ޑެންމާކު ޓީމު ޤަތަރަށް ދާއިރު އާއިލާ މެމްބަރުން ނުގެންދާނެ

މިއަހަރުގެ ފަހުކޮޅު ގަތަރުގައި އޮންނަ ފީފާ ވޯލްޑް ކަޕަށް ޑެންމާކް ޓީމު ދަތުރުކުރާއިރު އެޓީމު ކުޅުންތެރިންނާއި އޮފިޝަލުންގެ އާއިލާ މެމްބަރުން ގަތަރަށް ނުގެންދިއުމަށް ނިންމައިފިއެވެ.

ޑެންމާކު ޓީމުން މިގޮތަށް ނިންމީ އިންސާނީ ޙައްޤުތަކާއި ޚިލާފަށް ގަތަރުގައި ކުރާކަމަށް ތުހުމަތުކުރާ އަމަލުތަކާއި ދެކޮޅުކަން އެންގުމުގެ ގޮތުންނެވެ. ޑެންމާކު ފުޓްބޯޅަ އެސޯސިއޭޝަންގެ ކޮމިއުނިކޭޝަން މެނޭޖަރު ޖެކޮބް ހޯޔާ ވިދާޅުވީ މުބާރާތާއި ދިމާކޮށް ޑެންމާކުގެ ފަރާތުން ގަތަރަށް ބޮޑު އާމްދަނީއެއް ލިބޭނެ މަގު ފަހިކުރަން ބޭނުން ނުވާ ކަމަށެވެ.

މީގެ ކުރިން ވޯލްޑް ކަޕްތަކުގައި މުބާރާތް އޮންނަ ޤައުމަށް ޓީމުތަކުގެ ކުޅުންތެރިން ދަތުރުކުރަނީ އެމީހުންގެ އަނބިންނާއި ލޯބިވެރިން ގޮވައިގެންނެވެ. މީގެ ސަބަބުން އެމީހުން ހުރުމާއި ކެއުން ފަދަ އެކިކަންކަމަށް ކުރާ ޚަރަދުން މުބާރާތް ބާއްވާ ޤައުމަށް ބޮޑު އާމްދަނީއެއް ލިބެއެވެ. ޑެންމާކުން މިގޮތަށް ނިންމީ އެޤައުމުގެ ފަރާތުން ގަތަރަށް ލިބޭ މިފަދަ އާމްދަނީތައް ކުޑަ ކުރުމަށްޓަކައެވެ.

އިންސާނީ ޙައްޤުތަކަށް އަރައިގަނެފައިވާ ކަމަށް ބުނެ މީޑިއާ ތަކުގައާއި އިންސާނީ ޙައްޤުތަކަށް ވަކާލާތުކުރާ ޖަމިއްޔާޖަމާއަތްތަކުން އަންނަނީ ވަރަށް ބޮޑަށް ގަތަރަށް ފާޑުކިޔަމުންނެވެ. ރިޕޯޓުތައް ބުނާ ގޮތުން 2010 ވަނަ އަހަރުން ފެށީގެން 2021 ވަނަ އަހަރާއި ހަމައަށް ގަތަރުގައި މަސައްކަތްކުރި 6،500 ބިދޭސީ މަސައްކަތްތެރިން ވަނީ މަރުވެފައެވެ. އަދި އިންޓަރނޭޝަނަލް ލޭބާ އޯގަނައިޒޭޝަނުން ބުނެފައިވާ ގޮތުގައި މަސައްކަތްތެރިން މަރުވާ އަދަދުގެ ފުރިހަމަ ރިޕޯޓެއް ގަތަރުން ހުށަހަޅާފައެއް ނުވެއެވެ. ނަމަވެސް ގަތަރުން ވަނީ އެކަން ދޮގުކޮށްފައެވެ. ގަތަރުގައި އޮންނަ ވޯލްޑް ކަޕް އިންތިޒާމުކުރާ ސުޕްރީމް ކޮމިޓީ ފޯރ ޑެލިވެރީ އެންޑް ލެގަސީން ވަނީ، މުބާރާތް ބޭއްވުމަށް ބިނާކުރި ސްޓޭޑިއަމްތައް ހެދުމުގެ މަސައްކަތުގައި އުޅުނު އެތައް މަސައްކަތްތެރީންނެއް މަރުވެފައިވާ ކަމަށް ބުނާ ވަހަކަވެސް ދޮގުކޮށްފައެވެ.

ޑެންމާކުން މިފަހަރުގެ މުބާރާތަށް ފަރުމާކުރި އެޤައުމުގެ ޖާޒީވެސް ވަނީ ގަތަރުން ކުރާ މިފަދަ އަމަލުތަކާއި ދެކޮޅުކަން އަންގައިދޭ ގޮތަށް ފަރުމާކޮށްފައެވެ. މީގެ އިތުރުން، މިފަހަރުގެ މުބާރާތުގައި ގަތަރު ކުޅޭ މެޗުތައް ބެލުމަށް ޑެންމާކުގެ ފުޓްބޯޅަ އެސޯސިއޭޝަންގެ މެމްބަރުން ގަތަރަށް ދަރުކުރާނެ މިންވަރުވެސް ވަނީ މަދުކޮށްފައެވެ. އެގޮތުން ޑެންމާކް އެފްއޭގެ ކޮންމެ މެމްބަރެއް ގަތަރަށް ދާނީ އެޓީމު ކުޅޭ އެންމެ މެޗެއް ބެލުމަށެވެ. ކޮންމެ މެޗަކަށް ޑެންމާކް އެފްއޭ ބޯޑުގެ ދެމެމްބަރުންނަށްވުރެ ގިނައިން ގަތަރަށް ނުދާނެއެވެ.