މެންޗެސްޓަރ ސިޓީއަށް މި ސީޒަންގެ ޗެމްޕިއަންސް ލީގު ކާމިޔާބުކުރެވޭނެ ކަމެއް ނުވަތަ ނުކުރެވޭނެ ކަމެއް ބުނަން ނޭންގޭ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން ބުނީ ޗެމްޕިއަންސް ލީގުގައި ސެވިއްޔާއާ ދެކޮޅަށް ކުޅުނު ފުޓުބޯޅަ މެޗަށްފަހު ވާހަކަ ދައްކަމުންނެވެ. އެ މެޗު ސިޓީން ކާމިޔާބުކުރީ 4-0 އިންނެވެ. ގާޑިއޯލާ ބުނީ ޗެމްޕިއަންސް ލީގު ކާމިޔާބުކުރުން ބިނާވެގެންދާނީ ސިޓީން ދައްކާ ކުޅުމެއްގެ މައްޗަށް ކަމަށެވެ. އޭނާ ބުނީ ސިޓީއަށް ރަނގަޅު ކުޅުމެއް ނުދެއްކިއްޖެނަމަ، ސަޕޯޓަރުންގެ ފަރާތުން އަދަބު ލިބޭނެ ކަމަށެވެ. މީގެ އިތުރުން އޭނާ ބުނީ ޔޫރަޕުގައި ސެވިއްޔާ އިން ހޯދާފައިވާ ކާމިޔާބީތަކާ ހަމައަށް ސިޓީ ވެސް ދާން އޭނާ ބޭނުންވާ ކަމަށެވެ. ގާޑިއޯލާ ބުނީ ސިޓީ އޮތީ ޔޫރަޕުގައި ސެވިއްޔާއިން ކޮށްފައިވާ ކަންތައްތަކާ މާދުރުގައިކަމަށެވެ.

މީގެ އިތުރުން ގާޑިއޯލާ ވަނީ މި ސީޒަންގެ ޗެމްޕިއަންސް ލީގުގައި އޭނާގެ ފޭވަރިޓުން ހާމަކޮށްފައެވެ. ގާޑިއޯލާ ބުނީ އެ ސުވާލަކީ ކޮންމެ އަހަރަކު ވެސް އޭނާ އަށް ކުރިމަތިވާ ސުވާލެއް ކަމަށެވެ. އަދި ކުޅިވަރަކީ އަބަދު ވެސް އެހެން ފުރުސަތެއް ހޯދައިދޭ ކަމެއްކަން ފާހަގަކުރަމުން ގާޑިއޯލާ ބުނީ، ބައެއް މީހުން ދެކޭ ގޮތުގައި ސިޓީ އަކީ ފޭވަރިޓުން ކަމަށެވެ. ނަމަވެސް އޭނާ އަށް ފެންނަ ގޮތުގައި ކޮންމެ އަހަރަކު ވެސް ފޭވަރިޓުންނަށް ވާންވާނީ ރެއާލް މެޑްރިޑް ކަމަށެވެ.

މެންޗެސްޓަރ ސިޓީއާއެކު ޗެމްޕިއަންްސް ލީގު ކާމިޔާބުކުރުމަކީ ގާޑިއޯލާގެ އެންމެ ބޮޑު އަމާޒެވެ. އޭނާ ވަނީ ސިޓީ ގޮވައިގެން 21-2020 ވަނަ ސީޒަންގެ ފައިނަލްގައި ކުޅެފައެވެ. އެ ފަހަރުގެ ފައިނަލުން ސިޓީ ބަލިވީ ޗެލްސީ އަތުންނެވެ.