ޑިޒައިން އެންޑް ބިލްޑް އުސޫލުން ގދ ތިނަދޫގައި 200 ހައުސިންގ ޔުނިޓު އެޅުމަށް ބަޔަކާ ޙަވާލުކޮށްފިއެވެ.

މި މަޝްރޫއަށް ޚަރަދު ކުރަނީ ދިވެހި ސަރުކާރުން 2022 ވަނަ އަހަރުގެ ޕީއެސްއައިޕީ ބަޖެޓުންނެވެ. ބުރާސްފަތި ދުވަހު މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި އޮތް ރަސްމިއްޔާތެއްގައި މި މަސައްކަތް ޙަވާލު ކޮށްފައިވަނީ ސިއެރާ ސްޓަރ ޖޮއިންޓް ވެންޗަރ އާއެވެ.

މި އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ހައުސިންގ ޑިޕާޓްމަންޓުގެ ޑިރެކްޓަރ ޖެނެރަލް އަހުމަދު ވިޝާން ނަސީމެވެ. ކުންފުނީގެ ފަރާތުން ސޮއި ކުރެއްވީ އެމް.އެޗް.ޕީ ޕްރަސާދް އެރަތުނާއެވެ.

މިނިސްޓްރީން މައުލޫމާތު ދޭ ގޮތުގައި މި މަސައްކަތުގެ އަގަކީ 253،990،863 (ދުއިސައްތަ ފަންސާސް ތިން މިލިއަން ނުވަލައްކަ ނުވަދިހަ ހާސް ރުފިޔާ އައްސަތޭކަ ފަސްދޮޅަސް ތިން) ރުފިޔާއެވެ. މި މަސައްކަތް ނިންމުމަށް ޙަވާލު ކޮށްފައިވާ މުއްދަތަކީ 540 ދުވަހެވެ.

މިނިސްޓްރީން މައުލޫމާތު ދޭ ގޮތުގައި މި މަޝްރޫއުގައި ހިމެނެނީ 200 ހައުސިންގ ޔުނިޓެވެ. ކޮންމެ ހައުސިންގ ޔުނިޓެއްގައި 700 އަކަފޫޓު ހުންނާނެކަމަށް މިނިސްޓްރީން މައުލޫމާތު ދެއެވެ.

އޭގެ އިތުރުން، ޔުނިޓެއްގައި ހިމެނެނީ 3 ކޮޓަރިއާއި، 3 ފާޚާނާގެ އިތުރުން، ސިޓިންގ ރޫމާއި، ބަދިގެއާއި، ކާގެއާއި، ލޯންޑަރީ ރޫމްގެ އިތުރުން، ސްޓޯރ ރޫމްކަމަށް މިނިސްޓްރީން ބުނެއެވެ.

އަދި ހައުސިންގ ޔުނިޓުތަކުގައި ދިރިއުޅޭ ފަރާތްތަކަށް ހިތްފަސޭހަ މާހައުލެއް ޤާއިމު ކުރުމަށް ޔުނިޓު ވަށައިގެން އަލި ކުރެވޭނެކަމަށް ވެސް މިނިސްޓްރީން ބުނެއެވެ. ހަމައެއާއެކު، ޕާރކްއަކާއި ވެހިކަލް ޕާރކް ކުރާނެ ޖާގައެއް ވެސް ޤާއިމު ކުރެވޭނެކަމަށް މިނިސްޓްރީން ބުނެއެވެ.

މި ސަރުކާރުން ގެންދަނީ އަތޮޅު ތެރޭގެ ބޯހިޔާވަހިކަމާއި ގުޅޭ ގިނަ މަޝްރޫއުތަކެއް ހިންގަމުންނެވެ. އެގޮތުން ރައްޔިތުންނަށް ދިމާވެފައިވާ ގެދޮރުގެ ދަތިކަމަށް ހައްލު ހޯދައިދީ، އަތްފޯރާފަށުގައި ގެދޮރުވެރިކަން ފޯރުކޮށް ދިނުމަކީ ސަރުކާރުގެ އެންމެ އިސް އެއް އަމާޒު ކަމަށް ވަނީ ބަޔާންކޮށްފައެވެ. އަތޮޅުތެރޭގެ ގެދޮރުވެރިކަމަށް ކުރިއަށްއޮތް ތިން އަހަރަށް 1.5 ބިލިއަނެއްހާ ރުފިޔާ ހިމަނާފައިވާނެ ކަމަށް ސަރުކާރުން ވަނީ ހާމަކޮށްފައެވެ.