ތިލަފުށީގެ އަލިފާނުގެ ހާދިސާއާ ގުޅިގެން ކުރިއަށް އޮތް ހަފްތާއެއްހާ ދުވަހު ބޯކޮށް ދުން އެރުން އެކަށީގެންވޭ: ވެމްކޯ
21 ސެޕްޓެމްބަރު 2022 | ބުދަ 16:00އަލިފާން ނިންވާލެވުނު ނަމަވެސް ދުން އަރަމުންދޭ
ކ. ތިލުފުށީގައި ހިނގި އަލިފާނުގެ ހާދިސާ
ކ. ތިލުފުށީގައި ހިނގި އަލިފާނުގެ ހާދިސާއާ ގުޅިގެން ކުރިއަށް އޮތް ހަފްތާއެއްހާ ދުވަހު ބޯކޮށް ދުން އެރުން އެކަށީގެންވާކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.
ތިލަފުށީ ކުނިގޮނޑުގައި އަލިފާނުގެ ހާދިސާއެއް ހިނގައިގެން އެމްއެންޑީއެފް ފަޔަރ އެންޑް ރެސްކިއު ސަރވިސްއާއި އެމްއެންޑީއެފް މާލެ އޭރިއާ ކޯސްޓްގާޑް ސެކަންޑް ސްކޮޑްރަންގެ ސިފައިން ހަރަކާތްތެރިވެފައިވާއިރު މި ހާދިސާގެ ރިޕޯޓް ލިބިފައި ވަނީ ބުދަ ދުވަހުގެ 13:47 އެހާއިރު ކަމަށް އެމްއެންޑީއެފް އިން ބުންޏެވެ.
ވެމްކޯ އިން ނެރުނު ބަޔާނެއްގައި ބުނީ އެ ކޯޕަރޭޝަންގެ ފަރާތުން ތިލަފުށީގައި ކުނި މެނޭޖްކުރުމަށް ކުރެވޭ މަސައްކަތްތަކުގައި ދުވާލެއްގެ މައްޗަށް 500 ޓަނަށްވުރެން ގިނަ ކުނި، ޕްރޮސެސްކޮށް ބޭލް ކުރަމުންދާ ކަމަށެވެ. ނަމަވެސް ތިލަފުއްޓަށް ގެނެވޭ ކުނީގެ އަދަދު އިތުރުވެފައިވުމާއި ކުނި މެނޭޖްކުރުމަށް ކުރެވޭ މަސައްކަތް އިތުރުވެފައިވާތީ ވަގުތީ ގޮތުން ކުނި ބަހައްޓަމުން އަންނަނީ ތިލަފުށީގެ ކުނިފުންޏާއި ކީވޯލް އާއި ދެމެދު ކަމަށެވެ.
ވަގުތީ ގޮތުން ކުނި ބަހައްޓާ އެ ސަރަހައްދުގައި އަލިފާނުގެ ހާދިސާއެއް ހިނގާފައިވާއިރު އަލިފާން ނިންވާލެވުނު ނަމަވެސް ދުން އަރަމުންދާކަމަށް ވެމްކޯ އިން ބުންޏެވެ. އަދި ކުރިއަތް އޮތް ހަފްތާއެއްހާ ދުވަހު އެ ސަރަހައްދުން އަލިފާންފެނި ބޯކޮށް ދުންއެރުމަކީ އެކަށީގެންވާ ކަމެއް ކަމަށާއި އެންމެން އެކަމަށް ސަމާލުވުމަށް ވަނީ އެދިފައެވެ.
ވެމްކޯ އިން އިތުރަށް ވަނީ ތިލަފުއްޓަށް ކުނި ގެންދާ އުޅަނދުތަކުން ކަނޑައަޅާފައިވާ އުސޫލުތަކާއި އެއްގޮތަށް ކުނި ގެންދިޔުމަށާއި އެ ސަރަހައްދުގައި އަލިފާނުގެ ހާދިސާއެއް ހިނގާނެފަދަ އެއްވެސް އަމަލެއް ނުކުރުމަށް ތަކުރާރުކޮށް ނަސޭހަތްތެރިވެފައެވެ.
ތިލަފުށީ ކުނިގޮނޑުން ދުން އެރުން ހުއްޓުވައި، ކުނި މެނޭޖްކުރުމަށް މިނިސްޓްރީ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޯލޮޖީއާ ސަރުކާރުގެ ސިޔާސަތުތަކާ އެއްގޮތަށް ކުނި މެނޭޖްކުރުމަށް ކުރަމުންދާ މަސައްކަތްތައް އިތުރަށް ހަރުދަނާކޮށް، ތިލަފުށީ ވޭސްޓް މެނޭޖްމަންޓް ފެސިލިޓީއަކީ ރައްކާތެރިކަމާއެކު ކުނި ނައްތާލެވޭ ތަަނަކަށް ހެދުމަށް ކުރެވޭ މަސައްކަތްތައް ކުރިއަށް ގެންދާނެ ކަމަށް ވެމްކޯ އިން ވަނީ ބުނެފައެވެ.
