ޚިދުމަތެއް ފަށަން ޖެހޭނީ އިގްތިސާދީ ހާލަތަށް ބަލައި ޚަރަދު ކުޑަކޮށް، އިލެކްޓްރިކް ބަސް ގެނައި ނަމަ އިތުރު 60 މިލިއަން ރުފިޔާ ޚަރަދު ކުރަން ޖެހުނީސް: އާޒިމް
ޑީސަލް ބަސް ގެނައީ ބަޖެޓް ތަންދޭވަރަކުން އިލެކްޓްރިކް ބަސް ގެންނަގޮތަށް
އެމްޓީސީސީގެ ސީއީއޯ އާދަމް އާޒިމް
އަލަށް ޚިދުމަތެއް ފަށާއިރު ދުނިޔެއާއި ޤައުމުގެ އިގްތިސާދީ ހާލަތަށް ވިސްނާ ޚަރަދު ކުޑަގޮތެއް ޚިޔާރު ކުރަން ޖެހޭ ކަމަށާއި، މިނީ ބަސް ގެނައުމުގައި ވިސްނާފައިވަނީ އެގޮތަށް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެ ޓީވީގެ "ފަލަސުރުޚީ" ގައި ވާހަކަދައްކަވަމުން އާޒިމް ވިދާޅުވީ މިނީ ބަހުގެ ޚިދުމަތް ފަށަން އިލެކްޓްރިކް ބަސް ނުވަތަ އީވީ ބަސް ގެނައުމަށް ނިންމި ނަމަވެސް ދުނިޔެއާއި ޤައުމުގެ އިގްތިސާދު ދަށްވެފައިވާ ހާލަތެއްގައި ޚަރަދު ކުޑަގޮތަކަށް ޚިދުމަތްތައް ފެށުމަށް ވިސްނަން ޖެހުނު ކަމަށެވެ. އެގޮތުން، ސަރުކާރާއި އެމްޓީސީސީއާ ގުޅިގެން ވިސްނީ މިފަދަ ހާލަތެއްގައި މިނީ ބަހުގެ ޚިދުމަތް ފަށަން އެންމެ ޚަރަދު ކުޑަގޮތަކީ ޑީސަލް ބަސްތައް ގެނައުން ކަމަށްވާތީ އެ ބަސްތައް ގެނައުމަށް ކަމަށެވެ. ނަމަވެސް ޚިދުމަތް ފަށައިގެން ބަޖެޓު ތަންދޭ ވަރަކުން އީވީ ބަސްތައް ގެނައުމުގެ މަސައްކަތް ކުރިއަށްދާނެ ކަމަށް ވެސް އާޒިމް ވިދާޅުވިއެވެ.
މިހާރު ވެސް 6 އީވީ ބަސް ގެނައުމުގެ މަސައްކަތް ކުރިއަށްދާކަން ފާހަގަކުރައްވައި އާޒިމް ވިދާޅުވީ އެފަދަ ބަސްތައް ގެންނަނަމަ އިންފްރާސްޓްރަކްޗަރއަށް ވެސް ބޮޑު ޚަރަދެއް ކުރަން ޖެހޭ ކަމަށެވެ. އެގޮތުން، އެ ބަސްތައް ޗާޖު ކުރާނެ ތަންތަން ހެދުން މީގެ ތެރޭގައި ހިމެނޭ ކަމަށް އޭނާ ވިދާޅުވިއެވެ. އަދި އެ ބަސްތައް އޮޕަރޭޓް ކުރުމަށް ހިނގާނެ ޚަރަދު ވެސް ޑީސަލް ބަސްތަކާ އަޅާ ބަލާއިރު އިތުރުވާނެ ކަމަށް އާޒިމް ވިދާޅުވިއެވެ.
މުސްތަގުބަލަކީ އީވީ ބަސްތައްކަން ގަބޫލު ކުރައްވާކަން ހާމަކުރައްވައި އާޒިމް ވިދާޅުވީ 30 މީހުންގެ ކެޕޭސިޓީގެ އީވީ ބަހަކަށް 5.5 މިލިއަން ރުފިޔާ ޚަރަދު ކުރަން ޖެހޭ ކަމަށެވެ. ނަމަވެސް އެވަރުގެ ޑީސަލް ބަހަކަށް ޚަރަދު ކުރަން ޖެހޭނީ 1.3 މިލިއަން ރުފިޔާ ކަމަށާއި އެގޮތުން މިހާރު ގެނެސްފައިވާ ޑީސަލް ބަސްތަކަށް 36 މިލިއަން ރުފިޔާ ޚަރަދުވެފައިވާއިރު އެ އަދަދަށް އީވީ ބަސްތައް ގެނައުމަށް އިންވެސްޓް ކުރި ނަމަ އިތުރަށް 60 މިލިއަނެއްހާ ރުފިޔާ ޚަރަދު ކުރަން ޖެހުނީސް ކަމަށް އޭނާ ވިދާޅުވިއެވެ.
އާޒިމް ވިދާޅުވީ މާލޭގައި މިނީ ބަހުގެ ޚިދުމަތް ފަށަން އުޅޭތާ 11 އަހަރުވެފައިވާއިރު އޭނާ އެމްޓީސީސީއާ ހަވާލުވެވަޑައިގެންނެވިތާ ދެ އަހަރު ތެރޭގައި ޚަރަދު ކުޑަކޮށް، ފުރިހަމަ ބަސްތަކަކާއެކު ޚިދުމަތް ފެށިފައިވާ ކަމަށެވެ.
ރާއްޖެ ޓްރާންސްޕޯޓް ލިންކް (އާރުޓީއެލް) ގެ ދަށުން މާލޭގައި މިނީ ބަހުގެ ޚިދުމަތް ފެށީ މި މަހުގެ 5 ވަނަ ދުވަހުއެވެ. އެ ޚިދުމަތަށް ބޮޑު ތަރުހީބެއް ލިބިފައިވާއިރު ދުވާލެއްގެ މައްޗަށް 9000 އާއި 10000 އާ ދެމެދުގެ އަދަދަކަށް މީހުން އެ ޚިދުމަތް ހޯދައެވެ.
އެމްޓީސީސީގެ މިނީ ބަހުގެ ޚިދުމަތަށް ގިނަ ބައެއް ތައުރީފު ވެސް ދަނީ ލިބެމުންނެވެ. އެގޮތުން، ކުރިން ހިނގާފައި އުޅުނު ފަރާތްތަކަށް މިހާރު ވަރަށް ބޮޑު ލުއިތަކެއް ލިބިއްޖެ ކަމަށާއި ޖީބަށް ވެސް ލުއިވެފައިވާ ކަމަށް ގިނަ ބަޔަކު ދަނީ ބުނަމުންނެވެ.
މާލޭގައި މިނީ ބަހުގެ ޚިދުމަތް ދިނުމަށް 18 ބަސް ބޭނުން ކުރެއެވެ. އަދި 40 ބަސް ސްޓޮޕް ހަދާފައިވާއިރު ކޮންމެ ބަސް ސްޓޮޕަކަށް 10 މިނެޓުން ބަސް ދަތުރުތައް ބާއްވައެވެ.
