މޯލްޑިވްސް ކަރެކްޝަނަލް ސަރވިސް (އެމްސީއެސް)އިން ގައިދީންނަށް ހިންގި ޑްރަގް ރިހެބިލިޓޭޝަންގެ ދެވަނަ ޕްރޮގްރާމަށް ގާތްގަނޑަކަށް 120 ގައިދީން ކުރިމަތިލާފައިވާކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން އިމްރާން ވިދާޅުވީ، ޑްރަގް ރިހެބިލިޓޭޝަންގެ ދެވަނަ ޕްރޮގްރާމަށް އެހާގިނަ ގައިދީން ކުރިމަތިލާފައިވާއިރު، ޖަލުގައި ހުރި ޖާގައިގެ ދަތިކަމުގެ ސަބަބުން ޕްރޮގްރާމް ހިންގޭނެކަމަށް ބެލެވެނީ 50 ގައިދީންނަށް ކަމަށެވެ.
ޖަލަކީ އަދިވެސް މަސްތުވާތަކެތި އެކި ގޮތްގޮތުން ވަންނަ ތަނެއްކަން ފާހަގަކުރައްވައި އިމްރާން ވިދާޅުވީ، މިއީ ރާއްޖެ ނޫނަސް ދުނިޔޭގެ އެހެން ގައުމުތަކުގައިވެސް މިކަން ހިނގާ ގޮތް ކަމަށެވެ. އެހެންނަމަވެސް އެކަން ރަނގަޅުކަމަށް ބުނަނީ ނޫން ކަމަށާއި، އެކަންކަމުން ސަލާމަތްވުމަށްޓަކައި ވަރަށް ގިނަ ކަންތައްތައް ކުރަން ހުރިކަމަށް އިމްރާން ވިދާޅުވިއެވެ.
ރިހެބިލިޓޭޝަން ހިންގަން ކަނޑައެޅި ޔުނިޓަކީ ޑްރަގް ފްރީ ޒޯނަކަށް ހަދަން ވަރަށް މަސައްކަތް ކޮށްފައިވާ ކަމަށާއި އެ ޔުނިޓްގައި ސެކިއުރިޓީ ވަރަށް ބޮޑަށް މަތިކޮށްފައިވާ ކަމަށް ވެސް ވިދާޅުވިއެވެ.
އިމްރާން އިތުރަށް ވިދާޅުވީ ޑްރަގް ރިހެބިލިޓޭޝަންގެ ދެވަނަ ޕްރޮގްރާމު ފެށޭއިރު އެތަނަށް ގެންނަންޖެހޭ ބަދަލުތަކާއި ގުޅޭގޮތުން ކޮމިޝަނަރ އޮފް ޕްރިޒަންސް އަހްމަދު މުހައްމަދުފުޅާ މަޝްވަރާ ކުރައްވާފައިވާ ކަމަށެވެ. މީގެއިތުރުން ޑްރަގް ރިހެބިލިޓޭޝަންގެ ފުރަތަމަ ޕްރޮގްރާމުގައި ގައިދީން ޖެއްސި މައްސަލަތަކާއި ފާހަގަކޮށްފައިހުރި ކަންތައްތައް ރަނގަޅުކުރުމަށްފަހު ނޮވެމްބަރު މަހުގެ ތެރޭގައި ދެވަނަ ޕްރޮގްރާމް ފަށާނެ ކަމަށްވެސް ވިދާޅުވިއެވެ.
މި ޕްރޮގްރާމަކީ މަސްތުގެ ވަބާގައި ޖެހިފައިވާ ގައިދީން ރިހެބިލިޓޭޓްކޮށް، ބޭނުންތެރި ބައެއްގެ ގޮތުގައި މުޖުތަމައަށް އަނބުރާ ނެރުމަށް އެ ފަރާތްތައް ޑިޓޮކްސްކޮށް ޑްރަގް ޓްރީޓްމަންޓު ދިނުމާއި، ދިރިއުޅުމުގެ ހުނަރުތަކާއި ވަޒީފާ އަދާކުރުމަށް ބޭނުންވާ ހުނަރުތައް ދަސްކޮށްދިނުމަށް ހިންގާ ޕްރޮގްރާމެކެވެ.
މަސްތުވާތަކެއްޗާ ގުޅިގެން ހުކުމް ތަންފީޒުކުރަމުންދާ 40 ގައިދީންނާއި އެކު މި ޕްރޮގްރާމް ފެށި ނަމަވެސް، އެކި ސަބަބުތަކާހުރެ މި ޕްރޮގްރާމް ކާމިޔާބުކަމާއެކު ފުރިހަމަކޮށްފައިވަނީ 32 ގައިދީންނެވެ.
ރިހެބިލިޓޭޝަން ޕްރޮގްރާމް މިހާރަށްވުރެ ފުޅާކޮށް، ބައިވެރިންގެ އަދަދު ގިނަ ކުރުމުގެ ގޮތުން މާފުށީ ޖަލުގައި އަދި އައްސޭރި ޖަލުގައި ވަކި އިމާރާތެއް އެޅުމުގެ މަސައްކަތް ކުރިއަށްދާ ކަމަށާއި އަންދާޒާއަކީ މިއަހަރު ނިމުމުގެ ކުރިން އިމާރާތްތައް ނިމި، އެތަން ބޭނުންކުރަން ފެށޭނެކަމަށް ކޮމިޝަނަރ އޮފް ފްރިޒަންސް ވަނީ ވިދާޅުވެފައެވެ.
