އޮސްޓްރިއާ ބަލިކޮށް ކްރޮއޭޝިއާ އެއްވަނައަށް
އޮސްޓްރިއާގެ މައްޗަށް 3-1 އިން ކުރި ހޯދައި ކްރޮއޭޝިއާ އިން ވަނީ އެއް ވަނައިގައި ޕޮއިންޓެއްގެ ލީޑު ނަގާފައި
ކްރޮއޭޝިއާ އިން ކުޅުނު މެޗުގެ ތެރެއިން
ޔުއެފާ ނޭޝަންސް ލީގުގައި އޮސްޓްރިއާގެ މައްޗަށް ކުރި ހޯދައި ކްރޮއޭޝިއާ އިން ގްރޫޕްގެ އެއް ވަނަ އަށް ޖެހިލައިފިއެވެ.
ގްރޫޕް އޭގައި އޮސްޓްރިއާއާ ދެކޮޅަށް ނުކުތްއިރު ކްރޮއޭޝިއާ އޮތީ ގްރޫޕްގެ ދެ ވަނަ މަގާމުގައެވެ. އޮސްޓްރިއާގެ މައްޗަށް 3-1 އިން ކުރި ހޯދައި ކްރޮއޭޝިއާ އިން ވަނީ އެއް ވަނައިގައި ޕޮއިންޓެއްގެ ލީޑު ނަގާފައެވެ.
އޮސްޓްރިއާގެ ހަޕެލް ސްޓޭޑިއަމްގައި ކުޅުނު ފުޓުބޯޅަ މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ކްރޮއޭޝިއާ އިންނެވެ. މެޗުގެ ހަ ވަނަ މިނެޓުގައި ވިކޮލާ ވްލަސިޗް ތަނަވަސްކޮށްދިން ފުރުސަތެއްގައި މި ލަނޑު ޖެހީ ކެޕްޓަން ލޫކަ މޮޑްރިޗްއެވެ. ނަމަވެސް އޭގެ ތިން މިނެޓު ފަހުން އޮސްޓްރިއާ އިން ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ ބާގަޓްނާއެވެ.
ކްރޮއޭޝިއާގެ ފަހު ދެ ލަނޑު ފެނުނީ މެޗުގެ ދެ ވަނަ ހާފުގައެވެ. މެޗުގައި އެ ޓީމަށް ދެ ވަނަ ފަހަރަށް ލީޑު ނަގައިދިނީ 69 ވަނަ މިނެޓުގައި މާކޯ ލިވާޖާއެވެ. އޭނާ މި ލަނޑު ޖެހީ އީވާން ޕެރިސިޗް ދިން ބޮޅައެއް ގޯލަށް ފޮނުވާލައިގެންނެވެ. އޭގެ ތިން މިނެޓު ފަހުން އެ ޓީމުގެ ތިން ވަނަ ލަނޑު ޖެހީ ޑެޖާން ލޮވްރެންއެވެ.
މެޗުން މޮޅުވެ ކްރޮއޭޝިއާ ގްރޫޕްގެ އެއް ވަނަ މަގާމުގައި އޮތީ ހަ މެޗުން 13 ޕޮއިންޓު ހޯދައިގެންނެވެ. ދެ ވަނައިގައި އޮތް ޑެންމާކަށް ހަ މެޗުން ލިބެނީ 12 ޕޮއިންޓެވެ. މި ގްރޫޕްގެ ތިން ވަނައިގައި ފަސް ޕޮއިންޓާއެކު ފްރާންސް އޮތް އިރު، ފުލުގައި އޮތް އޮސްޓްރިއާ އަށް ލިބެނީ ހަތަރު ޕޮއިންޓެވެ.
