ނިހާނަށް ކުރާ ދައުވާތައް މައުޟޫއީ ގޮތުން ކުރިއަށް ގެންދެވޭނެކަމަށް ނިންމައި ޝަރީއަތް ފަށަން ތައްޔާރުވެއްޖެ
ދިފާއީ ހެކިންގެ ގޮތުގައި ހުށައަޅާފައިވާ ބައެއް ހެކިން ޝަރީއަތަށް ބަލައިގަތުމަށްވެސް ޝަރީއަތުން ނިންމާފައިވޭ
ވިލިލާމެ ދާއިރާގެ ކުރީގެ މެމްބަރު އަދި ޕީޕީއެމްގެ ކުރީގެ ޕީޖީ ލީޑަރު އަޙުމަދު ނިހާން ޙުސައިން މަނިކު
ވިލިލާމެ ދާއިރާގެ ކުރީގެ މެމްބަރު އަދި ޕީޕީއެމްގެ ކުރީގެ ޕީޖީ ލީޑަރު އަހުމަދު ނިހާން ހުސައިން މަނިކުގެ މައްޗަށް އުފުލާފައިވާ ދައުވާތައް މައުޟޫއީ ގޮތުން ކުރިއަށް ގެންދެވޭނެކަމަށް ނިންމައި، އެ މައްސަލައިގެ ޝަރީއަތް ފެށުމަށް ނިންމައިފިއެވެ.
މި މައްސަލައިގެ ބުރާސްފަތި ދުވަހުގެ އަޑުއެހުމުގައި އޮތީ ޝަރީއަތުގެ ކުރީގެ ހުށައެޅުންތަކަށް ގޮތެއް ނިންމުމެވެ. އެގޮތުން މި މައްސަލައިގައި ހުށައަޅާފައިވާ ބައެއް ދައުވާތަކާއި ގުޅިގެން ދިފާއީ ހެކިންގެ ގޮތުގައި ހުށައަޅާފައިވާ ބައެއް ފަރާތްތަކަކީ ދައުލަތުން ކޮށްފައިވާ ދައުވާއާއި ގުޅުން ނެތް ފަރާތްތަކެއްކަމަށް ބުނެ ހުށައަޅާފައިވާ ބައެއް ހުށައެޅުންތައް ޝަރީއަތުން ވަނީ ބަލައިގެންފައެވެ.
އޭގެ ތެރޭގައި ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙާއި، ނައިބް ރައީސް ފައިސަލް ނަސީމްގެ އިތުރުން، ޔޫތު މިނިސްޓަރު އަހުމަދު މަޙުލޫފާއި، އޭރު ޕީޕީއެމް ޕީޖީ ގްރޫޕުގެ މެމްބަރުންނާއި، ރައްޔިތުންގެ މަޖިލީހުގެ މާލިއްޔަތު ކޮމިޓީގައި އޭރު އުޅުއްވި އިތުރު މެމްބަރުން ހިމެނެއެވެ.
އެހެންނަމަވެސް، ދައުލަތުން ކޮށްފައިވާ ބައެއް ދައުވާތަކާއި ގުޅިގެން ދިފާއީ ހެކިންގެ ގޮތުގައި ހުށައަޅާފައިވާ ބައެއް ހެކިން ޝަރީއަތަށް ބަލައިގަތުމަށްވެސް ޝަރީއަތުން ނިންމާފައިވެއެވެ.
މި މައްސަލައިގައި ދިފާއީ ހެއްކެއްގެ ގޮތުގައި މިހާރުގެ ޕްރޮސެކިއުޓަރު ޖެނެރަލް ހުސައިން ޝަމީމްވެސް ހުށައަޅާފައިވެއެވެ. އެއީ ޝަމީމްގެ ޓްވިޓަރ އެކައުންޓުން 30 އޮކްޓޯބަރުގައި ކުރައްވާފައިވާ ޓްވީޓަކީ އޭނާ ކުރެއްވި ޓްވީޓެއްކަމާއި، އޭގެ ސައްޙަކަން ސާބިތު ކޮށްދިނުމަށެވެ. އެގޮތުން އެ ޓްވީޓަކީ އަދީބުގެ މޯބައިލް ފޮރެންސިކް ރިޕޯޓާއި ގުޅިގެން ދިފާއުން ސާބިތުކޮށްދޭން ބޭނުންވާ ކަންކަމަށް މުހިއްމު ހެއްކެއްގެ ގޮތުގައި ބަޔާންކޮށްފައިވެއެވެ.
އެ ހެކި ބަލައިނުގަތުމަށް ދައުލަތުން އެދުނު ނަމަވެސް، ޝަރީއަތުން ނިންމީ އެއީ ޝަރީއަތަށް ބަލައިގަނެވޭނެ ހެއްކެއް ކަމަށެވެ. ހަމަ އެގޮތަށް އަހުމަދު މަޙުލޫފު 9 އޯގަސްޓު 2021 ގައި ކުރެއްވި ޓްވީޓަކާއި ގުޅިގެންވެސް ދިފާއީ ހެއްކެއްގެ ގޮތުގައި އޭނާ ބަލައިގަތުމަށް ޝަރީއަތުން ނިންމެވިއެވެ.
މި މައްސަލައިގައި ނިހާނުގެ ފަރާތުން ހުށައަޅާފައިވާ ހުށައެޅުންތަކުގެ ތެރޭގައި މި މައްސަލައިގައި ދައުވާ އުފުލުމުގައި އުނިކަން ހުރިކަމާއި، އަހުމަދު އަދީބު ހެއްކެއްގެ ގޮތުގައި ބަލައިނުގަތުމާއި، ބޭންކް ސްޓޭޓްމަންޓުތަކާއި ޓްރާންސެކްޝަންތަކުގެ ތަފްސީލު ހެކީގެ ގޮތުގައި ބަލައިނުގަތުމާއި، މޯބައިލް އަދި ކޮމްޕިއުޓަރ ފޮރެންސިކް ރިޕޯޓު ހެކީގެ ގޮތުގައި ބަލައިނުގަތުމާއި، މި މައްސަލައިގައި ޖޮއިންޓް އިންވެސްޓިގޭޝަނާއި ގުޅޭ އެއްބަސްވުމުގެ އިތުރުން، އަދީބާއެކު ދައުލަތުން ވެފައިވާ އިއުތިރާފު އެއްބަސްވުން ހާމަކޮށްދިނުމަށް ހުށައެޅި ހުށައެޅުންތައް ހިމެނެއެވެ.
އެހެންނަމަވެސް އެހުށައެޅުންތައް ޝަރީއަތުން ބަލައިގެންފައެއް ނުވެއެވެ.
މައްސަލަ ބައްލަވާ ގާޒީ އަލީ އާދަމް ވަނީ މި މައްސަލައިގައި ހުށައަޅާފައިވާ ދައުވާތައް މައުޟޫއީ ގޮތުން ކުރިއަށް ގެންދެވޭނެކަމަށް ނިންމަވައި، މި މައްސަލައިގެ ޝަރީއަތް ފެށުމަށް ނިންމަވާފައެވެ.
ވުމާއެކު، ދެން އޮންނަ އަޑުއެހުމެއްގައި އޮންނާނީ މި މައްސަލައިގެ ޝަރީއަތް ފަށައި، އިފްތިތާޙީ ބަޔާން ހުށައެޅުމެވެ.
