ދެވަނަ ހާފްގައި ނުކުމެ މެންޗެސްޓަރ ޔުނައިޓެޑް މޮޅުކޮށްދިނީ ރަޝްފޯޑް

ޔުއެފާ ޔޫރޮޕާ ލީގުގައި ދެވަނަ ހާފްގައި ކުޅެން ނުކުމެ, މާކޮސް ރަޝްފޯޑް މެންޗެސްޓަރ ޔުނައިޓެޑް މޮޅުކޮށްދީފިއެވެ.

ސައިޕްރަސްގެ އޮމޯނިއާ ނިކޯސިއާ އަތުން މެންޗެސްޓަރ ޔުނައިޓެޑް މޮޅުވީ ފުރަތަމަ ހާފްގައި 1-0 ން ފަހަތުގައި އޮތުމަށްފަހު, ދެވަނަ ހާފްގައި ރަޝްފޯޑް ދެއްކި ތަފާތުން 3-2 ނެވެ. ފުރަތަމަ ހާފްގައި އޮމޯނިއާ ނިކޯސިއާއަށް ކުރި ހޯދައިދިނީ އަންސަރިފާޑްއެވެ. ރަޝްފޯޑް ކުޅެން ނުކުތީ ދެވަނަ ހާފް ފަށައިގެން ފުރަތަމަ މިނެޓުގައެވެ. އޭނާ ނަތީޖާ ހަމަހަމަކޮށްދިނީ ކުޅެން ނުކުތްތާ ހަތް މިނެޓުގެ ތެރޭގައެވެ. ފުރަތަމަ ފަހަރަށް މެންޗެސްޓަރ ޔުނައިޓެޑް ކުރި ހޯދައިދިނީ މާޝިއަލްއެވެ. އަނިޔާއަށްފަހު އެނބުރި އައިސް މާޝިއަލްގެ ފަރާތުން ފެންނަނީ އުއްމީދީ ކުޅުމެކެވެ. މާޝިއަލް ލަނޑު ޖަހަން ފުރުޞަތު ފަހިކޮށްދިނީވެސް ރަޝްފޯޑެވެ. ޔުނައިޓެޑުން ތިންވަނަ ލަނޑެއްވެސް ޖެހީ ރަޝްފޯޑެވެ. 84 ވަނަ މިނެޓުގައި އެލަނޑު ޖަހަން ފުރުޞަތު ފަހިކޮށްދިނީ މުޅި މެޗު ފުރިހަމަކުރި ރޮނަލްޑޯއެވެ. އެކަމަކު ޖެހިގެން އައި މިނެޓުގައި ޕެނަގިއޯޓޫ ލަނޑެއް ޖަހާ އޮމޯނިއާ ނިކޯސިއާއަށް ފަރަޤު ކުޑަކޮށްދިނެވެ.

މެޗަށްފަހު މެންޗެސްޓަރ ޔުނައިޓެޑްގެ ކޯޗު އެރިކް ޓެން ހާގު ބުނީ ބަދަލުގެ ފައިދާ ކުރިކަމަށާއި, ޓީމް ވަރުގަދަ ކަމަށެވެ. މެޗުން މޮޅުވިޔަސް މެންޗެސްޓަރ ޔުނައިޓެޑް އަދި އޮތީ ގްރޫޕްގެ ދެވަނާގައެވެ. އެއީ ތިން މެޗުން ހަ ޕޮއިންޓާއެކުއެވެ. އެއްވަނާގައި އޮތީ ތިން މެޗުވެސް ކާމިޔާބުކުރި ސްޕެއިންގެ ރެއާލް ސޮއިއެޑާޑްއެވެ. ތިންވަނަ މެޗުގައި ސޮސިއެޑާޑް ވަނީ ޝެރިފް ޓިރާސްޕޯލް އަތުން 2-0 ން މޮޅުވެފައެވެ.