ބުރާސްފަތި ދުވަހު އުޒްބަކިސްތާންގައި ފެށޭ މުހިންމު ސަރަހައްދީ ސެކިއުރިޓީ ސަމިޓެއްގެ ތެރެއިން ޗައިނާ ރަޝިޔާ އަދި އިންޑިޔާގެ ލީޑަރުން ބައްދަލުކުރައްވަން ހަމަޖެހިފައިވާ ކަމަށް ޚަބަރު ލިބިއްޖެއެވެ. ޝެންހާއި ކޯޕޮރޭޝަން އޯގަނައިޒޭޝަން ނުވަތަ އެސް.ސީ.އޯގެ މެމްބަރު ގައުމުތަކުގެ އެންމެ މަތީ ވެރިންގެ ބައްދަލުވުން ސެޕްޓެމްބަރު 15 އިން 16 އަށް ކުރިޔަށް ދާއިރު މި ސަމިޓަކީ "ހުޅަގު ނޫންގޮތެއް" ހޯދުމަށް ކުރެވޭ މަސައްކަތެއްގެ ގޮތުގައި ވެސް ދަނީ ސިފަކުރެވެމުންނެވެ. ޝެންހާއި ކޯޕަރޭޝަން އޯގަނައިޒޭޝަންގެ މެމްބަރު އެހެން ގައުމުތަކަކީ ޕާކިސްތާން، އީރާން، ތުރުކީ އަދި ސެންޓްރަލް އޭޝިޔާގެ ހަތަރު ގައުމެކެވެ.

ސަމިޓްގައި މަޝްވަރާކުރެވޭނެ މުހިންމު މައުލޫއުތަކުގެ ތެރޭގައި ޔޫކްރެއިން ހަނގުރާމައިގެ އިތުރުން ހުޅަނގާއި ޗައިނާއާ ދެމެދު މަސްރަހު ގޯސްވާން ފަށާފައިވާތީ މި ދެ ކަންތަކަށް އިސްކަމެއް ދެވޭނެ ކަމަށް ބެލެވެއެވެ. އެހެންނަމަވެސް ސަމިޓްގައި "ސްޕޮޓްލައިޓް" އެންމެ ބޮޑަށް އެޅިގެންދާނީ އިންޑިޔާގެ ބޮޑުވަޒީރު ނަރެންދުރަ މޯދީއަށް ކަމަށް ވެއެވެ. މޯދީ ސަމިޓްގެ އަރިމަތިން ޗައިނާގެ ރައީސް ޝީ ޖިންގޕިންއާއި ރަޝިޔާގެ ރައީސް ވްލަޑިމިއަރ ޕުޓިން އާއި ބައްދަލުކުރެވުމަށް ވަނީ ހަމަޖެހިފައެވެ.

އިންޑިޔާއަކީ އިންޑިޔާ، އެމެރިކާ، އޮސްޓްރޭލިޔާ އަދި ޖަޕާން މި ހަތަރު ގައުމު ގުޅިގެން އުފައްދާފައިވާ ސެކިއުރިޓީ އެލަޔަންސެވެ. "ކުއަޑް" ގެ މެމްބަރަކަށް ވިޔަސް ރަޝިޔާއިން ޔޫކްރެއިން ހިފަން ކުރާ ހަނގުރާމަ އިންޑިޔާއިން ކުށްވެރިކޮށްފައެއް ނުވެއެވެ. އަދި ހުޅަނގުން މަނާކޮށްފައި އޮތުމާއި އެކުވެސް އިންޑިޔާއިން ދަނީ ރަޝިޔާގެ ތެޔޮ ގަންނަމުންނެވެ. މޯދީ މިސަމިޓްގައި ބައިވެރިވެވަޑައިގަތުން މުހިންމު ވާ އަނެއް ސަބަބަކީ މިއީ ޗައިނާއާއި އިންޑިޔާގެ ސިފައިން ހިމާލިޔާ ބޯޑަރުމަތީ 2020 ވަނަ އަހަރު ހަމަލާ ބަދަލުކޮށް ދެފަރާތުންވެސް ސިފައިންތަކެއް މަރުވި ހާދިސާއަށް ފަހު ޗައިނާގެ ރައީސް ޝީ އާއި މޯދީ ބައްދަލުކުރައްވާ ފުރަތަމަ ފަހަރުކަމަށް ވާތީއެވެ.

އަވަށްޓެރި ޕާކިސްތާންގެ ބޮޑުވަޒީރު ކަމަށް ޝަހްބާޒް ޝަރީފް ވަޑައިގެންނެވީ މިދިޔަ އެޕްރިލްގައި ކަމަށް ވާއިރު ދެގަމުގެ ދެމެދު ކުރިން ޖެހެމުން އައި މައްސަލަތައް މިހާރު ކޮންމެވެސް ވަރަކަށް ފިނިވެފައިވާ ކަމަށް ރިޕޯޓްތައް ބުނެއެވެ. ކުރީގެ ބޮޑުވަޒީރު އިމްރާން ޚާން އޮތީ އިންޑިޔާއާ އެކު އޮތް ވިޔަފާރީގެ ގުޅުންތައް ކަނޑާލާފައެވެ. ނަމަވެސް މިހާރުގެ ފޮރިން މިނިސްޓަރު ބިލާވަލު ބުއްޓޯ ޒަރްދާރީ ވަނީ ވިޔަފާރި ގުޅުންތައް އަލުން ގާއިމް ކުރަން ބޭނުން ކަމަށް ވިދާޅުވެފައެވެ.

ޝެންހާއި ކޯޕޮރޭޝަން އޯގަނައިޒޭޝަން ނުވަތަ އެސް.ސީ.އޯއަކީ ބޯޑަރު ސެކިއުރިޓީ ޔަގީންކޮށް އަދި ހައްދުފަހަނަ އަޅާދިއުން ހުއްޓުވުމަށް 2001 ވަނަ އަހަރު ޗައިނާ ރަޝިޔާ އަދި ސެންޓްރަލް އޭޝިޔާގެ ހަތަރު ގައުމު ކަމަށްވާ ކަޒަކްސްތާން، ކިރްގިސްތާން، އުޒަބަކިސްތާން އަދި ތަޖިކިސްތާން ގުޅިގެން އުފެއްދި ޖަމިއްޔާއެކެވެ. އިންޑިޔާ އާއި ޕާކިސްތާން ގުޅިފައިވަނީ 2017 ވަނަ އަހަރުއެވެ. އަދި އީރާނަށް ފުލް މެމްބަރުކަން ލިބެނީ މިފަހަރުގެ ސަމިޓްގައެވެ. އެޖަމިއްޔާ މިވަގުތު ބެލެނީ ނޭޓޯ ފަދަ ހުޅަގުގެ ޖަމާއަތްތަކުގެ ނުފޫޒުން ނެއްޓި ތިބެވޭނެ ގޮތެއް ހޯދުމަށް އޮތް މަގެއްގެ ގޮތުގައެވެ.

މި ގްރޫޕްގަ ހިމެނޭ ގައުމުތަކުގެ އާބާދީ އެއްކޮށްލުމުން ދުނިޔޭގެ އާބާދީގެ 44 އިންސައްތަ އާއި ގާތް ކުރާއިރު، ޖިއޯގްރަފިކަލް ގޮތުން ބެލިއަސް މިގައުމުތައް ވަރަށް ބޮޑު އޭރިޔާއެއް ކަވަރު ކުރެއެވެ. އަދި މި ގައުމުތަކުގެ ޖީޑީޕީ ވެސް ދުނިޔޭގެ ޖީޑީޕީގެ 30 އިންސައްތަޔަށް ވުރެ އިތުރެވެ.

މި ބްލޮކްގެ ހަގީގީ މަސައްކަތަކީ ރީޖަނަލް ސެކިއުރިޓީ ޔަގީން ކުރުން ކަމަށް ވިއަސް ފަހުން ވަނީ އިގްތިސާދާއި ވިޔަފާރީގެ އިތުރުން ގާނޫނު ހިންގުމުގެ ކަންކަންވެސް އިތުރު ކޮށްފައެވެ.

މި ބްލޮކްގައި ޗައިނާ އަދި ރަޝިޔާގެ ނުފޫޒް ގަދަ ތޯ މިއީ މިހާރު އުފެދިފައިވާ ސުވާލެކެވެ.