އާރުޓިއެލް ފެރީގެ ޒޯން 1ގެ މަސައްކަތާއި މިނީ ބަހުގެ ޚިދުމަތާ ގުޅޭގޮތުން ކެބިނެޓުން މަޝްވަރާ ކޮށްފި
އާރުޓިއެލް ޚިދުމަތާ ގުޅޭގޮތުން ވަނީ ޕްރެޒެންޓޭޝަނެއް ހުށަހަޅާފައި
ކެބިނެޓް ބައްދަލުވުން ކުރިއަށްދަނީ
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރިޔާސީ ވަޢުދުފުޅުގައިވާ އިންޓެގްރޭޓަޑް ޓްރާންސްޕޯޓް ނެޓްވޯކްގެ ކަންކަމުގެ ތެރޭގައި ހިމެނޭ ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ޚިދުމަތުގެ ފުރަތަމަ މަރުޙަލާގައި ހިމެނޭ ޒޯން 1 ގެ މަސައްކަތް ސަރުކާރުން އެއްކޮށް ނިންމާލުމާއި، މާލޭގައި މިނީ ބަހުގެ ޚިދުމަތް ފެށުމާ ގުޅޭގޮތުން ކެބިނެޓުން މަޝަވަރާ ކޮށްފިއެވެ.
އަންގާރަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި މި ބައްދަލު ކުރެއްވުމުގައި ކެބިނެޓުގެ ވަޒީރުންނާއި، ރައީސުލްޖުމްހޫރިއްޔާގެ އޮފީހުގެ އިސްވެރިންނާއި، ކަމާބެހޭ އިދާރާތަކުގެ އިސް ބޭފުޅުން ބައިވެރިވެލެއްވިއެވެ.
މި ބައްދަލުކުރެއްވުމުގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއާއި، މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަންގެ ފަރާތުން ވަނީ ހާއްސަ ޕްރެޒެންޓޭޝަންތަކެއް ހުށައަޅައިފައެވެ. މި ޕްރެޒެންޓޭޝަންތައް ބިނާކޮށްފައިވަނީ އާރްޓީއެލް ފެރީގެ ޚިދުމަތާއި، މާލޭގައި މިނީ ބަހުގެ ޚިދުމަތް ދިނުމާގުޅޭ އެންމެ ފަހުގެ މަޢުލޫމާތުތަކުގެ މައްޗަށެވެ.
އާރްޓީއެލް ފެރީގެ ޚިދުމަތް ފެށުމަށް ހަމަޖެހިފައި ވަނީ ޒޯންތަކަކަށް ބަހާލައިގެން ތިން މަރުޙަލާއެއްގައި ކަމަށާއި، އަދި ޒޯން 1 ގައި ހިމެނޭ ހއ، ހދ، ށ، އަތޮޅުގައި ފެރީގެ ޚިދުމަތް ކާމިޔާބުކަމާއެކީ ކުރިޔަށްގެންދާކަން ވަނީ ފާހަގަކޮށްފައެވެ. މީގެ އިތުރުން މި ޚިދުމަތުގެ ދެވަނަ މަރުޙަލާ އަދި ތިން ވަނަ މަރުޙަލާގެ މަސައްކަތްތައް ތަންފީޒުކުރާނެގޮތުގެ އިތުރު މަޢުލޫމާތު ވަނީ ބައްދަލުވުމުގެ ބައިވެރިންނާ ހިއްސާކޮށްފައެވެ.
މީގެ އިތުރުން ވެސް ރައީސުލްޖުމްހޫރިއްޔާގެ ވައުދުފުޅާ އެއްގޮތަށް މާލޭގައި ފަށާފައިވާ މިނީ ބަހުގެ ޚިދުމަތަށް ރައްޔިތުންގެ ފަރާތުން އެއްބާރުލުމާއި ތަރުޙީބު ލިބެމުންދާކަން ވަނީ ފާހަގަކޮށްފައެވެ.
މި ވަޒީރުންގެ މަޖިލީހުގެ މަސައްކަތު ބައްދަލުވުމުގައި ކަމާގުޅޭ މުއައްސަސާތައް ގުޅިގެން މި ޚިދުމަތްތައް އިތުރަށް ކާމިޔާބުކަމާއެކު ހަރުދަނާކުރުމަށް ކުރެވެން ހުރި ކަންކަމާ ގުޅޭގޮތުންވެސް ވަނީ މަޝްވަރާ ކުރައްވާފައެވެ.
