23 ކިލޯގެ ޑްރަގު އެތެރެކުރި މައްސަލައިގައި މުދިމަކު ވަނީ ހައްޔަރުކޮށްފައި!
21 ޖޫން 2017 | ބުދަ 04:45މިހާރު ހައްޔަރުގައި ހުރީ މުދިމުގެ ދައްތަ އެކަނި
ބޮޑު ޑްރަގު ނެޓްވޯކުން ރާއްޖެ އެތެރެކުރިން މަސްތުވާތަކެތި ފުލުހުން ދައްކާލަނީ
ބޮޑު ޑްރަގު ނެޓްވޯކެއް ފަޅާ އަރުވާލައި ގާތްގަނޑަކަށް 23 ކިލޯގެ މަސްތުވާތަކެއްޗާއެކު 15 މީހަކު ހައްޔަރުކޮށްފައިވާއިރު، އޭގެ ތެރޭގައި ކިނބިދޫ މުދިމު ހައްޔަރުކޮށްފައިވާކަން ރާއްޖެ އެމްވީއަށް ކަށަވަރުވެއްޖެ އެވެ.
ހައްޔަރުކުރި މީހުން މައުލޫމާތު ފުލުހުން ހާމަ ނުކުރިޔަސް، ޑްރަގު މައްސަލައެއްގައި މި މަހުގެ 13 ވަނަ ދުވަހާއި 14 ވަނަ ދުވަހު ހައްޔަރުކުރި މީހުންގެ ތެރޭގައި ކިނބިދޫ މުދިމާއި އޭނާގެ އަންހެނުންނާއި މުދިމުގެ ދައްތަ ހިމެނޭ ކަމަށް، އެރަށުން ވާހަކަދެއްކި މީހަކު މައުލޫމާތުދެއްވި އެވެ.
ކިނބިދޫ މުދިމަކަށް ހުރި މީހާ އަކީ އުމުރުން ގާތްގަނޑަކަށް 40 އަހަރުގެ މީހެއް ކަމަށާއި އޭނާގެ ދައްތަ އަކީ އުމުރުން 50 އަަހަރު ގެ މީހެއް ކައުންސިލުން ބުނެ އެވެ. އެ އާއިލާ ހައްޔަރު ކުރީ ބޭސްފަރުވާ އަށް އިންޑިއާގެ ޓްރިވެންޑްރަމަށް ގޮސްފައި އެނބުރި އައި ވަގުތު އެއާޕޯޓުންނެވެ.
ކިނބިދޫން ވާހަކަ ދެއްކި މީހަކު ބުނި ގޮތުގައި މުދިން މީހާއާއެކު އައި މީހެއްގެ އަތުން ފެނުނު މަސްތުވާތަކެއްޗަކީ އިންޑިއާއިން ބަޔަކު ހަވާލުކުރި އެއްޗެއް ކަމަށް ގަބޫލު ކުރެވޭ ކަމަށެވެ. މީގެ ކުރިން އެފަދަ އެއްވެސް މައްސަލައެއްގައި ނުވަތަ، އެފަދަ ވާހަކައެއްވެސް، އެއާއިލާއާ ގުޅޭ ގޮތުން ނުދެކެވޭ ކަމަށް އޭނާ ބުންޏެވެ.
މި މައްސަލައިގައި
ޓޮބްލެރޯން ޗޮކްލެޓްގައި ވެސް ޑްރަގް އެތެރެކުރި
މިދިޔަ ހޯމަ ދުވަހު ފުލުހުން ބޭއްވި ހާއްސަ ނޫސްވެރިންގެ ބައްދަލުވުމުގައި ފުލުހުން ވަނީ މި ޖޫން މަހުގެ 13، ވަނަ ދުވަހާއި 14 ވަނަ ދުވަހު އެއަރޕޯޓުން މަސްތުވާތަކެތި އަތުލައިގަނެފައިވާ ކަން ހާމަކޮށްފަ އެވެ. މިފަދަ އޮޕަރޭޝަންތަކުގައި އެންމެ ބޮޑަށް ފާހަގަކުރެވެނީ، އެކަނި ބޭސްފަރުވާއަށްދާ ފަރާތްތަކަށް އެހީވުމަށްފަހު، އެފަދަ ފަރާތްތަކުގެ އިތުބާރު ހޯދުމަށްފަހު، ތަކެތި ރާއްޖެ ގެނައުމަށް ހަވާލު ކުރާ މަންޒަރު ކަމަށް ފުލުހުން ބުނެ އެވެ. މިއީ ހުރިހާ ފަރާތްތަކުންވެސް ސަމާލުވާންޖެހޭ ކަމެއް ކަމަށް ފުލުހުން ބުނެ އެވެ.
ކަސްޓަމްސް އިން ވެސް ވަނީ، މީހަކު ދޭ އެއްޗަކީ، ކޯއްޗެއްކަން ޔަގީންނުވާ ހިދު، އަދި ބަންދު ކުރެވިފައިވާ އެއްޗެއްނަމަ، ހަވާލުނުވުމަށް އިލްތިމާސްކުރައްވާފަ އެވެ.
ޖޫން މަހުގެ 13 ވަނަ ދުވަހާއި 14 ވަނަ ދުވަހު، ފުލުހުން ހިންގި ހާއްސަ އޮޕަރޭޝަނުގައި، އަތުލައިގަނެވުނު މައްސަތުވާތަކެތީގެ މައްސަލައަކާއި ގުޅިގެން ފުލުހުން އިތުރު ފަސް އޮޕަރޭޝަނެއް ވަނީ ހިންގާފަ އެވެ. މި އޮޕަރޭޝަންތަކުގައި، 15 މީހުން ހައްޔަރުކޮށްފައިވެ އެވެ. މި ހަތް އޮޕަރޭޝަންގައި ޖުމްލަ 23 ކިލޯގެ މަސްތުވާތަކެތި އަތުލައިގަނެފައިވާ އިރު މިތަކެތީގެ އަގު 30 މިލިއަން ރުފިޔާއަށް އަރާނެ ކަމަށް ފުލުހުން ވަނީ ހާމަކޮށްފަ އެވެ.
އަތުލައިގަތް ބައެއް ޑްރަގް ހުރި ޓޮބްލެރޯން ޗޮކްލެޓްތަކެއްގެ ތެރޭގައި ކަދުރު ޕެކެޓްތަކެއްގެ ތެރޭގައެވެ.
