ބައިނަލްއަގްވާމީ މެރިޓައިމް ސޭފްޓީ ވީކްގެ ނިންމުމުގެ ހަފްލާ ބާއްވައިފި
29 ސެޕްޓެމްބަރު 2022 | ބުރާސްފަތި 13:40މި ހަފްތާ ރާއްޖޭގައި ފާހަގަކޮށްފައިވަނީ ސެޕްޓެމްބަރު 22 ވަނަ ދުވަހުން ފެށިގެން 29 ވަނަ ދުވަހަށް
މެރިޓައިމް ދުވަސް ފާހަގަކުރުމަށްޓަކައި އުޅަނދުތައް ބަލާ ފާސްކުރަނީ
ބައިނަލްއަގްވާމީ ގޮތުން ފާހަގަކުރާ މެރިޓައިމް ސޭފްޓީ ވީކް ނިންމުމުގެ ހަފްލާ ބާއްވައިފިއެވެ.
މި ހަފްތާ ރާއްޖޭގައި ފާހަގަކޮށްފައިވަނީ ސެޕްޓެމްބަރު 22 ވަނަ ދުވަހުން ފެށިގެން 29 ވަނަ ދުވަހަށެވެ.
ހަފްތާ ފާހަގަ ކުރުމުގެ ގޮތުން ކަނޑު އުޅަނދުފަހަރުގެ ސަލާމަތާ ރައްކާތެރިކަމާއި ތިމާވެށީގެ ރައްކާތެރިކަމާގުޅޭ މައުލޫމާތު ދިނުމުގެ ގޮތުން މާލޭ ނޯތު ހާބަރުގައި މިނިސްޓްރީގެ މުވައްޒަފުން ވަނީ ހަރަކާތްތެރިވެފައެވެ. މީގެ އިތުރުން ފުލުހުންނާއި އެމްއެންޑީއެފުން ވެސް ވަނީ މި ވީކް ފާހަގަކުރުމަށް ބައިވެރިވެފައެވެ.
މި ހަފްލާގައި ވާހަކަފުޅު ދައްކަވަމުން ޓްރާންސްޕޯޓް މިނިސްޓްރީގެ އެސިސްޓެންޓް ޑިރެކްޓަރު ހުސައިން ނަޒީރު ވިދާޅުވީ މި ޕްރޮގްރާމް ކާމިޔާބުކަމާއެކު ނިންމާލުމަށްޓަކައި ވަރަށް ގިނަ ބައެއްގެ އެހީތެރިކަން ލިބުނު ކަމަށެވެ.
މި ޕްރޮގްރާމުގެ ތެރެއިން ނޯތު ހާބަރުގައި ހުރި ހުރިހާ އުޅަނދުތައް ބަލާފާސްކުރިއިރު މައިގަނޑު ގޮތެއްގައި ފާހަގަކުރެވިފައިވަނީ ބައެއް އުޅަނދު ފަހަރުގައި ލައިފް ޖެކެޓް މަދުވުމާއި، ލައިފް ޖެކެޓްގައި ނަންބަރު ޖަހާފައި ނެތުމާއި، ލައިފް ރިންގި ނެތުމާއި ލައިފް ރިންގުގައި ހުންނަންޖެހޭ ވައު ގަނޑުތައް ހަރުކޮށްފައިނެތުން ކަހަލަ ކަންކަމެވެ. އަދި އެކަންކަން އުޅަނދުފަހަރުގެ ކެޕްޓަނުންނަށް ބުނެދީ އުޅަނދުތަކުގައި އެއްޗެހި ހަމަކޮށްފައިވާ ކަމަށް މިނިސްޓްރީން މައުލޫމާތު ދެއެވެ.
އެމްޕީއެލްގެ ޓީމުން ވެސް އެހީތެރިކަން ފޯރުކޮށްދީ، ދަތުރުވެރިން ސަލާމަތީ ކަންތައްތައް އަހުލުވެރި ކުރުވުމަށް ފުރިހަމައަށް މައުލޫމާތު ފޯރުކޮށްދީފައިވާ ކަމަށް އެމްއެންޑީއެފުން ވަނީ ފާހަގަކޮށްފައެވެ. އަދި މި މަސައްކަތް ރާއްޖޭގެ ބައެއް އަތޮޅުތަކުގައި ވެސް ކުރިއަށް ގެންދިޔަ ކަމަށް ފުލުހުން ވަނީ ބުނެފައެވެ.
މި ހަފުތާ ފާހަގަކުރުމުގެ މަގްސަދަކީ ކަނޑު އުޅަނދުފަހަރުގެ ސަލާމަތާ ރައްކާތެރިކަމާއި ތިމާވެށީގެ ރައްކާތެރިކަން އިތުރު ކުރުމަށް ހޭލުންތެރިކުރުވުމާއި ކަނޑު ދަތުރުފަތުރުގެ ސިނާއަތުގައި ހުރި ފުރުސަތުތައް ސްކޫލްތަކުގެ ދަރިވަރުންނަށް އަންގާދިނުން ކަމަށް ޓްރާންސްޕޯޓް މިނިސްޓްރީ އިން މައުލޫމާތު ދީފައިވެއެވެ.
