މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އަސާސީ ގަވާއިދު އެކުލަވާލައި އާންމުކޮށްފިއެވެ.

އަސާސީ ގަވާއިދފު އެކުލަވާލައި އާންމުކޮށްފައިވަނީ ދާދި ފަހުން ކުރިއަށްގެންދިޔަ އެމްޑީޕީގެ ކޮންގްރެސްގައި ހުށަހެޅުނު އިސްލާހުތަކަކާއެކުއެވެ. މިގޮތުން އަސާސީ ގަވާއިދަށް 11 އިސްލާހެއް ގެނައުމަށް ކޮންގްރެސްއަށް ހުށަހަޅާފައިވެއެވެ.

އެ އިޞްލާހުތަކަށް ކޮންގްރެސްމަނުންގެ މެދުގައި މަޝްވަރާކުރުމަށްފަހު އިތުރު އިޞްލާހުތައްވެސް ހުށައެޅިއެވެ. އޭގެ ތެރެއިން ތާއީދު ލިބި ވޯޓު މަރުހަލާ އާއި ހަމައަށް 6 އިސްލާހެއް ދިޔަ އިރު އޭގެ ތެރެއިން އެއް އިސްލާހު ހުށަހެޅި ފަރާތުން އެ އިސްލާހު އަނބުރާ ގެންދިޔުމުން އެ އިސްލާހަށް ވޯޓަށް އަހާފައެއް ނުވެއެވެ.

މައިގަނޑުގޮތެއްގައި ހުށަހަޅާފައިވާ އިސްލާހުތަކުގެ ތެރޭގައި ހިމެނެނީ ހިންގުމުގައި ހުރި ދަތިތަކާ ގުޅޭ އިސްލާހުތަކެވެ.

އެމްޑީޕީގެ ކޮންގްރެސްގައި އެ ޕާޓީގެ ގޮފިތައް މިހާރުވެސް އަމަލުކުރާ އުސޫލުން ބޭއްވުމަށް އެމްޑީޕީގެ އެންމެ އިސްލީޑަރު އަދި ރައީސުލްޖުމްހޫރިއްޔާ ވަނީ އިސްލާހެއް ހުށަހަޅުއްވާފައެވެ. އެ އިޞްލާހާއި އެއްކޮޅަށް 901 މެމްބަރުން އަދި ދެކޮޅަށް 1 މެމްބަރަކު ވަނީ ވޯޓު ދެއްވާފައެވެ. ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވަނީ އެމްޑީޕީގެ އެތެރޭގައި ތިންކް ޓޭންކެއް އުފައްދަވަން އެމްޑީޕީގެ އިސްލާހެއް ހުށަހަޅުއްވާފައެވެ. ފިނޭންސް މިނިސްޓަރު އިބްރާހީމް އަމީރު ތާޢީދުކުރައްވާފައިވާ އެ އިސްލާހު ވެސް ވަނީ ފާސްވެފައެވެ. އެ އިސްލާހާއި އެއްކޮޅަށް 915 މީހުން ވޯޓު ދިނެވެ. އަދި އެ އިސްލާހާއި ދެކޮޅަށް 3 މީހުން ވަނީ ވޯޓު ދީފައެވެ.

މީގެ އިތުރުން އެމްޑީޕީގެ ނައިބު ރައީސުންނަކީ އެޕާޓީގެ ޤައުމީ މަޖިލީހުގެ ރުހުމާއެކު އައްޔަން ކުރާ ބަޔަކަށް ހެދުމަށް ވަނީ ހުށަހަޅާފައެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރަކު ކޮންގްރެސްގައި ހިމަނަން ކޮންގްރެސް އަށް ވަނީ ހުށަހަޅާފައެވެ. ކޮންގްރެސް އިން ވަނީ އެ އިސްލާހުތައް ވެސް ފާސްކޮށްފައެވެ.

ކޮންގްރެސްގައި ފާސްކުރި އިސްލާހުތަކާއެކު އަސާސީ ގަވާއިދު އެކުލަވާލާފައިވާއިރު ޕާޓީގެ ހުރިހާ މެމްބަރުންވެސް އަސާސީ ގަވާއިދާ އެއްގޮތަށް އަމަލުކުރަންޖެހެއެވެ.