އެއިން އެއްވެސް ބޭފުޅަކަށް އެފޯޑެއް ނުކުރެވޭނެ ރިޔާސީ ކެންޑިޑޭޓަކަށް ނުކުންނަ މީހަކާއި ދެކޮޅަށް މަސައްކަތް ކުރާކަށް
ރައީސް ސާލިހު އާއި ރައީސް ނަޝީދު - ފަހު ވަގުތު އެއްގަލަކަށް އެމްޑީޕީން އަރާނެކަމަށް ގާސިމް ދެކެވަޑައިގަންނަވާ
ވެރިކަން ކުރާ މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ރޫޅިގެން ނުދާނެކަމަށާއި، ދައްކަވަމުން ގެންދަވަނީ ޝޯ ޕީސްއެއް ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމަށް ދެއްވި އިންޓަރވިއުއެއްގައި އެމްޑީޕީ ރޫޅިގެން ހިނގައިދާނެތޯ ދެންނެވި ސުވާލުގެ ޖަވާބުގައި ގާސިމް ވިދާޅުވީ އެއީ "އިޓް އިސް ޖަސްޓް ޝޯ" އެއް ކަމަށެވެ.
ގާސިމް ވިދާޅުވީ ރިޔާސީ ކެންޑިޑޭޓުކަން ރައީސް އިބްރާހިމް މުހައްމަދު ސާލިހަށް ލިބިވަޑައިގަންނަވާނެކަމަށް ވަރަށް ބޮޑަށް ވިސްނަވައިގެން ހުންނެވިކަމަށެވެ. އަދި އެހެން ބޭފުޅުން ވެސް ވިސްނަވައިގެން ތިއްބަވަނީ އެހެންކަމަށާއި، ސަބަބަކީ އެމަނިކުފާނު ވެރިކަމުގައި ހުންނެވުމުން ކަމަށެވެ.
ގާސިމް ވިދާޅުވީ ރައީސް މުހައްމަދު ނަޝީދު ވާދަކުރައްވާނެކަމަށް ވިދާޅުވެފައިވި ނަމަވެސް، އަދި ވާދަކުރެއްވިޔަސް އެމަނިކުފާނަށް [ވެރިކަން] ލިބިވަޑައިނުގަންނަވާނެކަން އެނގިވަޑައިގަންނަވާ ކަމަށެވެ. އަދި ރައީސް ނަޝީދު ކުރިމަތި ނުލައްވަފާނެ ކަމަށާއި، ކުރިމަތި ލެއްވިޔަސް އަދި ނުލެއްވިޔަސް އެމަނިކުފާނަށް [ވެރިކަން] ލިބިވަޑައިނުގަންނަވާނެ ކަމަށެވެ.
އެމްޑީޕީ ތެރޭގައި ރައީސް އިބްރާހިމް މުހައްމަދު ސާލިހާއި ރައީސް ނަޝީދާއި ދެމެދު ހިޔާލު ތަފާތުވުންތަކެއް އުފެދިފައިވާތާ ދުވަސްކޮޅެއް ވަނީ ވެފައެވެ. ވަކިން ހާއްސަކޮށް ވެރިކަމުގެ ނިޒާމާއި ގުޅޭގޮތުން ދެ ބޭފުޅުންގެ ހިޔާލުފުޅު ތަފާތެވެ. އަދި ސަރުކާރު ހިންގަމުން އަންނަ ގޮތާމެދު ރައީސް ނަޝީދުގެ ފާޑުކިއުން އަމާޒުވެފައިވާއިރު، ވެރިކަމުގެ ދެވަނަ ދައުރަކަށް ރައީސް ސާލިހު ވަޑައިގެންނެވުމަކީ އެންމެ ފައިދާ ހުރި ގޮތެއް ނޫން ކަމަށް ރައީސް ނަޝީދު ވަނީ ވިދާޅުވެފައެވެ.
ނަމަވެސް ރައީސް ސާލިހު ވަނީ ކޯލިޝަނަކާއެކު ދެވަނަ ދައުރަކަށް ވަޑައިގެންނެވުމުގެ ޝައުގުވެރިކަން ފާޅުކުރައްވާފައެވެ. އަދި އެމަނިކުފާނަކީ އެމްޑީޕީއަށް އޮތް ޗޮއިސްކަމަށް ވެސް ވިދާޅުވެފައިވެއެވެ.
