މިފެންނަނީ، މިއަހަރުގެ މޭ މަހުގެ 29 ވަނަ ދުވަހު، އުކުޅަހުގާ އަޅުގަނޑު ހާމަ ކުރި ބަސްތަކުގެ، ޢަމަލީ ތަރުޖަމާ - ރައީސް
ތުރާކުނުގާ ހުރިމީހާ، ތުރާލެއްނެތި، ސީދާ ރާސްތާގައި، އިހަވަންދޫ، ކުޅުދުއްފުށި އަދި ފުނަދޫ މެދުވެރިކޮށް، މިހާރު އުނދަގުލަކާ ނުލާ، މާއުނގޫދޫ އަށް ވާޞިލުވެވޭނެ
އާރުޓީއެލް ފެރީގެ ހިދުމަތުގެ ތަޖުރިބާ ބެއްލެވުމަށް ރައީސް ފެރީއަށް އަރައިވަޑައިގަންނަވަނީ
މިފެންނަނީ، މިއަހަރުގެ މޭ މަހުގެ 29 ވަނަ ދުވަހު، އަރިއުތުރު އުކުޅަހުގާ އަޅުގަނޑު ހާމަ ކުރި ބަސްތަކުގެ، ޢަމަލީ ތަރުޖަމާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ބޮޑު ތިލަދުންމަތި ގުޅާލުމުގެ ނަމުގައި، ރާއްޖެ ޓްރާންސްޕޯޓް ލިންކުގެ ހިދުމަތް ރަސްމީކޮށް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސް ވިދާޅުވީ އުކުޅަހުގެ އެދުވަހާ، ދިއްދޫގެ މިދުވަހާ ދެމެދު، އަދި ކިރިޔާމިވީ އެންމެ 4 މަސް ކަމަށެވެ.
ރައީސް ވިދާޅުވީ މިސަރަޙައްދުގެ 41 ރަށް އަމުނާ، ގަތާ، ބަދަހިކުރަމުންދާ، އާރުޓީއެލްގެ ރޫޓް ތަކުން އެފެންނަނީ، މިދެންނެވި ހަމަހަމަކަން ކަމަށެވެ. އެދުވަހުވެސް، އަދި މިއަދުވެސް ދަންނަވަން އޮތީ، ހަމަ އެވާހަކަ ކަމަށެވެ. އެއީ މީސްކޮޅު މަދުވެ، ވަޞީލަތްތަށް އުނިވެ، ދުރުގާ އެކަހެރިވެ އޮތް ގާމަތީ ފެންލޮނު ރަށެއް، މިރާއްޖޭގާ ނޯންނާނެ ވާހަކަ ކަމަށެވެ.
ތުރާކުނުގާ ހުރިމީހާ، ތުރާލެއްނެތި، ސީދާ ރާސްތާގައި، އިހަވަންދޫ، ކުޅުދުއްފުށި އަދި ފުނަދޫ މެދުވެރިކޮށް، މިހާރު އުނދަގުލަކާ ނުލާ، މާއުނގޫދޫ އަށް ވާޞިލުވެވޭނެ ކަމަށް ރައީސް ވިދާޅުވިއެވެ. މިއީ މީގެ ކުރިން އޮތް، އަދި ލިބިދާނެ ކަމަށް ހީވެސް ނުކުރާ، ބޮޑު ފަސޭހަ އެއް ކަމަށާއި، ބޮޑު ތިލަދުންމަތި، ނުވަތަ ރާއްޖޭގެ އުތުރޭ ބުނެ ފުއްދާލެވޭ ވަރަށްވުރެ، ހުރިހާ ގޮތަކުންވެސް މިޞަރަހައްދު މުހިންމު ކަމަށެވެ.
އިހަވަންދިއްޕޮޅުގެ ވާހަކަ ރައީސް ފާހަގަކުރައްވާފައިވާއިރު، އިހަވަންދިއްޕޮޅުގައި އާގުބޯޓުފަހަރަށް ބަންކަރިންގެ ހިދުމަތް ދިނުމަށް ސަރުކާރުން ވަނީ މަސައްކަތް ފަށާފައެވެ. މި މަސައްކަތް ކުރުމަށް ބޭނުންވާ ދިރާސާތައް ހަދަމުން އަންނަ އިރު، މި އަހަރުގެ ތެރޭގައި މި މަސައްކަތް ފެށިގެންދާނެކަމަށް އިކޮނަމިކް މިނިސްޓަރ ފައްޔާޒު އިސްމާއިލް އާއި ޓްރާންސްޕޯޓް މިނިސްޓަރ އައިޝަތު ނަހުލާ ވަނީ ވިދާޅުވެފައެވެ.
