ހޯރަފުށީގެ މަގުތަކުގައި ތާރު އެޅުމުގެ މަސައްކަތް ފަށައިފި
މިއީ 71.90 މިލިއަން ރުފިޔާގެ މަޝްރޫއެއް
ހޯރަފުށީގެ މަގުތަކުގައި ތާރުއަޅަން ފެށުން
ހޯރަފުށީ މަގުތަކުގައި ތާރުއެޅުމުގެ މަސައްކަތް ފަށައިފިއެވެ.
މި މަސައްކަތް ރަސްމީކޮށް ފައްޓަވައިދެއްވީ މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމެވެ. ހޯރަފުށީ 11 މަގެއްގައި ތާރު އެޅުމަށް ހަމަޖެހިފައިވާއިރު، ބުރާސްފަތި ދުވަހު އެރަށުގައި ބޭއްވި ރަސްމިއްޔާތުގައި މިނިސްޓަރ އަސްލަމްގެ އިތުރުން، ހައުސިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީންގެ އިތުރުން، ހޯރަފުށީ ދާއިރާގެ މެންބަރު އަޙުމަދު ސަލީމާއި، އެމްޓީސީސީގެ ސީއީއޯ އާދަމް ޢާޒިމްގެ އިތުރުން ސަރުކާރުގެ ބައެއް އިސްފަރާތްތަކުން ބައިވެރިވެވަޑައިގަތެވެ.
ހޯރަފުށީގެ މަގުތައް ތަރައްގީކުރުމުގެ މަޝްރޫއަކީ މިނިސްޓްރީ އޮފް ނޭޝަނަލް ޕުލޭނިންގ ހައުސިންގ، އެންޑް އިންފްރާ ސްޓްރަކްޗަރގެ ފަރާތުން އެމްޓީސީސީއާ ހަވާލުކުރި މަޝްރޫއެކެވެ. މިއީ 71.90 މިލިއަން ރުފިޔާގެ މަޝްރޫއެކެވެ.
އެމްޓީސީސީން ހާމަކުރާގޮތުގައި، މަޝްރޫއުގެ ދަށުން 5303 މީޓަރުގެ 11 މަގު ތާރުއަޅައިގެން ތަރައްގީކުރެވޭނެއެވެ. އަދި 25،909 އަކަމީޓަރުގެ ސަރަޙައްދެއްގައި ސަބްބޭސް ތައްޔާރުކުރުމާއި، 25،909 އަކަމީޓަރުގެ ސަރަހައްދެއްގައި އޭބީސީ ފަށަލަ އެޅުމާއި، 11،113.80 އަކަމީޓަރުގެ ސަރަހައްދެއްގައި ފުޓްޕާތު ހެދުން ހިމެނެއެވެ. އަދި ފެންހިންދާ ނިޒާމެއް ގާއިމްކުރުމާއި، މަގުތަކުގައި ނިޝާން ހަރުކުރުމާއި، ސްޕީޑް ބްރޭކަރު ހަރުކުރުމުގެ އިތުރުން މަގުބައްތި ހަރުކުރުމުގެ މަސައްކަތްވެސް ހިމެނެއެވެ.
މި މަޝްރޫއު ނިންމުމަށް ހަމަޖެހިފައިވަނީ 470 ދުވަހުގެ ތެރޭގައެވެ.
