އެމެރިކާގެ ނިއުޔޯކް ސިޓީއަށް މީހުން ހިޖުރަކުރާ އަދަދު އިތުރުވެގެންގޮސް، ކާރިސާއެއްގެ ހާލަތަށް ގޮސްފައިވާކަމަށް ވިދާޅުވެ، އެސިޓީގެ މޭޔަރު ކުއްލި ހާލަތު އިއުލާންކުރައްވައިފިއެވެ. ރިޕޯޓްތައް ބުނާގޮތުން، މިދިޔަ އެޕްރީލް މަހުން ފެށިގެން ދެކުނުގެ ބޯޑަރުން 17 ހާހަށް ވުރެގިނަ މީހުން ވަނީ ނިއުޔޯކަށް ހިޖުރަކޮށްފައެވެ. ނިއުޔޯކަށް މީހުން އެތެރެކުރުމަކީ، ސިޔާސީ ފިކުރަށް ބުރަވެ، ސަރުކާރާ ދެކޮޅަށް ކުރިއަށްގެންދާ ކަމެއް ކަމަށްވެއެވެ. މިގޮތުން މެކްސިކޯ ބޯޑަރު ހުރަސްކޮށް އެމެރިކާއަށް އެތެރެވާ މީހުންގެ އަދަދު ގިނަކަމުން، އެކަމާ ދެކޮޅު ހެދުމުގެގޮތުން އިދިކޮޅު ރިޕަބްލިކަން ޕާޓީއަށް ތާއީދު އޮންނަ ބައެއް ސްޓޭޓްތައްކަމަށްވާ ޓެކްސަސް އެރިޒޯނާ، އަދި ފްލޮރިޑާފަދަ ސްޓޭޓްތަކުން ބަސްތައް ފުރާލައި ނިއުޔޯކަށް މީހުން ފޮނުވާކަމަށްވެއެވެ.

ނިއުޔޯކް ސިޓީގެ މޭޔަރު އެރިކް އެޑަމްސް ހުކުރު ދުވަހު ވިދާޅުވީ، ސެޕްޓެމްބަރު މަހުން ފެށިގެން ދުވާލަކު އެވްރެޖް ގޮތެއްގައި ފަހެއް ނުވަތަ ހަ ބަސް ފުރައި ނިއުޔޯކަށް މީހުން ހިޖުރަކުރަމުން ދާކަމުގައެވެ. މިގޮތަށް ހިޖުރަކުރާ މީހުންގެ ތެރޭގައި ސްކޫލަށް ދާ އުމުރުގެ ކުދިން ހިމެނޭ އާއިލާތައް ހިމެނޭކަމަށާއި، މި އެންމެންނަށް ސިއްހީ ފަރުވާވެސް ބޭނުންވާ ކަމުގައި ވިދާޅުވިއެވެ. މޭޔަރު ވިދާޅުވީ، ހިޖުރަކުރާ މީހުންނަށް އެހީވުމަށް މިހިނގާ ފިސްކަލް އަހަރު އެއް ބިލިއަން ޑޮލަރު ޚަރަދުވާނެކަމުގައެވެ. އެހެންކަމުން މޭޔަރު ވަނީ އިތުރު ފެޑަރަލް އަދި ސްޓޭޓް ފަންޑިންގ ބޭނުންވާކަމަށް ވިދާޅުވެ، އެކަމަށް އެދިވަޑައިގެންފައެވެ. މިހާރު ވާގޮތުން އެހެން ކަންކަމަށް ހުރި ފައިސާވެސް ހިޖުރަކުރާ މީހުންނަށް އެހީ ވުމަށް ގޮސް ހުސްވަނީކަމަށް މޭޔަރު ވިދާޅުވިއެވެ.

އިދިކޮޅު ރިޕަބްލިކަން ޕާޓީގެ ނުފޫޒު ގަދަ ތިން ސްޓޭޓް ކަމަށްވާ ޓެކްސަސް، އެރިޒޯނާ، އަދި ފްލޮރިޑާއަކީ ރައްކާތެރި ސްޓޭޓް ތަކެއްގެ ގޮތުގައި އަމިއްލަޔަށް ކަނޑައަޅާފައިވާ ތަންތަނެވެ. އަދި އެތަންތަނަށް އެތެރެވާ މީހުންގެ އަދަދުވެސް ދަނީ ވަރަށް ބޮޑަށް ކޮންޓްރޯލް ކުރަމުންނެވެ. އެހެންކަމުން އެސްޓޭޓްތަކަށް ހިޖުރަކުރާ މީހުން ބަސްތަކުގައި ނިއުޔޯކަށް ފޮނުވަނީއެވެ.

އެމެރިކާގެ ދެކުނު ބޯޑަރު ހުރަސްކޮށް އެގައުމަށް އެތެރެވާ މީހުންގެ އަދަދު މިއަހަރު ވަނީ ވަރަށް ބޮޑަށް އިތުރުވެގެން ގޮސްފައިކަމަށް ޚަބަރުތައް ބުނެއެވެ.