ކޯލިޝަނަށް އައުމަށް އެެއްބަސްވި ހުރިހާ ކަމަކަށް ސަރުކާރުން އަމަލުކުރަމުންދާ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
މިއުވާން މިފަދައިން ވިދާޅުވީ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި "ރާއްޖެޓީވީ" އިން ދެންނެވި ސުވާލަކަށް ޖަވާބުދެއްވަމުންނެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ސަރުކާރު ކޯލިޝަންގައި ހިމެނޭ ޖުމްހޫރީޕާޓީގެ ލީޑަރު ގާސިމް އިބްރާހިމް ވަނީ އެމްޑީޕީއަކުން އަދި ސަރުކާރުން ވެސް ރަސްމީކޮށް ކޯލިޝަން މިހާރު ނެތްކަމަށް ވިދާޅުނުވާ ކަމަށް ވިދާޅުވެފައެވެ. ނަމަވެސް، ހަގީގަތަކީ އެއްބަސްވެފައި އޮތް އެއްބަސްވުމާއި ގާތަށް، 90 އިންސައްތަ ވެސް ފުރިހަމަ ވެފައި ނުވުން ކަމަަަށް އޭނާ ވިދާޅުވިއެވެ. އެ ޕްރޮގްރާމްގައި ވާހަކަދައްކަވަމުން ގާސިމް ވަނީ ވެރިކަން ކާމިޔާބުކުރެވޭނީ ކޯލިޝަނެއް އޮވެގެން ކަމަށް ވެސް ވިދާޅުވެފައެވެ. އެހެން ނަމަވެސް ވެރިކަން ލިބުމަށްފަހު ކޯލިޝަނެއް އޮތުމެކޭ ނެތުމެކޭ އެއްގޮތް ކަމަށް ވިދާޅުވެ ގާސިމް ވަނީ އެކަމާއި މެދުގައި ކަންބޮޑުވުން ފާޅުކުރައްވާފައެވެ.
އެކަމާއި ގުޅިގެން މިއުވާން ވިދާޅުވީ ވަކި އިންސައްތަ އެއް ވިދާޅުވުމަށް ފަހު ކޯލިޝަން އެއްބަސްވުމަށް އަމަލު ނުކުރާ ކަމަށް ގާސިމް ވިދާޅުވުމުން، ކޯލިޝަން އެގްރީމެންޓާއި އެއްގޮތަށް ނުހިނގަނީ ކޮންކަމެއްކަން ސާފުނުވާ ކަމަށެވެ. ނަމަވެސް އެއްބަސްވުމާއި އެއްގޮތަށް ނުހިނގާ ކަމެއް އޮތް ނަމަ އެކަމެއް ފާހަގަކޮށްފި ނަމަ، އެ ކަމަަށް ސަރުކާރުން ހައްލު ހޯއްދަވައިދެއްވާނެ ކަމަށް މިއުވާން ވިދާޅުވިއެވެ.
ރައީސް އިބްރާހިމް މުހައްމަދު ސާލިހްގެ ސަރުކާރުން ވެރިކަމަށް ވަޑައިގަންނަވާފައި ވަނީ ގުޅިފައިވާ ޕާޓީތަކާއި އެކު ކޯލިޝަން ހައްދަވައިގެންނެވެ. އެމްޑީޕީ އިސްވެ އޮވެ އުފެއްދި އެ ކޯލިޝަންގައި ޖުމްހޫރީ ޕާޓީގެ އިތުރުން އަދާލަތު ޕާޓީ އަދި މޯލްޑިވްސް ރިފޯމް މޫވްމަންޓެވެ.
