ބަސް ކާޑުތައް ބޭނުން ކުރުމުގައި ދަތިތަކެއް އެބަހުރި، އާ ކާޑުތަކާއެކު އެކަން ހައްލުވާނެ: އާޒިމް
މިނީ ބަސްތަކުގައި މިހާރުގެ ބަސް ކާޑު ބޭނުން ނުކުރެވޭނެ
އެމްޓީސީސީގެ ސީއީއޯ އާދަމް އާޒިމް (މެދުގައި)
ބަހުގެ ޚިދުމަތް ދިނުމުގައި މިހާރު ބޭނުންކުރަމުން އަންނަ "ބަސް ކާޑު" ބޭނުން ކުރުމުގައި ދަތިތަކެއް އެބަހުރި ކަމަށާއި އެމްޓީސީސީން ތައާރަފުކުރާ އާ ކާޑުތަކާއެކު އެކަމަށް ހައްލު ލިބިގެންދާނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އެމްޓީސީސީގެ މިނީ ބަހުގެ ޚިދުމަތުން އަގު ނަގަން ފެށުމުގެ ގޮތުން ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީން ކުރި ސުވާލަކަށް ޖަވާބުދެެއްވަމުން އާޒިމް ވިދާޅުވީ މާލެ އާއި ހުޅުމާލެއާ ދެމެދު ބަހުގެ ޚިދުމަތް ހޯދުމަށް ބޭނުން ކުރާ ބަސް ކާޑުތައް މިނީ ބަހުގެ ޚިދުމަތް ހޯދުމުގައި ބޭނުން ނުކުރެވެނީ އޭގައި ވަރަށް ގިނަ ލިމިޓޭޝަންތައް ހުރުމުން ކަމަށެވެ. އެގޮތުން، އެ ކާޑުތަކަށް ފައިސާ އެޅުމުގައި ނުވަތަރިލޯޑު ކުރުމުގައި ރައްޔިތުންނަށް ދަތިތަކެއް އެބަހުރި ކަމަށް އޭނާ ފާހަގަކުރެއްވިއެވެ.
އާޒިމް ވިދާޅުވީ ބަސް ކާޑުގައި ހުރި މި ލިމިޓޭޝަންތަކުގެ ސަބަބުން ކަސްޓަމަރުންނަށް ދިމާވާ ދަތިތަކަށް ހައްލު ހޯދައިދިނުމަށް އެމްޓީސީސީން މިހާރު އާ ކާޑެއް ތައާރަފު ކުރުމަށް މަސައްކަތް ކުރަމުން އަންނަ ކަމަށެވެ. މި ކާޑު މިއަހަރު ނިމުމުގެ ކުރިން ތައާރަފު ކުރުމަށް މަސައްކަތް ކުރަމުން އަންނައިރު މި ކާޑު ތައާރަފު ކުރުމާއެކު މިހާރު ބޭނުން ކުރަމުން އަންނަ ހުރިހާ ބަސް ކާޑުތަކެއް އުވާލާނާއެވެ.
މާލެ އާއި ހުޅުމާލެއާ ދެމެދު ކުރަމުން އަންނަ ބަސް ދަތުރުތަކުގެ ޚިދުމަތް އެމްޓީސީސީއާ ހަވާލު ކުރީ މިދިޔަ އަހަރުއެވެ. އޭގެ ކުރިން އެ ޚިދުމަތް ދެމުން އައީ މޯލްޑިވްސް ޕޯޓްސް ލިމިޓެޑް (އެމްޕީއެލް) އިންނެވެ. މިހާރު ބޭނުން ކުރާ ބަސް ކާޑަކީ ވެސް އެ ކުންފުނިން ތައާރަފު ކޮށްފައިވާ ކާޑެކެވެ.
މިހާރު ގެންގުޅޭ ބަސް ކާޑުތަކަށް ރީލޯޑް ކުރެވެނީ ބައެއް ބަސް ސްޓޮޕްތަކުންނާއި ބައެއް ފިހާރަތަކުންނެވެ. މީގެ ސަބަބުން ކާޑު ޓޮޕްއަޕް ކުރުމުގައި ގިނަ ދަތިތަކާ ދިމާވާ ކަމަށް ރައްޔިތުން ބުނެއެވެ.
އާޒިމް ވިދާޅުވީ އެމްޓީސީސީއާ ބަހުގެ ޚިދުމަތް ހަވާލު ކުރިތާ އެއް އަހަރު ދުވަސްވިއިރު ބަސް ކާޑުގެ އިތުރުން އެހެން ހުރިހާ ޚިދުމަތެއް ރައްޔިތުންނަށް ފޯރުކޮށްދެވިފައިވާ ކަމަށެވެ. ބަސް ކާޑުވެސް މިއަހަރު ނިމުމުގެ ކުރިން ތައާރަފުކުރައްވާނެ ކަމަށް އާޒިމް ވިދާޅުވިއެވެ.
އެމްޓީސީސީން މިއަހަރު ފެށި މިނީ ބަހުގެ ޚިދުމަތުގައި މިހާރު ޓިކެޓް ވިއްކަނީ އޮންލައިންކޮންނާއި ބަސްތެރެއިން ކަރުދާސް ޓިކެޓުގެ ގޮތުގައެވެ. އެގޮތުން އާރުޓީއެލްގެ ވެބްސައިޓާއި މޯބައިލް އެޕްލިކޭޝަން މެދުވެރިކޮށް އޮންލައިންކޮށް ކިޔުއާރު ޓިކެޓް ނެގޭއިރު މި މަސް ނިމުމުގެ ކުރިން އީއެމްވީ ކާޑު ބޭނުން ކުރެވޭ އިންތިޒާމު ހަމަޖެހިގެންދާނެއެވެ. މި ޚިދުމަތާއެކު ވިސާ، އެމެކްސް އަދި މާސްޓަކާޑު ގެންގުޅޭ ކަސްޓަމަރުންނަށް އެ ކާޑުތައް ބޭނުންކޮށްގެން ޓިކެޓަށް ފައިސާ ދެއްކޭނެއެވެ.
