ނައިވާދޫ ފެނުގެ ނިޒާމުގެ މަސައްކަތް ނިންމާ ރަސްމީކޮށް ހިދުމަތްދޭން ފަށައިފި

ހދ. ނައިވާދޫގެ ފެނުގެ ނިޒާމުގެ މަސައްކަތް ނިންމާ ރަސްމީކޮށް ހިދުމަތްދޭން ފަށައިފިއެވެ.

މި ހިދުމަތް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ. ހިދުމަތް ރަސްމީކޮށް ފައްޓަވައިދެއްވުމުގެ ގޮތުން ރައީސް ވަނީ ފެން އިސްކުރު ދޫކޮށްދެއްވާފައެވެ.

މި މަޝްރޫއަކީ ސާސީ ކޮންސްޓްރަކްޝަން ޕްރައިވެޓް ލިމިޓެޑާއި ހަވާލުކޮށްގެން ކުރިއަށް ގެންގޮސްފައިވާ މަޝްރޫއެކެވެ. 15،398،304.77 (ފަނަރަ މިލިއަން ތިންލައްކަ ނުވަދިހަ އަށްހާސް ތިންސަތޭކަ ހަތަރު ރުފިޔާ ހަތްދިޔަ ހަތް ލާރި) އަށް މި މަސައްކަތް ހަވާލުކުރެވުނީ 29 ސެޕްޓެމްބަރ 2019 ގައެވެ. އަދި މި މަސައްކަތުގެ އަމަލީ މަސައްކަތް ފަށާފައިވަނީ 20 އޮކްޓޯބަރ 2019 ގައެވެ. މަސައްކަތް އެއްކޮށް ނިންމާލާފައިވަނީ 16 ޖޫން 2022 ގައެވެ.

ފެނުގެ ނިޒާމުގެ ދަށުން މައިގަނޑު ކުރެވުނު މަސައްކަތުގެ ތެރޭގައި ހިމެނެނީ 4.5 ކިލޯ މީޓަރުގެ ފެނުގެ ނިޒާމުގެ ވިއުގައެއް އެޅުމާއި، ދުވާލަކު 40 ޓަނުގެ ފެން އުފައްދާ 2 އާރުއޯ ޕްލާންޓް ބަހައްޓާފައިވެއެވެ. މީގެ އިތުރުން ފެން ރައްކާކުރުމަށް 185 ޓަނުގެ 2 ތާންގީ އަދި ވާރޭފެން ރައްކާކުރުމަށް 150 ޓަނުގެ ތާންގީއެއް ބަހައްޓާފައިވެއެވެ.

މީގެ އިތުރުން 174 ގޭގެއަށް ފެނުގެ ކަނެޝަން ގުޅައިދީފައިވެއެވެ.

ރައީސް ޞާލިހް ވަނީ މި ރަސްމިއްޔާތަށްފަހު ފެންޕްލާންޓް ހުންނަ އިމާރާތް ބައްލަވާލައްވާފައިވެއެވެ. ރައީސް ޞާލިހު ބޮޑުތިލަދުންމައްޗަށް ކުރައްވަމުން ގެންދަވާ މި ދަތުރުފުޅުގައި 4 ރަށަކަށް ވަޑައިގަންނަވާނެއެވެ. ނައިވާދޫގެ އިތުރުން އެމަނިކުފާނު ދެން ވަޑައިގަންނަވާނީ ހދ. ފިނޭ، ހއ. ދިއްދޫ އަދި ހއ. އުތީމަށް ވަޑައިގަންނަވާނެއެވެ.

އެމަނިކުފާނުގެ މި ދަތުރުފުޅުގައި ކެބިނެޓް މިނިސްޓަރުންނާއި، ސަރުކާރުގެ އިސްވެރިން ބައިވެރިވެވަޑައިގަންނަވައެވެ.