ﷲގެ އަޅުތަކުން ފަޟީހަތްނުކޮށް، އެމީހުންގެ ނުބައި އަމަލުތައް ވަންހަނާކޮށްދޭ މީހަކީ މާތްﷲ އަށް ބިރުގަންނަ އަދި އާޚިރަތް ދުވަހުގެ ރައްކާތެރިކަމަށް އެދޭ މީހާ ކަމަށް ހުކުރު ޚުތުުބާގައި ބުނެފިއެވެ.
"ތިމާގެ އަޚާ ފަޟީހަތް ކުރުމުން ދުރުހެލިވުން" މި މައުޟޫގެ މައްޗަށް ރާއްޖޭގެ ހުރިހާ ކަންކޮޅުތަކުގައި އިއްވި ޚުތުބާގައި ބުނެފައިވަނީ އަޚުލާގަކީ އިސްލާމްދީން އެކަމަށް އެންމެ އިސްކަން ދީފައިވާ އަސާސުތަކުގެ ތެރޭގައި ހިމެނޭ މަތިވެރި އަސާސެއް ކަމަށެވެ. އެގޮތުން އިންސާނާ ކުރާ އަމަލުތަކުގެ އޭނާއަށް ވާސިލު ނުވެވޭ ފަދަ މަގާމުތަކަށް ރިވެރި އަޚުލާގުގެ ސަބަބުން ވާސިލު ވެވޭކަން ރަސޫލާ މުޙައްމަދު صَلَّى اللهُ عَلَيْهِ وَسَلَّمَ ބަޔާންކުރައްވާފައިވާކަން ވެސް ޚުތުބާގައި ވަނީ ފާހަގަކޮށްފައެވެ.
ރިވެތި އަޚުލާގުގެ މުހިންމުކަން ފާހަގަކޮށް ޚުތުބާގައި ބުނެފައިވަނީ މާތް އަޚުލާގުގެ ތެރޭގައި އެހެން މީހުންގެ އައިބުތަކާއި އުނި ސިފަތައް ފޮރުވައި ވަންހަނާ ކުރުން ހިމެނޭ ކަމަށެވެ. އަދި މާތްﷲ އެކަލާނގެ އަޅުތަކުންނަށް ކުރެވޭ ނުބައި އަމަލުތައް ވަންހަނާކޮށްދެއްވާއިރު މުސްލިމުން އެމީހުންގެ އައުރަ ނިވާ ކުރުމަށާއި އެހެން މީހުންގެ ސިއްރުތައް ރައްކާތެރިކޮށް ސިއްރުކޮށްދިނުމަށް އިސްލާމްދީން ވެސް ގޮވާލާކަން ވަނީ ފާހަގަކޮށްފައެވެ.
ޚުތުބާގައި ބުނެފައިވާ ގޮތުގައި ކުރެވޭ ކުށް ފާފަތަކާއި ހަޑި ހުތުރު އަމަލުތައް ވަންހަނާ ކުރުމަކީ ޤިޔާމަތް ދުވަހުން މާތްﷲގެ ފުއްސެވުމާއި މަޣްފިރަތު ލިބޭނެ ކަމެކެވެ.
މުސްލިމް އަޚުންނޭވެ! ކީރިތި ރަސޫލާ صَلَّى اللهُ عَلَيْهِ وَسَلَّمَ އަހުރެމެންނަށް އަމުރު ކުރައްވާފައިވަނީ އަހުރެމެންނަށް ކުރެވޭ ކުށްފާފަތައް ވަންހަނާ ކުރުމަށް. ތިމާ އެފަދަ ކަންކަން އާއްމުކޮށް، ފާޅު ނުކުރާހައި ހިނދަކު މާތްﷲ އިންސާނާގެ އެ ފަދަ އަމަލުތައް ބޭޒާރު ނުކުރައްވައި ވަންހަނާ ކޮށްދެއްވާނެ.ހުކުރު ޚުތުބާ
މުސްލިމުންގެ ސިއްރުތައް ކަޝްފުކޮށް ހާމަކުރަން މަސައްކަތް ކުރާ މީހުން ގޭތެރޭގައި ފިލައި ތިއްބަސް މާތްﷲ އެ މީހާ ފަޟީހަތް ކުރައްވާނެކަމުގެ އިންޒާރު ރަސޫލާ صَلَّى اللهُ عَلَيْهِ وَسَلَّمَ ދެއްވާފައިވާ ކަން ވެސް ޚުތުބާގައި ވަނީ ބަޔާން ކޮށްފައެވެ.
މީސްމީޑިއާގެ ވަސީލަތްތައް ބޭނުންކޮށްގެން ޚަބަރުތަކާއި ފޮޓޯއާއި ވީޑިއޯތައް ފަތުރަން ފަސޭހަ މިފަދަ ޒަމާނެއްގައި މުސްލިމުން ހާއްސަ ސަމާލުކަމެއް ދޭން ޖެހޭނެކަން ޚުތުބާގައި ވަނީ ބުނެފައެވެ. އެގޮތުން، އަތުގައި އޮންނަ މޯބައިލް ފޯނުގެ ޒަރީއާއިން މީހުންނަށް ނޭނގޭގޮތަށް ތަންތަނާއި މަންޒަރުތަކާއި އަޑުތައް ރެކޯޑުކޮށް، އެ ސިއްރުތައް އާއްމުކުރާ މީހުން ދީނުގައި އައިސްފައިވާ ވަޢީދުތަކާ މެދު ވިސްނަން ޖެހޭކަމަށް ވަނީ ބުނެފައެވެ.
ހަމަކަށަވަރުން، އީމާންވި މީހުންގެ ތެރޭގައި ހުތުރުކަން ބޮޑު ފާފައިގެ ވާހަކައާއި، އަމަލު ފެތުރިގެންދިއުމަށް ލޯބި ކުރާ މީހުން (ދަންނާށެވެ.) ދުނިޔެއާއި އާޚިރަތުގައި ވޭންދިނިވި އަޒާބު އެމީހުންނަށް ހުއްޓެވެ. ﷲ ދެނެވޮޑިގެންވެތެވެ. އަދި ތިޔަބައި މީހުންނަކަށް ނޭނގެތެވެ.އާޔަތެއްގެ މާނަ
މި އާޔަތުގައި މާތްﷲ އިންޒާރުގެ ބަސްފުޅު ވަޙީ ކުރައްވާފައިވަނީ އެފަދަ ޢަމަލުތައް ފެތުރިގެންދިއުމަށް އެމީހުން ލޯބި ކުރާތީ. ވީމާ އެފަދަ ފާހިޝް އަމަލުތައް ބޭޒާރުކޮށް ފަތުރާ މީހުންނަށް ހުރި އަޒާބު ކިހާ ބޮޑުވާނެ ހެއްޔެވެ؟ޚުތުބާ
ފާފަތައް ފޮރުވައި ވަންހަނާ ކުރުމުގެ މާނައަކީ އެއްވެސް ހާލެއްގައި މުންކަރާތްތަކަށް އަރައިގަތުމަށް ހިތްވަރު ދިނުން ނޫންކަމަށާއި އެއީ މުންކަރާތްތަކާ ދެކޮޅުހެދުން ދޫކޮށްލުން ނޫންކަން ފާހަގަކޮށް ޚުތުބާގައި ބުނެފައިވަނީ މުންކަރާތަކަށް އަރައިގަނެއްޖަނަމަ އޭނާއަށް ނަސޭހަތް ދޭން ޖެހޭ ކަމަށެވެ. އަދި ފާފަތަކުން އެއްކިބާވެ ހެޔޮ މަގަށް ރުޖޫއަވުމަށް ބާރު އަޅައި ހިތްވަރު ދޭން ޖެހޭ ކަމަށާއި ޙައްދު ކަނޑައެޅިފައިވާ ފާފަތަކަށް އަރައިގަންނަ ފަރާތްތަކުގެ މައްސަލަ ޝަރީއަތަށް ހުށައެޅި އެ ކުށް ސާބިތުވެއްޖެނަމަ ޝަރުއީ ގޮތުން ކަނޑައެޅިފައިވާ ޙައްގު އަދަބު ދޭން ޖެހޭނެ ކަން ވެސް ވަނީ ބަޔާންކޮށްފައެވެ.
ކުށް ފާފަތަކުން ތައުބާވެ އިސްލާހުވުމުގެ މަގު އިސްލާމް ދީނުގައި ފަހިކޮށްދީފައިވާއިރު އެފަދަ ފާފަތަކުން ތައުބާވެ ފާފަ ފުއްސެވުމަށް އެދި، ގިނަގިނައިން ދުޢާ ކުރުމަށް އެންމެހާ މުސްލިމުންނަށް ހުކުރު ޚުތުބާގައި ވަނީ އިލްތިމާސްކޮށްފައެވެ.
