ރާއްޖެއަށް ލިބޭ އާމްދަނީއަކުން ފައިނޭންސް މެނޭޖުކުރެވޭނެ ގޮތްތަކެއް ހޯދަންޖެހޭ – އަމީރު

ރާއްޖެއަށް ލިބޭ އާމްދަނީއަކުން ފައިނޭންސް މެނޭޖްކުރެވޭނެ ގޮތްތަކެއް ހޯދަންޖެހޭ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

މިނިސްޓަރ އަމީރު މިހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުންނެވެ. މިނިސްޓަރު އަމީރު ވިދާޅުވީ ޖީއެސްޓީ އަދި ޓީޖީއެސްޓީ ބޮޑުކުރަން ނިންމަވާފައިވަނީ ރާއްޖެއަށް ލިބޭ އާމްދަނީ އިތުރުކުރުމަށް ކަމަށެވެ. މިނިސްޓަރު ވިދާޅުވީ ވަރަށް ގިނަ ފަރާތްތަކާއެކު އެކްސްޓެންސިވް ޑިސްކަޝަންތަކަށް ގޮސްގެން ނިންމުންތަކެއް ނިންމަވާފައިވާ ކަމަށާއި، ޚާއްސަކޮށް ބޭރުގެ ފަރާތްތައް، އިންޓަރނޭޝަނަލް މަނިޓަރީ ފަންޑް (އައިއެމްއެފް) ވޯލްޑް ބޭންކް އަދި އެހެނިހެން ފަރާތްތަކާއި ވާހަކަ ދައްކަވާ އަދި އިންޑަސްޓްރީގެ ސްޓޭކް ހޯލްޑަރުންނާއި ވެސް ވާހަކަދެއްކެވުމަށްފަހު ޓެކްސް ބޮޑުކުރަން ނިންމެވީ ކަމަށެވެ.

މިނިސްޓަރު ވިދާޅުވީ ރާއްޖޭގެ ޑެފިސިޓް ފޫބައްދަން ބޭރަށްގޮސް މާކެޓްގައި ފައިނޭންސް ރެއިސްކުރުމަށްޓަކައި ވަރަށް ބޮޑެތި ގޮންޖެހުންތަކެއް އެބަހުރި ކަމަށެވެ. އަދި ކުރިއަށް އޮތްތަނުގައި ރާއްޖެއަށް ލިބޭ އާމްދަނީއަކުން ފައިނޭންސް މެނޭޖްކުރެވޭނެ ގޮތެތަކެއް ހޯދަން ޖެހޭ ކަމަށެވެ. އެގޮތުން ބޭރުގެ ފަރާތްތަކާއި ވެސް ވާހަކަ ދައްކައިގެން ފަތުރުވެރިކަމަށް ވެސް އަދި ޖެނެރަލް ސެކްޓަރުގައި ވެސް މުދަލާއި ހިދުމަތުގެ އަގުން މި ނެގޭ ޓެކްސްއިން ވެސް ރައްޔިތުންނަށް ބޮޑަށް އަސަރުނުކުރާނެ ގޮތަކަށް މަސައްކަތް ކުރަމުން ގެންދަވާ ކަމަށް މިނިސްޓަރު އަމީރު ވިދާޅުވިއެވެ.

މިނިސްޓަރު ވިދާޅުވީ ހާއްސަކޮށް ޖީއެސްޓީ ބޮޑުކޮށްގެން އިންފްލޭޝަނަށް އަންނަ ޕްރެޝަރުތައް މެނޭޖުކުރެވޭނެކަމަށް ގަބޫލުކުރައްވާ ކަމަށެވެ. އަދި އެއްވެސް ޓެކްސްއެއް ބޮޑުކުރުމަކީ އެންމެންގެ 100 އިންސައްތަ އެއްބަސްވާނެކަމެއް ނޫން ކަމަށެވެ.

ފިނޭންސް މިނިސްޓަރު އަމީރު ވިދާޅުވީ ދުނިޔޭގެ އެހެން ގައުމުތަކަށް ބަލާއިރު، ސަރުކާރަށް އާމްދަނީ އިތުރުކޮށްގެން ޕީއެސްއައިޕީ ޕްރޮޖެކްޓްތައް ވެސް ކުރިއަށްގެންދާ ކަމަށެވެ. އެއީ މަގު ހެދުންކަމުގައިވީ ނަމަވެސް، ބަނދަރު ހެދުންކަމުގައިވީ ނަމަވެސް އަދި ފެނާއި ނަރުދަމާ ކަމުގައިވީ ނަމެވެސް އެކަން ކުރަނީ އެހެން ކަމަށެވެ. އަދި ބޭރުގެ ގައުމުތަކުގައި ތަކެތީގެ އަގުބޮޑުވަމުންދާ ދަނޑިވަޅެއްގައި ޖީއެސްޓީގެ ރޭޓް މަތިކުރާއިރު ގޮންޖެހުންތަކެއް ހުންނާނެ ކަމަށާއި، އެ ގޮންޖެހުންތައް މެނޭޖުކުރުމަށްޓަކައި ސަރުކާރުން ވަރަށް ގިނަ ފިޔަވަޅުތަކެއް އަޅަމުންދާ ކަމަށް މިނިސްޓަރު ވިދާޅުވިއެވެ. އަދި ކުރިއަށް އޮތްތަނުގައި ވެސް ގޮންޖެހުންތައް މެނޭޖުކުރެވޭނެކަމަށް ދެކެވަޑައިގަންނަވާ ކަމަށް މިނިސްޓަރު އަމީރު ވިދާޅުވިއެވެ.