ތިލަދުންމަތީގެ ތިން ބޭފުޅަކު ދިވެހިންނަށް މިނިވަންކަން ހޯއްދަވައިދެއްވިއިރު މިއަދުގެ ރައީސުލްޖުމްހޫރިއްޔާ، އިބްރާހިމް މުޙައްމަދު ޞާލިހު ދިވެހިން ރަށްތަކުން މިނިވަންކުރައްވަމުން ގެންދަވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް މިފަދައިން ވިދާޅުވީ ރާއްޖެ ޓްރާންސްޕޯޓް ލިންކް(އާރުޓީއެލް) ގެ ފުރަތަމަ ފިޔަވަހި ނިންމައި ހއ. ހދ. އަދި ށ. އަތޮޅުގެ ރަށްތައް ފެރީގެ ނިޒާމުން ގުޅުވާލުން ފާހަގަ ކުރަން އަންގާރަ ދުވަހުގެ ރޭ ހއ. ދިއްދޫގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ. އެ ރަސްމިއްޔާތުގައި އާޒިމް ވިދާޅުވީ ރާއްޖޭގެ ރަށްތައް ކަނޑުމަގުން ގުޅުވާލުމަށް މި ސަރުކާރުން ކުރަމުން އަންނަ މަސައްކަތަކީ ޒަމާނުއްސުރެ ދިވެހިންގެ ސިކުނޑީގައި އޮތް ރަށު ބަންދުގެ ފިކުރުން މިންޖުވާނެ މަސައްކަތެއް ކަމަށެވެ. އަދި އާރުޓީއެލްއާއެކު މިއަދު ރައްޔިތުން ރަށު ބަންދުން ވީއްލި އެއް ރަށުން އަނެއް ރަށަށް ދަތުރު ކުރުމުގައި ލުއި ފަސޭހަތައް ލިބެން ފަށާފައިވާކަމަށް ވެސް އޭނާ ވިދާޅުވިއެވެ.
ރައީސްގެ ވިސްނުންފުޅު ހަގީގަތަކަށް ހެދުމުގެ މަސައްކަތް ހަލުވިކަމާއެކު ކުރިއަށްދާކަން ފާހަގަ ކުރައްވައި އާޒިމް ވިދާޅުވީ އާރުޓީއެލްއަކީ ރާއްޖޭގެ ތަރައްގީ އާ ޒަމާނަކަށް ވާސިިލް ކޮށްދޭނެ ޚިދުމަތެއް ކަމަށެވެ. އަދި މިއީ ރައްޔިތުންނަށް ދިމާވެފައި އޮތް އެންމެ ބޮޑު ތަކުލީފުން ރައްޔިތުން މިނިވަން ކޮށްދޭނެ ޚިދުމަތް ކަމަށް ވެސް އާޒިމް ފާހަގަކުރެއްވިއެވެ.
އަޅުގަނޑުމެންނަކީ ވަށައިގެން ކަނޑު އޮތުމުގެ ސަބަބުން ހަގީގަތުގައި ވެސް ރަށު ބަންދުގައި ތިބެން ޖެހިފައިވާ ބައެއް. ކޮންމެ ރުވަހަކު ރަށްފުށުގެ އަތިރިމައްޗަށް ނުކުމެ ރައްޔިތުން ފިކުރާވާ އެންމެ ބޮޑު ކަމަކީ ކޮބައިތޯ؟ ރަށުން ފުރައިގެން މިވެނިތަނަކަށް ދެވޭނީ ކޮން ދުވަހަކުންތޯއޭ. މި ސުވާލަށް ޖަވާބު ނުލިބި ދިވެހި ރައްޔިތުން މާޒީއަށް ދުކޮށްފައިވަނީ އެންމެ ގަރުނެއް ދެ ގަރުނެއް ނޫން. މިއަދާ ހަމައަށް މި ގައުމު ހިނގަމުން އައީ މިދެންނެވި ސުވާލަށް ޖަވާބެއް ނުލިބި އޮވެ. ނަމަވެސް މިއަދަކީ އިއްޔެއެއް ނޫން. މިއަދަށް މިއަލިވިލެނީ ދަތުރުފަތުރުގެ ހަގީގަތެއް. މި އުފާވެރި އާ ހަޔާތް ދިވެހިންނަށް ހޯއްދަވައިދެއްވި ޒަޢީމަކީ ރައީސް އިބްރާހިމް މުޙައްމަދު ޞާލިހު،އެމްޓީސީސީގެ ސީއީއޯ އާދަމް އާޒިމް
އާޒިމް އިތުރަށް ވިދާޅުވީ އާރުޓީއެލްގެ ފުރަތަމަ ފިޔަވަހީގެ ޚިދުމަތް ފަށާފައިވަނީ ޒަމާނީ އުޅަނދުތަކެއްގައި ކަމަށާއި އެ ޚިދުމަތް ދިނުމަށް ހުރިހާ މުވައްޒަފުންނަށް ވެސް ތަމްރީނުކޮށް ޚިދުމަތަށް ފައްކާ ކޮށްފައިވާނެ ކަމަށެވެ. އަދި ސަތަރި ފެރީން ދުނިޔޭގެ އެންމެ ފެންވަރު ރަނގަޅު ފެރީގެ ނިޒާމަށް ރައީސް ބަދަލު ކުރައްވާފައިވާ ކަމަށް ވެސް އޭނާ ވިދާޅުވިއެވެ.
ސަތަރި ފެރީން ސްޕީޑް ފެރީއަށް ބަދަލުވެ މިއަދު މިއޮތީ ދުނިޔޭގެ އެންމެ ފެންވަރު ރަނގަޅު ޒަމާނީ ފެރީގެ ނިޒާމަކަށް މަނިކުފާނު ބަދަލުކޮށްދެއްވާފައި. މި އާ ފެރީގެ ނިޒާމާއެކު ލޯންޗުފަހަރުގެ ދުވެލި މިވަނީ އިހުނަށްވުރެ ތިން ގުނަ މައްޗަށް ޖައްސާލާފައި. މަނިކުފާނުގެ ސްޕީޑުގައި،އެމްޓީސީސީގެ ސީއީއޯ އާދަމް އާޒިމް
އާޒިމް ވަނީ މުޅި ރާއްޖެ ފެރީގެ ނިޒާމަކުން ގުޅުވާލުމަށް ރައީސް ކުރައްވަމުން ގެންދަވާ މަސައްކަތުގެ މުހިންމުކަން ފާހަގަކުރައްވައި ރައީސްއަށް ޝުކުރު އަދާކުރައްވާފައެެވެ. އަދި މި ޚިދުމަތުގެ ސަބަބުން ރާއްޖޭގެ ރަށްތައް އިތުރަށް ތަރައްގީވެގެންދާނެ ކަމަށާއި ރަށްރަށުގެ ފަތުރުވެރިކަން ކުރިއަރައިގެންދާނެ ކަމަށް އޭނާ ވިދާޅުވިއެވެ.
އާރުޓީއެލް ފެރީގެ ޚިދުމަތް މިހާރު ތިން އަތޮޅެއްގައި ދެމުން އައި ނަމަވެސް ސަރުކާރުގެ އަމާޒަކީ 2024 ގެ ނިޔަލަށް މުޅި ރާއްޖެ މި ފެރީ ނިޒާމުން ގުޅުވާލުމެވެ. އެ މަސައްކަތުގެ ދަށުން ބޭނުންވާ އިތުރު ލޯންޗުތައް ބަނުމުގެ މަސައްކަތް ވެސް މިހާރު ވަނީ ފަށައިފައެވެ. އެގޮތުން ކުރިއަށް އޮތް ނުވަ މަހުގެ ތެރޭގައި އިތުރު ނުވަ އަތޮޅެއްގައި އާރުޓީއެލް ފެރީގެ ޚިދުމަތް ފެށުމަށް ދަނީ މަސައްކަތް ކުރަމުންނެވެ.
