ސްޕެއިންގައި ހިމެނޭ ބާސެލޯނާގެ ކުޅުންތެރިންނަށް ކަކާގެ ތައުރީފު

ސްޕެއިންގެ ޤައުމީ ޓީމުގައި ހިމެނޭ ބާސެލޯނާގެ ކުޅުންތެރިންނަށް ކަކާ ތައުރީފުކޮށްފިއެވެ.

ރެއާލް މެޑްރިޑަށް ކުރިން ކުޅެފައިވާ ލެޖެންޑް މިހެން ބުނީ ސްޕެއިންގެ މީޑިއާއަކަށް ދިން އިންޓަވިޔުއެއްގައެވެ. ކަކާ ބުނީ ސްޕެއިންގައި ވަރަށް ރަނގަޅު ޓީމެއް އެބަ އޮތް ކަމަށާއި، ޚާއްސަކޮށް ޒުވާން ކުޅުންތެރިން ހިމެނޭ ކަމަށެވެ. އޭނާ ބުނީ ސްޕެއިންގެ ކޯޗު ލުއިސް އެންރީކޭ އަކީ ވަރަށް ކްރިއޭޓިވް ކޯޗެއް ކަމަށެވެ. ކަކާ ފާހަގަ ކުރި ގޮތުގައި ބާސެލޯނާ އަށް ނިސްބަތްވާ ސްޕެއިންގެ ގަވީ އަކީ އޭނާ އަށް ވަރަށް ކަމުދާ ކުޅުންތެރިޔެކެވެ. މީގެ އިތުރުން ކަކާ ބުނީ ޕެޑްރީ އަކީ ވެސް މުސްތަޤުބަލެއް އޮތް ވަރަށް މޮޅު ކުޅުންތެރިޔެއް ކަމަށެވެ.

އިތުރަށް ވާހަކަ ދައްކަމުން ކަކާ ބުނީ އޭނާ މިހާރު އަންނަނީ ޔުއެފާގެ ކޯޗިން ކޯހެއް ހަދަމުން ކަމަށާއި، ކުޅުން ހުއްޓާލިންސުރެ އޭނާ އަންނަނީ އެކަމަށް ތައްޔާރުވަމުން ކަމަށެވެ. ކަކާ ބުނީ ކުޅިވަރުގައި އޭނާ އެންމެ ގަޔާވަނީ ކުޅިވަރުގެ މެނޭޖްމަންޓަށް ކަމަށެވެ.

ރެއާލްގެ އިތުރުން ގިނަ ކުލަބުތަކަށް ކުޅެފައިވާ ކަކާ ވަނީ ގިނަ ކާމިޔާބީތަކެއް ވެސް ހޯދާފައެވެ. އޭނާ ވަނީ 2007 ވަނަ އަހަރު ބެލެންޑޯ އެވޯޑު ވެސް ހޯދާފައެވެ.