ސޫރިޔާގެ ދަނޑުބިންތަކުގެ ނަފާ ދެގުނަ ކުރުމުގެ އަޑީގައި ކިލާފަނި!

ފަހުގެ ތާރީޚުގައި ދުނިޔެ ދުށް އެންމެ ވަރުގަދަ އެއް ހަނގުރާމަ ކުރިއަށް ދިޔަ މަންޒިލު ކަމުގައި ސޫރިޔާގެ ވެރިރަށް ދިމިޝްކުގެ ރަށްފުށުގެ ސަރަހައްދެއްގައި ދިރިއުޅެމުންދާ ދަނޑުވެރިޔާ، ޙަސަން ޚަލީފާގެ ކޮންމެ ދުވަހެއްގެ ވެސް މަސައްކަތަކީ އެތައް މިލިއަން ކިލާ ފަންޏެއް ބެލެހެއްޓުމެވެ. އެ ކިލާ ފަނިތަކަކީ ދިރިއުޅުމަށް ޚަލީފާ ކުރަމުން އަންނަ ހާއްސަ ގަސްކާނާ އުފެއްދުމުގެ މައި މުލެވެ. ޚަލީފާ ބުނާ ގޮތުގައި ހަށިގަނޑަށް ގެއްލުން ދެނިވި ކެމިކަލްގެ މާއްދާތަކުން ސަލާމަތްވެފައިވާ އޯގޭނިކް ގަސްކާނާ އުފެއްދުމަށް އޭނާ ހިންގާ މަޝްރޫއަކީ ސޫރިޔާގައި ހިންގަން ފެށި އެފަދަ ފުރަތަމަ މަޝްރޫއެވެ.

އޭނާގެ މަސައްކަތާ ބެހޭ ގޮތުން މައުލޫމާތު ހިއްސާ ކުރަމުން ޚަލީފާ ބުނީ، އެ ޚިޔާލު އައީ މީގެ 10 ވަރަކަށް އަހަރު ކުރިން، އޭނާ ބަލަމުން ދިޔަ ޓީވީ ޝޯއެއްގެ ޒަރިއްޔާއިން ކަމަށެވެ. އެ ޝޯއަކީ ވެސް ކިލާފަނި ބޭނުންކޮށްގެން މަތީ ފެންވަރުގެ ގަސްކާނާ އުފެއްދުމަށް ޖަރުމަނުވިލާތުގައި ކުރަމުން ދިޔަ މަސައްކަތްތައް ދައްކުވާދިން ޝޯއެއް ކަމަށް ވެއެވެ.

އުފެދުނު ޝައުގެއްގެ ބޮޑުކަމުން، ޚަލީފާ ވެސް އޭނާގެ މަސައްކަތް ފެށިއެވެ. ގަސްކާނާގެ ސަބަބުން ތަރުކާރީއާއި އިންސާނުންގެ ސިއްޙަތަށް ކުރާ ފައިދާތައް ދަސްކުރަން ފެށިއެވެ. އަދި އޭނާގެ އަމިއްލަ، ދަނޑުވެރި މަޝްރޫއު ފެށިއެވެ. މަސައްކަތަށް ބޭނުންވާ ތަފާތު އެކި ބާވަތް ބާވަތުގެ ކިލާފަނިތައް އެއްކުރަން ފެށިއެވެ. ލުބްނާން މަގުން، ވިލާތުންވެސް ބައެއް ބާވަތްތައް ގެންދިޔައެވެ.

ސޫރިޔާގެ ދީރާއަށް ނިސްބަތްވާ ޚަލީފާ، އެންމެ ފުރަތަމަ އެ މަސައްކަތް ފެށީވެސް އޭނާގެ އަމިއްލަ ވަޒަނުގައެވެ. އެންމެ 10 ކިލާފަންޏާ އެކުގައެވެ. ހަނގުރާމަ ގަދަވުމުގެ ސަބަބުން، ދިމިޝްކުގެ ރަށްފުށުގައި އޮންނަ ސަޤްބާއަށް ދިރިއުޅުން ބަދަލު ކުރަން ޖެހުނީއެވެ.

އުމުރުން 67 އަހަރުގެ ޚަލީފާ، މަސައްކަތް ފަށައިގަނެގެން އައި ދުވަސްވަރު، ކިލާފަނިތައް ގެންގުޅެމުން ދިޔައީ ފޮށިގަނޑުތަކެއްގައެވެ. އަމިއްލަ ގޭގައެވެ. ނަމަވެސް ފަހުން ބިމެއް ކުއްޔަށް ހިފާ، އޭނާގެ އަމިއްލަ، ކިލާފަނި ދަނޑެއް ތައްޔާރު ކުރިއެވެ. އޭނާ އުފައްދާ އޯގޭނިކް ގަސްކާނާއިން، އަވަށްޓެރި ދަނޑުވެރިންގެ ދަނޑުބިންތަކަށްވެސް އެހީތެރިކަން ފޯރުކޮށްދެމުންނެވެ.

މި ކިލާފަނިތައް ކައި އުޅެނީ އުކާލާ ކާބޯތަކެތީގެ ބާވަތްތަކެވެ. ކިލާފަނީގެ ހަށިގަނޑުތެރެއިން އެތަކެތި ދަތުރުކޮށް ނިމޭއިރު ހުންނަނީ ގަސްކާނާ ހެދިފައެވެ. އެއީ ގަސް ހެއްދުމަށް ބޭނުންވާ ބިންގަނޑަށް މުހިންމު މާއްދާއެކެވެ.

ޚަލީފާގެ ކަސްޓަމަރުން ވެސް މިއަދު ތިބީ އޭނާގެ އުފެއްދުންތަކާ މެދު ހިތްހަމަޖެހިފައެވެ.

ދަނޑުވެރިންގެ އަތުން، ދަނޑުބިންތަކަށް ކުރަން ޖެހޭ ހޭދަވެސް އެތައް ގުނައެއް ކުޑަވެއްޖެއެވެ.

ޚަލީފާ ބުނާ ގޮތުގައި އޭނާގެ ގާތުން ޚިދުމަތް ހޯދާ ކްލަޔަންޓުންގެ ޢަދަދު 50 އަށް އަރައެވެ. ދަނޑު ހެއްދުމަށް ކުރަން ޖެހޭ އަމަލީ މަސައްކަތުގެ ބުރަ ކުޑަކޮށް، ފެނަށް ހިނގާ ޚަރަދު ކުޑަކޮށް ފައިސާ ސަލާމަތް ކުރުމަށް އަދިވެސް އިތުރު ބަޔަކު އޭނާގެ އުފެއްދުން ބޭނުން ކުރަން ފަށާނެ ކަމަށް ޚަލީފާ ބުނެއެވެ.