ފުޓުބޯޅަ އެސޯސިއޭޝަން އޮފް ސިންގަޕޫރު (އެފްއޭއެސް)ގެ ރައީސް ލިމް ކިއާ ޓޮން އަވަހާރަވެއްޖެއެވެ.

އުމުރުފުޅުން 70 އަހަރުގެ ލިމް އަވަހާރަވެފައިވަނީ ބުދަ ދުވަހުގެ ވަގުތެއެއްގައެވެ. ލިމް އަކީ ސިންގަޕޫރު ފުޓުބޯޅަ އެސޯސިއޭޝަން ފުރަތަމަ އިންތިޚާބީ ރައީސް އެވެ. އެ އެސޯސިއޭޝަންގެ ރައީސްކަމުގެ މަގާމަށް ލިމް އެންމެ ފުރަތަމަ އިންތިޚާބުވެވަޑައިގެންފައިވަނީ 2017 ވަނަ އަހަރުއެވެ. އޭގެ ފަހުން 2021 ވަނަ އަހަރު ލިމް ވަނީ ދެވަނަ ދައުރަކަށް އިންތިޚާބުވެވަޑައިގެންފައެވެ.

ލިމް އެންމެ ފުރަތަމަ އެ އެސޯސިއޭޝަންގައި އަދާކުރައްވާފައިވަނީ ކޮމެޓީ މެމްބަރުކަމެވެ. 1999 ވަނަ އަހަރުން ފެށިގެން ލިމް އައި އެފްއޭއެސް ކޮމެޓީގެ މެމްބަރެއްގެ ގޮތުގައި މަސައްކަތް ކުރައްވަމުންނެވެ. އޭގެ ފަހުން 2007 ވަނަ އަހަރު ލިމް ވަނީ އެފްއޭއެސްގެ ނައިބު ރައީސްކަމުގެ މަގާމު ވެސް އަދާކުރައްވާފައެވެ.

މީގެ އިތުރުން ލިމް އަކީ ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ކޮމެޓީއެއްގައި މަސައްކަތް ކުރެއްވި ސިންގަޕޫރަށް ނިސްބަތްވާ ފުރަތަމަ ފަރާތެވެ. 2013 ވަނަ އަހަރުގެ މެއި މަހުގެ ތެރޭގައި ލިމް ވަނީ ފީފާގެ ޑިސިޕްލިނަރީ ކޮމެޓީގެ ޑެޕިއުޓީ ޗެއާމަނަކަށް އިންތިޚާބުވެވަޑައިގެންފައެވެ.

ލިމް އަވަހާރަވުމާ ގުޅިގެން އެ ޤައުމުގެ އެފްއޭއެސް އިން ވަނީ އާއިލާއަށް ތައުޒިޔާގެ މެސެޖު ފޮނުވާފައެވެ. މީގެ އިތުރުން އެ ޤައުމުގެ ކުޅިވަރު މިނިސްޓަރު އެޑްވިން ޓޮން ވެސް ވަނީ ލިމްގެ އާއިލާއަށް ތައުޒިޔާ ފޮނުއްވާފައެވެ. އެޑްވިން ވިދާޅުވެފައިވާ ގޮތުގައި، ލިމް އަކީ ސިންގަޕޫރުގެ ފުޓުބޯޅަ މަތީ ފެންވަރަކަށް ގެންދިޔުމަށް މަސައްކަތް ކުރެއްވި ފަރާތެކެވެ. މީގެ އިތުރުން ލިމް އަކީ އަބަދުވެސް ފީފާ އާއި އޭޝިއަން ފުޓުބޯޅަ ކޮންފެޑެރޭޝަން (އޭއެފްސީ)ގެ ގަވާއިދަށް އަބަދުވެސް އަމަލުކުރައްވާ، އިހްތިރާމްކުރެއްވި ފަރާތެއް ކަމަށް ވެސް އެޑްވިން ވިދާޅުވެފައިވެއެވެ.

މީގެ އިތުރުން އޭއެފްސީގެ ރައީސް ޝައިޚް ސަލްމާން އިބްރާހިމް އަލް ޚަލީފާ ވެސް ވަނީ ލިމް އަވަހާރަވުމާ ގުޅިގެން ހިތާމަ ފާޅުކުރައްވާ، އާއިލާއަށް ތައުޒިޔާ ވިދާޅުވެފައެވެ. އޭއެފްސީ ރައީސް ވިދާޅުވި ގޮތުގައި ލިމް އަކީ ސިންގަޕޫރުގެ ފުޓުބޯޅައިގެ އިތުރުން މުޅި އޭޝިއާ ސަރަހައްދުގެ ފުޓުބޯޅަ ކުރިއެރުވުމަށް މަސައްކަތް ކުރެއްވި ކުޅަދާނަ ޝަޚުސިއްޔަތެކެވެ.

ލިމް އަވަހާރަވުމާ ގުޅިގެން ސިންގަޕޫރުގެ ޑޮމެސްޓިކް ފުޓުބޯޅަ ލީގުގެ މެޗުތައް ވެސް ވަނީ ފަސްކޮށްފައެވެ.