ޓެރަރިސްޓު ޖަމާއަތްތަކުގެ ލިސްޓު އަނެއްކާވެސް އާއްމުކޮށްފި
19 ޖަމާއަތެއް ޓެރަރިސްޓު ޖަމާއަތްތަކުގެ ގޮތުގައި ވަނީ ކަނޑައަޅާފައި
ޓެރަރިސްޓު ޖަމާއަތްތަކުގެ ތެރޭގައި ހިމެނޭ އައިސިސްގެ ހަނގުރާމަވެރިންތަކެއް
ޓެރަރިސްޓު ޖަމާއަތްތަކާއި ހަނގުރާމަވެރި ސަރަހައްދުތަކުގެ ލިސްޓު އަނެއްކާވެސް އާއްމުކޮށްފިއެވެ.
ގައުމީ ސަލާމަތީ މަޖިލީހުގެ މަޝްވަރާގެ މަތިން ރައީސް ކަނޑައަޅަންޖެހޭ ލިސްޓުގައި މިފަހަރު ވެސް ހަނގުރާމަވެރި ސަރަހައްދުތަކުގެ ގޮތުގައި ކަނޑައަޅާފައި އޮތީ ސީރިޔާ އެކަންޏެވެ. ޓެރަރިސްޓު ޖަމާއަތްތަކުގެ ގޮތުގައި އޮތީ ކުރިން ވެސް އޮތް 19 ޖަމާއަތެވެ.
ޓެރަރިޒަމް މަނާ ކުރުމުގެ ޤާނޫނުގެ 18 ވަނަ މާއްދާގެ ދަށުން ރައީސުލްޖުމްހޫރިއްޔާ ކަނޑައަޅާ ޓެރަރިސްޓު ޖަމާއަތްތައް ޓެރަރިޒަމް މަނާ ކުރުމުގެ ގާނޫނުގެ ދަށުން ކޮންމެ 12 މަހަކުން މުރާޖައާ ކުރަންޖެހެއެވެ.
ޓެރަރިސްޓް ޖަމާއަތްތަކުގެ ލިސްޓު
ޓެރަރިސްޓު ޖަމާއަތްތައް ކަމަށް ބެލެވޭ ޖަމާއަތްތަކުގެ ލިސްޓެއް ރައީސުލްޖުމްހޫރިއްޔާ ކަނޑައަޅުއްވަން ޖެހޭ ގޮތަށް ޓެރަރިޒަމް މަނާކުރުމުގެ ގާނޫނު އިސްލާހުކޮށް ގެޒެޓްކުރީ މާޗް 21، 2016 ގައި ރައީސް އަބްދުﷲ ޔާމީންގެ ވެރިކަމުގައެވެ. ނަމަވެސް ރައީސް ޔާމީންގެ ވެރިކަމުގައި ޓެރަރިސްޓު ޖަމާއަތްތަކުގެ ލިސްޓެއް އާންމުކޮށްފައެއް ނުވެއެވެ.
ރައީސުލްޖުމްހޫރިއްޔާ އާންމުކުރައްވާ ލިސްޓު ގައުމީ ސަލާމަތާ ބެހޭ މަޖިލީހުގެ އިރުޝާދާ އެކު ބަލަހައްޓަނީ ދިވެހި ސިފައިންނެވެ.
