗު ވޮލީ ޓުވަރގެ ތައްޔާރީތަކުގެ ތެރެއިން
ރާއްޖޭގައި މިއަހަރު ބާއްވާ ބައިނަލްއަޤުވާމީ ހަ ވަނަ މުބާރާތް އަންނަ ބުރާސްފަތު ދުވަހު ފަށާނެއެވެ.
ބުރާސްފަތި ދުވަހު ރާއްޖޭގައި ފެށުމަށް ހަމަޖެހިފައިވަނީ ދުނިޔޭގެ ވޮލީ ބޯޅަ މައި އިދާރާ (އެފްއައިވީބީ) ބީޗް ވޮލީ ޓުވަރއެވެ. މިއީ މިއަހަރު ރާއްޖެއިން ބާއްވާ ބައިނަލްއަޤުވާމީ ހަ ވަނަ މުބާރާތެވެ. މިއަހަރު ރާއްޖެއިން ވަނީ ޓޭބަލް ޓެނިސް (ޓީޓީ)، ޗެސް، ބޮޑީ ބިލްޑިން، ބޮޑީ ބޯޑިން އަދި ބާސްކެޓުގެ ބައިނަލްއަޤުވާމީ މުބާރާތެއް ބާއްވާފައެވެ. ބީޗް ވޮލީގެ އިތުރުން ނޮވެމްބަރު މަހު ސެންޓްރަލް ޒޯން ވޮލީ މުބާރާތް ވެސް ރާއްޖޭގައި ބޭއްވުމަށް ވަނީ ހަމަޖެހިފައެވެ.
ކުޅިވަރު ވަޒީރު އަޙުމަދު މަޚްލޫފް އަންގާރަ ދުވަހު ކުރެއްވި ޓުވީޓެއްގައި ވިދާޅުވީ ބުރާސްފަތި ދުވަހުން ފެށިގެން އާދިއްތަ ދުވަހުގެ ނިޔަލަށް ބީޗް ވޮލީ ޓުވަރ ރާއްޖޭގައި ކުރިއަށްދާނެ ކަމަށެވެ. އަދި މި ޓުވަރ ބޭއްވުމަށް ހަމަޖެހިފައިވަނީ ސަން އައިލެންޑް ރިސޯޓުގައެވެ. މިނިސްޓަރު ވިދާޅުވީ މި ޓުވަރގައި 28 ޤައުމަކުން ދުނިޔޭގެ ފެންވަރުގެ 80 ކުޅުންތެރިން ބައިވެރިވާނެ ކަމަށެވެ. މީގެ އިތުރުން މި ޓުވަރ އަކީ މިހާތަަނަށް ރާއްޖޭގައި ބާއްވާ އެންމެ ރޭންކު މަތި މުބާރާތް ކަމަށް ވެސް މިނިސްޓަރު ވިދާޅުވިއެވެ.
ރާއްޖޭގައި ބައިނަލްއަޤުވާމީ މުބާރާތްތައް ބާއްވައި ދިވެހި އެތުލީޓުންނަށް ހަމަހަމަ ފުރުސަތު ހޯދައި ދިނުމަކީ ސަރުކާރުގެ ސިޔާސަތެކެވެ. މީގެ އިތުރުން ކުޅިވަރުގެ ވަސީލަތްތައް ޤާއިމުކުރުމަކީ ވެސް ސަރުކާރުން އިސްކަމެއް ދެމުން އަންނަ ކަމެކެވެ.
