ރ. އުނގޫފާރު ރީޖަނަލް ހޮސްޕިޓަލްގެ ގަވަރނިންގ ބޯޑްގެ މަޤްސަދަކީ އުނގޫފާރު ރީޖަނަލް ހޮސްޕިޓަލް ޓާޝިއަރީ ފެންވަރަށް ތަރައްޤީކޮށް ހިންގުން ހަރުދަނާކުރުން ކަމަށް އެ ބޯޑުގެ މެމްބަރު އާދަމް މާހިރު ވިދާޅުވެއްޖެއެވެ.
ރާއްޖެއެމްވީއަށް ދެއްވި އިންޓަވިއުއެއްގައި މާހިރު ވިދާޅުވީ ބޯޑު އެކުލަވާލާފައިވާ މައިގަނޑު މަޤްސަދަކީ އުނގޫފާރު ރީޖަނަލް ހޮސްޕިޓަލް ޓާޝިއަރީ ފެންވަރަށް ތަރައްޤީކޮށް ހިންގުމުގައި ރައްޔިތުންނަށް ދެވޭ ޚިދުމަތްތައް އިތުރުކުރެވި، ޚިދުމަތުގެ ފެންވަރު ރަނގަޅު ކުރުން ކަމަށެވެ.
ބޯޑުން ކަނޑައެޅޭ ތަސައްވަރަކީ އެ ދާއިރާއެއްގެ ތެރެއިން ކަނޑައެޅޭ ތަސައްވަރުތައް ކަމަށް ވެސް އޭނާ ވިދާޅުވިއެވެ.
ބޯޑުގެ މަސައްކަތްތައް ރޭވިފައިވާ ގޮތަށް ބަލާއިރު ހޮސްޕިޓަލް ހިންގުމުގައި ގެންގުޅޭނެ ސިޔާސަތުތައް ކަނޑައަޅާ، ތަންފީޒު ކުރުމުގައި އިދާރީ ގޮތުން ހިންގަން ޖެހޭ ކަންތައްތައް ހިންގާނެ ކަމަށް މާހިރު ފާހަގަކުރެއްވިއެވެ.
ބޯޑުގެ އެކުލަވާލިތާ ހަތް ދުވަސްވެފައިވާއިރު އަދި ބޯޑުގެ ބައްދަލުވުންތައް ނުބާއްވާ ކަމަށް މާހިރު ވިދާޅުވިއެވެ. އެހެންނަމަވެސް ބައްދަލުވުންތައް ބާއްވަން މަޝްވަރާ ކުރައްވަމުންދާ ކަމަށް ވިދާޅުވިއެވެ.
ބޯޑުގެ ބައްދަލުވުންތައް ވާޗުއަލްކޮށްވެސް ކުރިއަށް ގެންދެވޭނެކަމަށް މެންޑޭޓްގައި ކަނޑައަޅާފައިވާ ކަމަށާއި ނަމަވެސް އުންމީދަކީ ފޭސް ޓު ފޭސްކޮށް ވެސް ބައްދަލުވުންތައް ކުރިއަށް ދިޔުން ކަމަށް މާހިރު ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ރ. އުނގޫފާރު ރީޖަނަލް ހޮސްޕިޓަލްގެ ގަވަރނިންގ ބޯޑް އެކުލަވައިލައްވައި، އެ ބޯޑަށް މެންބަރުން ޢައްޔަން ކުރައްވާފައިވަނީ މި ސެޕްޓެމްބަރު މަހުގެ ދެވަނަ ދުވަހުއެވެ.
އެގޮތުން ބޯޑުގެ މެންބަރުކަމުގެ މަޤާމަށް ހަ ބޭފުޅަކު ވަނީ ޢައްޔަންކުރައްވާފައެވެ. އަދި ބޯޑުގެ ޗެއަރޕަރސަންގެ މަޤާމަށް ރައީސުލްޖުމްހޫރިއްޔާ ޢައްޔަންކުރެއްވީ މުޙައްމަދު ސާމިޢުއެވެ. މިބޯޑު އުފެއްދެވުމާ ގުޅިގެން ރ. އަތޮޅުގައިވާ ސަރުކާރުގެ 14 ޞިއްޙީ މަރުކަޒު، އުނގޫފާރު ރީޖަނަލް ހޮސްޕިޓަލުގެ ދަށުން ބެލެހެއްޓުމަށް ވަނީ ނިންމާފައެވެ.
