ވެށި ސާފުކޮށް ބޭއްވުމަށް ފަރުދީ ޒިންމާ އަދާކުރުން މުހިއްމުކަމަށް ނައިބުރައީސް ފައިސަލް ނަސީމް ވިދާޅުވެއްޖެއެވެ.
ހުޅުމާލެ ސާފު ކުރުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން އިންތިޒާމުކޮށްގެން ކުރިއަށް ގެންދިޔަ ކެމްޕޭން ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ނައިބުރައީސް ވިދާޅުވީ، "ވޯލްޑް ކްލީންއަޕް ޑޭ"ގެ ގޮތުގައި މި ހަރަކާތް ކޮންމެ އަހަރަކުވެސް ގާތްގަނޑަކަށް 190އެއްހާ ގައުމެއްގައި ކުރިއަށްދާކަމަށެވެ.
އެންމެ ފުރަތަމަ މި ހަރަކާތް ކުރިއަށް ގެންގޮސްފައިވަނީ މީގެ 4 އަހަރު ކުރިންކަމުގައިވީނަމަވެސް، އަބަދުވެސް އެކި ނަންނަމުގައި ވެށި ސާފު ކުރުމުގެ ޕްރޮގްރާމްތައް ކުރިއަށްދާކަމަށް ނައިބުރައީސް ވިދާޅުވިއެވެ.
ނައިބުރައީސް ވިދާޅުވީ، ވެށި ސާފު ކުރުމަކީ ކޮންމެ ދުވަހަކުވެސް ކުރަންޖެހޭ ކަމެއް ކަމަށެވެ. އެގޮތުން ވަށައިގެންވާ ނާޒުކު ތިމާވެށި ރައްކާތެރިކޮށް، އަންނަން އޮތް ޖީލުތަކަށް ވާސިލު ކޮށްދޭން ޖެހޭކަން ފާހަގަކުރައްވައި ނައިބުރައީސް ވިދާޅުވީ، އަބަދުވެސް ވެށީގެ ސާފުތާހިރުކަމަށް އިސްކަންދޭންޖެހޭ ކަމަށެވެ.
ވެށި ސާފު ކުރުމުގައި ފަރުދީ ޒިންމާ އަދާކުރާ ރޯލުގެ މުހިއްމުކަންވެސް ނައިބުރައީސްގެ ވާހަކަފުޅުގައި ފާހަގަ ކުރެއްވިއެވެ.
ހަގީގަތަކީ އަޅުގަނޑުމެން މިއަދު މި ސާފުކުރާ ކުންޏަކީ ކޮންމެވެސް ބައެއްގެ އަތުން އުކާލެވޭ ތަކެތި. މިފަދަ ޕްރޮގްރާމެއްގެ ތެރެއިންވެސް އަޅުގަނޑުމެން ވިސްނަންވީ، ކުރިއަށް އޮތް ތަނުގައި، މުސްތަގުބަލުގައިވެސް އަޅުގަނޑުމެންގެ ވެށި ސާފުކޮށް ބޭއްވުމަށް ފަރުދީ ޒިންމާ އަދާކުރަން.ނައިބުރައީސް
އޭގެ އިތުރުން، ކުނި އުކާލުމުގައިވެސް ހެދިފައިވާ އުސޫލުތަކާއި މިންގަނޑުތަކަށް އަމަލުކުރުމަށް ނައިބްރައީސް ވަނީ ހަނދާންކޮށްދެއްވާފައެވެ.
ސާފުތާހިރުކަމަކީ ބައެއްގެ ދިރިއުޅުމުގެ ކަންކަން ހުންނަ ގޮތް މިނެކިރޭނެ މިންގަނޑެއްކަމަށް ނައިބުރައީސް ވިދާޅުވިއެވެ. އެކަން ދުނިޔޭގެ ގައުމުތަކުންވެސް ފެންނަކަން އެމަނިކުފާނު ފާހަގަ ކުރެއްވިއެވެ.
މީގެ ކުރިން ދުވަހަކުވެސް ގޯސްނުވާ މިންވަރަށް މޫސުމަށް އަންނަ ބަދަލުތަކުގެ މައްސަލަތައް ގޯސްވެފައިވާކަން ފާހަގަކުރައްވައި އެމަނިކުފާނު ވަނީ، ކުނި މެނޭޖްކުރުމަށް ޚާއްސަ ސަމާލުކަމެއް ދިނުމަށް އިލްތިމާސްކުރައްވާފައެވެ. އެކަމަށްޓަކައި ކުރިއަށްވުރެ ބޮޑަށް މަސައްކަތްތަކެއް ކުރަންޖެހޭކަމަށް އެމަނިކުފާނު ވިދާޅުވިއެވެ.
ނައިބުރައީސް ވަނީ، ވެށީގެ ސާފުތާހިރުކަމަށްޓަކައި މަސައްކަތްކުރާ ހުރިހާ ފަރާތްތަކަށްވެސް ޝުކުރު އަދާކުރައްވާފައެވެ. އަދި މަގުމައްޗާއި އާންމު ތަންތަނަށް ކުނި އުކާނުލުމަށް ޚާއްސަ އިސްކަމެއް އަބަދުވެސް ދިނުމަށް އެމަނިކުފާނު އެދިވަޑައިގެންނެވިއެވެ.
