އޯގަސްޓުމަހު ފިރިހެނުންނަށް ގެވެށި އަނިޔާކުރުމާގުޅޭ 14 އިންސައްތަ މައްސަލަ ފެމިލީ ކޯޓަށް ހުށަހެޅި
އޯގަސްޓު މަހު 188 ކައިވެނި ކޮށްދީފައިވާއިރު، 148 ވަރިކޮށްފައިވޭ
ފެމިލީ ކޯޓް
އޯގަސްޓު މަހު ފިރިހެނުންނަށް ގެވެށި އަނިޔާކުރުމާގުޅޭ 14 އިންސައްތަ މައްސަލަ ފެމިލީ ކޯޓަށް ހުށަހަޅައިފިއެވެ.
ފެމިލީ ކޯޓުން ވަނީ އެ ކޯޓުގެ އޯގަސްޓު މަހުގެ ތަފާސްހިސާބުތައް އާންމުކޮށްފައެވެ. އެގޮތުން އޯގަސްޓު މަހު 188 ކައިވެނި ކޮށްދީފައިވާއިރު، 148 ވަރި ކޮށްފައިވެއެވެ.
އާއިލީ މައްސަލަތައް ޙައްލުކުރުމާބެހޭ ބައިން 27 މައްސަލައެއް ނިންމާފައިވާއިރު، އަލަށް ހުށަހެޅުނު 17 މައްސަލައަކާއެކު 44 މައްސަލައެއް އަދި ނުނިމި އެބަހުރިކަމަށް ކޯޓުން މައުލޫމާތުދެއެވެ.
އޭގެ އިތުރުން، ގެވެށި އަނިޔާއާ ގުޅޭ 7 މައްސަލައެއް އޯގަސްޓު މަހު ފެމިލީ ކޯޓަށް ހުށަހެޅިފައިވެއެވެ. އަދި ކުރީ މަހުގެ ބާކީގެ ގޮތުގައި 5 މައްސަލައެއް ހިމެނޭއިރު، ރައްކާތެރި ކުރުމުގެ އަމުރުތަކާއިގުޅޭ 7 މައްސަލައެއް މި މުއްދަތުގައި ކޯޓުން ވަނީ ނިންމާފައެވެ.
އެއް މައްސަލައެއްގައި ރައްކާތެރި ކުރުމުގެ އަމުރު ނެރެދެވެން ނެތްކަމަށްވެސް ކޯޓުން ކަނޑައަޅާފައިވެއެވެ.
ގެވެށި އަނިޔާއާ ގުޅިގެން ކޯޓަށް ހުށަހެޅިފައިވާ މައްސަލަތަކުގެ ތެރެއިން 4 މައްސަލައެއް ބާކީ ނުނިމި އެބައޮތެވެ.
ފެމިލީ ކޯޓުން މައުލޫމާތު ދޭ ގޮތުގައި އޯގަސްޓު މަހު ހުށަހެޅިފައިވާ ގެވެށި އަނިޔާއާ ގުޅޭ މައްސަލަތަކުގެ ތެރެއިން 86 އިންސައްތަ މައްސަލައަކީ އަންހެނުން ހުށަހަޅާފައިވާ މައްސަލައެވެ. 14 އިންސައްތަ މައްސަލައަކީ ފިރިހެނުން ހުށަހަޅާފައިވާ މައްސަލައެވެ.
އޯގަސްޓު މަހު ޙުކުމް ތަންފީޒު ކުރުމާގުޅޭ 29 މައްސަލައެއް އަލަށް ކޯޓަށް ހުށަހެޅިފައިވެއެވެ. ބަލަދުވެރިކަމާއި ބެލެނިވެރިކަމާ ގުޅޭ 1 މައްސަލަ ހުށަހެޅިފައިވާއިރު، މަރު ސާބިތު ކުރުމާގުޅޭ 6 މައްސަލަވެސް ހުށަހެޅިފައިވެއެވެ.
އޭގެ އިތުރުން، ވަލީ ހޯދުމާ ގުޅޭ 4 މައްސަލައެއް މި މުއްދަތުގެ ތެރޭގައި ފެމިލީ ކޯޓަށް ހުށަހެޅިފައިވެއެވެ.
