އަޅުގަނޑުމެންނަށްވުރެ އަވަހަށް މަސައްކަތް ކުރެވޭނެ ބަޔަކު ރާއްޖޭން ބޭރުން ވެސް ނުގެނެވޭނެ: އާޒިމް
އެމްޓީސީސީގެ މުވައްޒަފުންގެ މަސައްކަތުން މިއަދު ރައްޔިތުންގެ އިތުބާރު ލިބިފައިވާ ކަމަށް ވިދާޅުވި
އާދަމް އާޒިމް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އަށްވުރެ އަވަހަށް ޕްރޮޖެކްޓުތަކުގެ މަސައްކަތް ކުރެވޭނެ ބަޔަކު ރާއްޖޭން ބޭރުން ވެސް ނުގެނެވޭނެ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެ ޓީވީގެ "ފަލަސުރުޚީ" ގައި ވާހަކަދައްކަވަމުން އާޒިމް ވިދާޅުވީ އެ ކުންފުނިން އަބަދުވެސް މަސައްކަތް ކުރަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވިސްނުންފުޅާއެއްގޮތަށް މަޝްރޫއުތައް ކުރިއަށްގެންދިއުމަށް ކަމަށެވެ. އެގޮތުން، އެމަނިކުފާނުގެ ވިސްނުންފުޅަކީ ރައްޔިތުންގެ ފައިސާއިން ޚަރަދު ކުރާ މަޝްރޫއުތަކުގެ މަސައްކަތް ވީހާވެސް އަވަހަށް ނިންމާ ރައްޔިތުންނަށް އޭގެ ފައިދާ ހޯދައިދެއްވުން ކަމަށާއި އެމްޓީސީސީގައި މިއަދު އެ ގާބިލުކަން އެބަހުރި ކަމަށް އޭނާ ވިދާޅުވިއެވެ.
އާޒިމް ވިދާޅުވީ ސަރުކާރުން ހަވާލު ކުރާ މަޝްރޫއުތަކުގެ ތެރެއިން ޕްރޮޖެކްޓަށް އެއްވެސް ބަދަލެއް ނުގެންނަ ނަމަ އެއާޕޯޓެއްގެ މަސައްކަތް ބިން ހިއްކުމާއެކު 18 މަސް ދުވަހުގެ ތެރޭގައި ނިންމާލުމުގެ ގާބިލުކަން އެ ކުންފުނީގައި އެބަހުރި ކަމަށެވެ. އަދި ބޮޑެތި ބަނދަރުތަކުގެ މަސައްކަތް ވެސް ޕްރޮޖެކްޓަށް ބަދަލެއް ނުގެންނަ ނަމަ އަހަރެއްގެ ތެރޭގައި މަސައްކަތް ނިންމާލުމަށްފަހު ހަވާލު ކުރެވޭނެ ކަމަށް ވިދާޅުވިއެވެ.
އެމްޓީސީސީގައި މަސައްކަތް ކުރާ މުވައްޒަފުންނަކީ ކަމަށް ގާބިލު މުވައްޒަފުންކަން ފާހަގަކުރައްވާ އާޒިމް ވިދާޅުވީ އެ ކުންފުންޏަށްވުރެ އަވަހަށް މަސައްކަތް ކުރެވޭނެ ބަޔަކު ރާއްޖޭން ވެސް އަދި ރާއްޖޭން ބޭރުން ވެސް ގެނެވޭނެ ކަމަށް ނުބެލެވޭ ކަމަށެވެ.
އާޒިމް އިތުރަށް ވިދާޅުވީ އެ ކުންފުނިން މިހާރު މަޝްރޫއެއްގެ މަސައްކަތް ވެސް ފަށަނީ އެ މަޝްރޫއަކަށް ބޭނުންވާ ހުރިހާ ސާމާނެއް ހަމަކޮށްގެން ރަނގަޅަށް ތައްޔާރުވެގެން ކަމަށެވެ. އަދި ކުރިން މަސައްކަތުގެ މެދުތެރެއިން އިކުއިޕްމަންޓުތައް ގެންދިޔަ ނަމަވެސް މިހާރު އެ ކުންފުނީގެ ހުރިހާ ސައިޓެއްގައި ވެސް ބޭނުންވާ މުވައްޒަފުންނާއި އިކުއިޕްމަންޓުތައް ހަމައަށް ހުންނާނެ ކަން އޭނާ ފާހަގަކުރެއްވިއެވެ.
އެމްޓީސީސީން އެ ކުންފުނީގެ އޮޕަރޭޝަނަށް ގެނައި ބަދަލާއެކު ރައްޔިތުން އެ ކުންފުންޏަށް އިތުބާރު ކުރަން ފަށާފައިވާ ކަމަށް ވެސް އާޒިމް ވިދާޅުވިއެވެ.
އާޒިމް ވިދާޅުވީ އެ ކުންފުންޏަށް މިއަދު ރައްޔިތުން އިތުބާރު ކުރަން ފަށާފައިވަނީ އެ ކުންފުނީގެ މުވައްޒަފުންގެ ބުރަ މަސައްކަތުގެ ސަބަބުން ކަމަށެވެ. އެހެންކަމުން ރައްޔިތުންގެ އެ އިތުބާރު ދެމެހެއްޓުމަށް ކޮންމެ ދުވަހަކު އެ ކުންފުނިން މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވިއެވެ.
