2-0 ން ޔުވެންޓަސް ބަލިކޮށް, އޭސީ މިލާނުން އިޓާލިއަން ސެރީ އޭ ތާވަލްގެ އެއް ވަނައިގައި ނަޕޯލީއާ އަރާ ހަމަކޮށްފިއެވެ.

އޭސީ މިލާން ވަނީ ޔުވެންޓަސް ބަލިކޮށް ހޯދި ތިން ޕޮއިންޓާއެކު, ނުވަ ފުޓުބޯޅަ މެޗުން 20 ޕޮއިންޓު ހޯދާފައެވެ. އެއް ވަނައިގައި ނަޕޯލީ އޮތީ އަށް މެޗުން 20 ޕޮއިންޓާއެކުއެވެ. ދެވަނާގައި އެޓްލާންޓާ އޮތީވެސް 20 ޕޮއިންޓާއެކުއެވެ. އެއީ އަށް މެޗުންނެވެ. އޭސީ މިލާންގެ ފުރަތަމަ ލަނޑު ފުރަތަމަ ހާފްގެ އިތުރު ވަގުތުގައި ޖިރޫޑް ތަނަވަސްކޮށްދިން ފުރުޞަތަކުން ޖެހީ ފިކާޔޯ ޓޮމޯރީއެވެ. ދެވަނަ ލަނޑު ދެވަނަ ހާފްގެ ކުރީކޮޅު ޖެހީ ޑިއާޒްއެވެ.

މިއީ ޗެމްޕިއަންސް ލީގުގައި ޗެލްސީ އަތުން ވީބައްޔަށްފަހު މިލާނަށް ލިބުނު ހަމަޖެހުމެކެވެ. މިސީޒަންގައި އުނދަގޫ ހާލަތެއްގައި އޮތް ޔުވެންޓަސް މިހާރު އޮތީ އަށް ވަނައިގައެވެ. އެއީ 13 ޕޮއިންޓާއެކުއެވެ. 2-1 ން ސަސުއޯލޯ ބަލިކުރި އިންޓަރ މިލާން އޮތީ ތާވަލުގެ ހަތް ވަނައިގައެވެ. އެއީ ނުވަ މެޗުން 15 ޕޮއިންޓާއެކުއެވެ. މެޗުގައި އިންޓަރ މިލާންގެ ދެ ލަނޑު ވެސް ޖެހީ ބޮސްނިޔާ ފޯވާޑް އެޑިން ޖެކޯއެވެ.