ތުއްތު ކުއްޖަކު މަރާލި މާމައާއި ދޮންކާފަ 10 އަހަރަށް ޖަލަށް
ދައުވާތަކަށް ދެމީހުންވެސް އިންކާރުކުރޭ
ކްރިމިނަލް ކޯޓް
ށ. ފޭދޫގައި ތުއްތު ކުއްޖަކު މަރާލި މައްސަލަ އެކުއްޖާގެ މާމައާއި ދޮންކާފަގެ މައްޗަށް ސާބިތުވެ، 10 އަހަރަށް ޖަލަށް ލާން ހުކުމްކޮށްފިއެވެ.
ށ. ފޭދޫގައި 15 އަހަރުގެ ކުއްޖަކު ވިހެއި ދަރިފުޅު މަރާލުމަށްފަހު އެގޭގެ ގިފިލި ތެރޭގައި އެ ކުއްޖާ ވަޅުލި މައްސަލައިގެ ޝަރީއަތް ކްރިމިނަލް ކޯޓުގައި ހޯމަ ދުވަހު ވަނީ ކުރިއަށް ގެންގޮސްފައެވެ.
މި މައްސަލައިގައި އެކުއްޖާގެ މާމައާއި ދޮންކާފަގެ މައްޗަށް ދައުލަތުން ކުރާ، ކުއްޖަކު މެރުމުގެ ކުށުގެ ދަޢުވާއަށް ދެމީހުންވެސް ވަނީ އިންކާރުކޮށްފައެވެ. އެހެންނަމަވެސް މި މައްސަލާގައި ދައުލަތުން ހުށަހަޅާފައިވާ ހެތްކާއި ޤަރީނާއަށް ބަލާއިރު، މިއީ ޝައްކެއްނެތް މިންވަރަށް ޝަރީއަތަށް ސާބިތުވެފައިވާ މައްސަލައެއްކަމުގައި ވަނީ ކަނޑައަޅާފައެވެ.
އެހެންކަމުން ގަސްތަކާއި ނުލައި މީހަކު މެރުމުގެ ކުށް އެ ދެ މީހުންގެ މައްޗަށް ސާބިތުވެ، 10 އަހަރާއި 6 މަސްދުވަހުގެ މުއްދަތަށް ޖަލަށްލުމަށް ވަނީ ހުކުމްކޮށްފައެވެ. އަދި މަރުގެ ދިޔައިގެ ގޮތުގައި އެއް މިލިއަން ރުފިޔާ ކަނޑައަޅައި، އެއް އަހަރު ދުވަހުގެ ތެރޭގައި އެ ފައިސާ ސިވިލް ކޯޓަށް ދެއްކުމަށް ވަނީ އަންގާފައެވެ. އަދި ކުށުގެ ކައްފާރާއެއްގެ ގޮތުގައި ޖެހި ޖެހިގެން 60 ދުވަހު ރޯދަ ހިފުމަށް ހުކުމްކޮށްފައިވެއެވެ.
މި މައްސަލައިގައި އެ ދެމީހުން ހައްޔަރުކުރިތާ ގިނަ އަހަރުތަކެއް ވެފައިވާއިރު، ބަންދުގައި ތިބި މުއްދަތު ޖަލު ހުކުމުން އުނިކުރުމުން އެމީހުން ޖަލު ހުކުމުގެ ގޮތުގައި ތަންފީޒުކުރަންޖެހޭނީ މަދު ދުވަސްކޮޅެކެވެ.
މި މައްސަލައިގައި ތުއްތު ކުއްޖާގެ މަންމައަށް ޒިނޭގެ ދައުވާކުރިނަމަވެސް ހައި ކޯޓުން ފަހުން ވަނީ އެ ހުކުމް ބާތިލްކޮށްފައެވެ.
